Монголын сонгодог хөгжмийн урлагт үнэтэй хувь нэмэр оруулсан Төрийн шагналт, хөгжмийн зохиолч Ж.Чулууны нэрэмжит олон улсын өсвөрийн хөгжимчдийн уралдаан өнгөрсөн сарын 28-наас энэ сарын 3-нд болж, шилдгээ тодрууллаа. Уг уралдаанд ОХУ, БНХАУ болон Монголын 160 гаруй хүүхэд төгөлдөр хуур болон утсан хөгжмийн хийл, альт хөгжмийн төрлөөр гурван насны ангилалд өрсөлдсөн байна. Ж.Чулуун агсны хүү Ч.Чинбат анх санаачлан зохион байгуулсан юм. Энэ жил уралдааны шүүгчдийн бүрэлдэхүүнд ОХУ-ын нэрт хөгжимчин, концертмейстер Дарима Линховой, ОХУ-ын Улаан-Үд хотын Дуурь бүжгийн эрдмийн театрын концертмейстер Дарья Станишевская нар ажилласан. Жилээс жилд цар хүрээгээ тэлж, нэр хүнд нь өсөж байгаа уг наадмын бүх ангиллын тэргүүн шагналыг ХБК-ийн сурагчид хүртлээ. Тухайлбал, төгөлдөр хуурын А ангилалд Г.Оюун-Эрдэнэ, В ангилалд Э.Ундрал, С ангилалд О.Анар нар тэргүүлсэн бол утсан хөгжмийн В ангилалд Г.Чингүүн, С ангилалд П.Индра, Ц.Энгүүнээ нар манлайлж, урал дааны Гран при шагналын эзнээр А.Ханболд тодров. ОХУ-аас ирж уралдааныг шүүсэн шүүгчид Монголын багш нарын ур чадвар болон хүүхдүүдийн ур чадварын түвшинг магтаж, гадаадын уралдаан тэмцээнд идэвхтэй оролцохыг зөвлөсөн байна. ХБК-ийн 75 жилийн ойн хүрээнд зохион байгуулсан уг уралдаанд орон нутгаас цөөнгүй оролцогч ур чадвараа сорьсон бөгөөд Орхон аймгийн хоёр сурагчийг ХБК-д суралцах эрхээр урамшуулжээ.