Иргэдэд сар бүр олгодог 21 000 төгрөг өнөөдрөөс тав хоногийн өмнө иргэдэд хүрэх байсан ч одоо болтол мөнгөний бараа хараагүй хүн олон. Нүүрсний чанар нь муудлаа гэх шалтганаар 250 тэрбум долларын урьдчилгаа төлж, таван жил нүүрс экспортлох гэрээ байгуулж байсан “Чалко” групп ажлаасаа татгалзсан. Гэтэл гал дээр тос нэмж “Эрдэнэс таван толгой” бүтэн сар ажиллаагүй болж  таарав. Хүнд даацын автомашинаар тээвэрлэлт хийдэг компани, иргэдэд ажлын хөлсийг нь Засгийн газар олгоогүй гэнэ. Өнөө болтол 20 автомашинтай цөөхөн компаний цалин тавьж чадаагүй компани энэ сарын хүний хөгжлийн мөнгийг олгож чадах болов уу?

     Нэгэнт нүүрсний чанар нь муудсан гэх мэдээлэл гарч, жолооч нарын ажлын хөлсийг тавьж чадахгүй болсон гэх мэдээллийн үрээр “Эрдэнэс таван толгой” ашиг авчирсан уу гэж асуухад хүргэж байна. Өнгөрсөн оны наймдугаар сарын дөрвөнд Засгийн газрын гишүүд нэгэн ижил хувцастай ирж, тууз хайчлан нүүрсний экспортыг нээсэн. Харин өнөөдрийн эрин үед өнөөх Засгийн газар монгол жолооч нараа цалинжуулж чадахгүйд хүрлээ. Төр тэднийг тоолгүй орхиж байхад нөгөө талаас хятадуудад мөн шахагдаж байна. Хилээс цааш, Хятад руу 25 км л орж болно, эргэж гарч ирэхдээ ямар ч зүйл авч гарах ёсгүй. Гэтэл хятадууд манай улсын хилээс дотогш орж 200-300 км газраар хэрэн хэсдэг бөгөөд өдөр шөнөгүй, тасралтгүй ажиллаж монгол жолооч нарыг шахаж байна.

    “Эрдэнэс таван толгой”-н нүүрсийг зөөдөг 8000 орчим машин байдгаас дийлэнх нь хятадуудынх. Өөрсдийн машинтай монголчууд нүүрсээ авахад хүртэл хятадуудад дарлагдана. Баг тавантолгойн дөрөв, наймдугаар аман дээр хятадууд авлигал өгсөн учир дархан эрхтэй, шууд урдуур нь ордог аж. 2-3 хоног хүлээж байж авсан нүүрсээ 70 тн байх уу, 100 тн байхуу гэдгийг засмал замаар явах эсэхээсээ хамаарч шийднэ. Үнэндээ 100 тн хэмжээнэээс илүү гарч л байж ашиг олдог гэнэ. Засмалаар явах нэмэгдэл мөнгөгүй жолооч нар элс шороо манаргасан хээрийн замаар зорчихоос өөр сонголтгүй.

    Монголын иргэн бүр хувьцааг нь эзэмших ёстой “Тавантолгой” ийнхүү нүүрсээ борлуулах гэрээт компаниа алдаж, монгол жолооч нарынхаа цалинг тавьж чадахгүй болоод байгаа аж. Цаашилбал зургадугаар сарыг дуустал олгох сар бүрийн 21 000 төгрөгийн ирээдүй ч эргэлзээтэй болж байна.