Хөлбөмбөгийн ертөнцөд хоёр нэр хэдэн арван жилийн турш ноёрхсон нь Лионель Месси, Кристиано Роналду. Тэдний өрсөлдөөн, амжилт, дээд амжилтууд хөлбөмбөгийн түүхэнд алтан үсгээр бичигдсэн. Харин одоо хөгжөөн дэмжигчдийн анхаарлыг татаж буй шинэ асуулт бол “Месси болон Роналдугийн хөвгүүд хэзээ нэгэн цагт дэлхийн аваргын талбайд гарах болов уу?” гэсэн асуулт юм.

Хэрэв бүх зүйл төлөвлөсний дагуу өрнөвөл 2030 оны ДАШТ-д хоёр хөлбөмбөгийн хааны хөвгүүдийн нэр дэлхийн аваргын бүрэлдэхүүнд багтах боломж онолын хувьд бий.

Лионел Мессигийн ууган хүү Тьяго Месси 2012 онд төрсөн. 2030 оны дэлхийн аварга болох үед тэр 18 нас хүрсэн байна. Тэр багаасаа хөлбөмбөгийн орчинд өсөж, аавынхаа тоглож байсан клубүүдийн залуучуудын системд бэлтгэл хийж иржээ. Тьяго одоогоор эцгийнхээ нэрийн дарамтыг үүрэхээс илүү өөрийн ур чадвараа хөгжүүлэх шатандаа явж байгаа ч Аргентины шигшээ багийн ирээдүйн тоглогч болох боломжийг үгүйсгэх аргагүй.

Харин Кристиано Роналдугийн ууган хүү Кристиано Роналду Жуниор 2010 онд төрсөн бөгөөд 2030 онд 20 настай байх юм. Тэр багаасаа Реал Мадрид, Ювентус, Манчестер Юнайтед зэрэг аавынхаа тоглож байсан багуудын академийн орчинд хөлбөмбөгийн суурь бэлтгэл эзэмшсэн. Түүний байрлал, тоглолтын хэв маяг нь аавынхаа адил довтлогчийн чиглэлтэй.

Гэхдээ алдартай эцгийн нэр хүүхдэд шигшээ багийн хаалгыг автоматаар нээдэггүй. Хөлбөмбөгийн түүхэнд агуу тоглогчдын хүүхдүүд эцгийнхээ амжилтыг давтаж чадаагүй олон жишээ бий. Авьяас, хөдөлмөр, тоглолтын хөгжил, бэртэл гэмтэл, өрсөлдөөн зэрэг олон хүчин зүйл тэдний ирээдүйг шийднэ.

Харин хөлбөмбөг сонирхогчдын хувьд хамгийн сайхан төсөөлөл бол 2030 оны дэлхийн аваргын талбайд Аргентины өмсгөлтэй Тьяго Месси, Португалийн өмсгөлтэй Криштиану Роналду Жуниор нар тоглож, аавуудынхаа үлдээсэн домгийг үргэлжлүүлэх мөч юм. Месси, Роналду нарын эрин үе дуусах дөхөж байгаа ч тэдний нэр хөлбөмбөгийн талбайд дараагийн үеэр дахин цуурайтах боломж ийнхүү нээлттэй хэвээр байна.

Л.Баяр