1.Долоо хоногийн онцлох бахархал: Монголын дуучин Болгарын дуурийн театрт гоцлов.

Болгарын дуурийн театрт Италийн хөгжмийн суут зохиолч Ж.Пуччинийн “Чио Чио Сан” буюу “Эрвээхэй Хатагтай” дуурийг өнгөрсөн долоо хоногт тоглолоо. Гол дүр Чио Чио Санд МУСТА, Софи хотын дуурийн театрын гоцлон дуулаач Д.Баясгалан амжилттай тоглож, үзэгчдээс өндөр үнэлэлт авлаа. Д.Баясгалан нь Болгарын Хөгжмийн урлагийн академийг төгссөнөөс хойш тус театрт дуучин, гоцлол дуучнаар ажиллан олон томоохон дууриудын гол дүрийг бүтээж байна. Тэрээр мөн 2011 онд Болгарын Хөгжмийн урлагийн академийн 90 жилийн ойгоор Серби улсын дуурийн театрын дуучин Үржингийн хамтаар бие даасан тоглолтоо сонирхуулж, өндөр ур чадвартай дуучин гэдгээ нотлон харуулсан юм.

2. Долоо хоногийн онцлох шинэ бүтээл: Өнгөрсөн долоо хоногт зохиолч Г.Аюурзана “Бөөгийн домог” романаа солонгос хэл дээр Сөүл хотод хэвлэн гаргасан юм. Уг зохиол нь солонгосчуудын амтархан уншиж байгаа номнуудынх нь нэг болсон байна. Урьд нь түүний “Амь тавьж буй шувууны далавч” ном мөн энэ улсад хэвлэгдсэн билээ. Тэрээр гадны хэд хэдэн оронд номоо хэвлүүлж байсны дотор “Цасны роман” зохиолоо Хонг- Конг улсад хэвлэж байсан юм. Үүний дараа уг зохиол "Million writers award-2012" олон улсын хэмжээний утга зохиолын шагналд нэр дэвшээд одоо ид уншигчдийн санал асуулга явагдаж байна. Энэ шагнал Америкт анх 2004 онд бий болсон бөгөөд Г.Аюурзана зохиолчийн “Цасны роман” зохиол нь “Шилдэг богино хэмжээний хүүрнэл зохиол” төрөлд 13 зохиолчийн хамт нэр дэвшжээ. Шагнал авах эсэх нь гол биш бөгөөд дэвшиж байгаа нь том үзүүлэлт гэж утга зохиолын мэргэжилтнүүд үздэг. Дашрамд дуулгахад, Г.Аюурзана зохиолчийн шинэхэн бүтээл болох “Шүгдэн” роман болон түүний орчуулсан “Монтень. Сонгомол эсээнүүд” /УБ.,2004/ зохиол, Л.Өлзийтөгс зохиолчийн “Үзэхийн хязгаар” номууд Интерномын утга зохиолын бестселлерт дээгүүр байрт явна. 

3. Долоо хоногийн онцлох дурсамж: Энэ сарын 3-нд алдарт яруу найрагч О.Дашбалбар агсны шилдэг бүтээлүүдийг эмхэтгэсэн хос СD худалдаанд гарсан. Энэхүү CD-нд Монголчуудын сонсох дуртай “Амьддаа бие биеээ хайрла”, “Залуус дүү нартаа хэлэх үг”, “Тэнгэр шиг бай” тэргүүтэй хамгийн шилдэг бүтээлүүд багтсан байна. Мөн бүх шүлгийг зохиогчийн өөрийнх нь уншсан хувилбараар хүргэж байгаагаар ихээхэн онцлогтой болжээ. Ард түмний хайртай яруу найрагч О.Дашбалбарыг эргэн дурссан энэ өдөр уншигчид нь түүний уран бүтээлийн CD-г өргөнөөр авч байсан юм.

4. Долоо хоногийн онцлох ёсолгоо: Ерөнхийлөгч Ц.Элбэгдоржийн санаачлагаар хүндэтгэлийн ёсолгоог хийж эхлээд багагүй хугацаа өнгөрч байна. Ард иргэд ч хүндэтгэлийн ёсолгоог сайшаан хүлээн авсаар байна. ХБНГУ-д Төрийн айлчлал хийсэн Монгол Улсын Ерөнхийлөгчийн багт багтсан манай урлагийнхан Берлиний тайзнаа хүндэтгэлийн ёсолгоороор ёсолж, танхимд цугласан 1000 гаруй монголчууддаа хүндэтгэл үзүүлсэн. Тоглолтын найруулгыг МУГЖ Д.Сосорбарам хийсэн тул тэрээр өөрөө ч үүнийгээ үлгэрлэн харуулж чадсан.Тус танхимд хуран цугласан монголчуудын төлөөлөлтэй уулзахад энэхүү ёсолгоог их сайхан харагдаж байна хэмээн онцолсон. Нэгэн бүсгүй энэхүү ёсолгоо нь их содон, бусад үндэстнээс ялгаатай, аятайхан харагдаж байна гэсэн юм. Харин Мюнхенд ажиллаж амьдардаг гэр бүлийн яриагаар “Интернэтээс энэ тухай уншиж байсан. Харин энд тайзнаа хараад учир утгыг нь ойлгох шиг боллоо. Үнэхээр сайхан харагдаж байна” гэсэн юм. Ийнхүү хүндэтгэлийн ёсолгоо улам түгэн дэлгэрсээр байна. Монгол ёсолгоо нь эрт дээр үеэс гаралтай зөвхөн монгол хүмүүсийн хийдэг үйлдэл юм.

5. Долоо хоногийн онцлох амжилт: Олон улсын хүүхэлдэйн жүжгийн XXI их наадам тавдугаар сарын 26-наас зургадугаар сарын 3-нд БНХАУ-ын Чунда мужид болно. UNIMA буюу Дэлхийн хүүхэлдэйн холбооноос зохион байгуулдаг Олон улсын хүүхэлдэйн их наадамд Монголын Хүүхэлдэйн театрынхан “Ногоон дарь эхийн домог” жүжгээр оролцох болсон таатай мэдээг дуулгая. Урлагийн гавьяат зүтгэлтэн А.Чойсоны “Ногоон дарь эхийн домог” жүжгийг ардын домгоос сэдэвлэж, таягт утсан хүүхэлдэйн аргыг ашиглан 1980-аад оны эхээр олны хүртээл болгож байсан байна. Харин энэ удаагийн жүжгийг Хүүхэлдэйн театрын ерөнхий найруулагч М.Ариунтуяа шинэчлэн найруулж, жүжигчин Ц.Эрдэнэцэцэг, Я.Өнөртуул, Д.Батмөнх нар амилуулсан юм. Манай театрынхан энэхүү уралдаанд амжилттай оролцохын тулд бэлтгэл сургуулилтаа аль хэдийн эхэлсэн гэдгээ мэдэгдлээ.

Өнгөрсөн долоо хоногт Монголын кино ертөнцөд шинэ кино мэндэлсэнгүй. Харин удахгүй Мөрөөдлийн театрын уран бүтээлчдийн “Ээжийн дайсан” кино нээлтээ хийнэ. Уг киноны танилцуулах хуудас өнгөрсөн долоо хоногт хэвлэл мэдээллийн хэрэгслээр тараагдсан. Мөн үзэгчдийг удтал хүлээлгэсэн  “Аравт” түүхэн кино энэ сарын 21-нд “Тэнгис” кино театрт нээлтээ хийнэ. Тус киноны хөгжмийг төгөлдөр хуурч, хөгжмийн зохиолч Б.Чинбат бичсэн нь олны зүгээс өндөр үнэлгээ аваад байгаа. Манай нэгэн нэртэй хөгжим судлаач “Энэ бол Н.Жанцанноровын “Мандухай сэцэн хатан” киноны хөгжмөөс хойш төрсөн түүхэн киноны хамгийн шилдэг нь” хэмээн дүгнэсэн байдаг.  Энэхүү киноны нээлттэй зэрэгцэн “Аравт”-ын цомгийн борлуулалтын ажиллагаа албан ёсоор эхэлж байна. Киноны нээлтээр “Аравт” цомгийг худалдан авбал хөгжмийн зохиолч Б.Чинбатын гарыг үсгийг авахаас гадна, цуг зургаа авахуулах гэнэ.

 “Hi-Fi Records”-ын хөгжмийн сүлжээ дэлгүүр долоо хоног бүр борлуулалтаараа тэргүүлж буй шилдэг 10 цомгийн жагсаалтыг гаргадаг уламжлалтай. Энэ долоо хоногт  “A Sound” хамтлагийн  “Зуун наст” цомог жагсаалтыг тэргүүлж байна.

Т.Хулан