Баянхонгор аймаг дахь "Баянхөндий" төслийн аж үйлдвэрийн цогцолбор ашиглалтад орж, анхны алтаа Монгол Улсын Эрдэнэсийн санд тушаасныг “Эрдэнэ Монгол” ХХК мэдээллээ.

Уурхай, боловсруулах үйлдвэр, дэд бүтцээс бүрдсэн уг цогцолборын бүтээн байгуулалт 22 сарын турш үргэлжилж, ийнхүү төлөвлөсөн хугацаандаа ашиглалтад орж байна.

Төслийн алтны нийт нөөц 513,700 унц бөгөөд жил бүр ойролцоогоор 85 мянган унц алт олборлох тооцоотой. Өнгөрсөн оны нэгдүгээр сард Mongolian Mining Corporation компани “Erdene Resource Development” компанитай стратегийн хамтын ажиллагаа эхлүүлж, 40 сая ам.долларын хөрөнгө оруулалт хийсэн нь бүтээн байгуулалт эрчимжихэд түлхэц болсон юм.

"Баянхөндий" төслөөс олборлосон алтыг 100 хувь Монголбанканд, спот ханшаар тушаах тул Монгол Улсын гадаад валютын нөөцийг арвижуулахад дэм болохоор байна. Түүнчлэн олон улсын зах зээлд алтны үнэ он гарсаар 40 орчим хувиар өсөж, одоо ч түүхэн дээд цэгээ шинэчилсээр буй таатай үед төслийн үйлдвэрлэл эхэлж байна. Төслийн үйл ажиллагааны явц, систем жигдэрснээр уурхайн олборлолт 2025 оны IV улирлын сүүлээр бүрэн хүчин чадалдаа хүрэх хүлээлттэйг MMC компани онцоллоо.