Дэлхийн эдийн засгийн форумаас (WEF) гаргадаг “Жендерийн ялгаатай байдлын индекс”-ийн 2025 оны тайланд дэлхийн 148 орныг хамруулахад жендерийн ялгаатай байдал 68.8%-тай гарсан ба энэ хурдаар явбал салбар бүрд хүйсийн тэгш оролцоог хангахад 123 жил шаардлагатай гэж үзжээ.
Дэлхийн хэмжээнд эдийн засгийн оролцоо болон улс төрийн оролцоо нь жендерийн хамгийн их зөрүүтэй хоёр салбар юм.
Эдийн засгийн оролцоо - 61%:
Эмэгтэйчүүдийн эдийн засаг дахь оролцоо өмнөх жилтэй харьцуулахад бага зэрэг өссөн ч бүрэн тэгш байдалд хүрэхэд дахин 135 жил шаардлагатай гэж үзжээ. Эмэгтэйчүүд дэлхийн ажиллах хүчний 41.2%-ийг бүрдүүлж байгаа боловч компаниудын удирдах дээд албан тушаалд дөнгөж 28.8%-ийг эзэлж байна. Мөн технологи болон хиймэл оюун ухааны (AI) салбарт эмэгтэйчүүдийн оролцоо сул байгаа нь ирээдүйн эдийн засгийн тэгш бус байдлыг нэмэгдүүлэх эрсдэл дагуулж буйг онцолжээ.
Улс төрийн эрх мэдэл - 22.9%:
Эмэгтэйчүүдийн оролцоо хамгийн бага хувьтай салбар нь улс төрийн салбар хэвээр байсаар байна. Энэ нь дэлхийн хэмжээнд шийдвэр гаргах, хууль тогтоох дээд түвшинд эмэгтэйчүүдийн дуу хоолой дутмаг байгааг илтгэж буй бөгөөд одоогийн хурдаар эрх тэгш байдалд хүрэхэд хамгийн урт хугацаа буюу 162 жил шаардлагатай гэж үзсэн байна.
Дээрх үр дүнгээс жендерийн тэгш байдлыг хангахын тулд эмэгтэйчүүдийн хөдөлмөр эрхлэлт тэр дундаа удирдах түвшинд ажиллаж буй эмэгтэйчүүдийг дэмжих, тэдний эдийн засагт оруулах хувь нэмрийг нэмэгдүүлэхэд онцгой анхаарах шаардлагатайг харж болно.
Эх сурвалж: www.statista.com
Бизнес эрхлэгч эмэгтэйчүүдэд зориулсан тохирлын тэмдэгт олон улсад
Сүүлийн жилүүдэд олон улсад эмэгтэй бизнес эрхлэгчдийг дэмжихийн тулд тэдний хүргэж буй ажил үйлчилгээний ялгарлыг бий болгох тусгай шошго буюу тохирлын тэмдэгтийг хэрэглээнд нэвтрүүлэн ашиглах болсон. Тохирлын тэмдэгтийг ашиглах хамгийн гол шалгуур нь хувьцаа эзэмшигч болон удирдах албан тушаалтны 51 ба түүнээс дээш хувь нь эмэгтэйчүүд байна гэж заасан байдаг.
Тохирлын тэмдэгт нь бизнес эрхлэгч эмэгтэйчүүдийн бүтээгдэхүүн, үйлчилгээний ялгарлыг бий болгох замаар бизнесийг хөгжүүлэх, дэмжих, тэдэнд тулгарч буй зах зээлийн саад бэрхшээлийг арилгах, эмэгтэй удирдлагатай бизнесийг олон нийтэд таниулах, олон улсад гаргах үүргийг гүйцэтгэдэг. Үүнээс гадна тухайн бүтээгдэхүүн үйлчилгээ нь тодорхой стандарт, журамд нийцэж байгааг давхар илтгэх тул бизнесийг урт хугацаанд, тогтвортой үргэлжлүүлэхэд дэмжлэг болно.
Бизнес эрхлэгч эмэгтэйчүүд тохирлын тэмдэгтийг бүтээгдэхүүн үйлчилгээндээ ашигласнаар хамтын ажиллагаагаа өргөжүүлэх, олон нийтэд танигдах, улмаар борлуулалтаа нэмэгдүүлэх зэрэг олон давуу талыг хүртдэг.
“Women Owned” тохирлын тэмдэгт Монгол Улсад
Харин Голомт банкнаас эмэгтэй бизнес эрхлэгчдийг онцлох “Women Owned” тохирлын тэмдэгтийг 2023 онд Монголын Үндэсний Худалдаа Аж Үйлдвэрийн Танхимтай хамтран Монгол Улсад хэрэглээнд нэвтрүүлсэн.
Бизнес эрхлэгч эмэгтэйчүүд “Women Owned” тохирлын тэмдэгтийг бүтээгдэхүүн үйлчилгээндээ ашигласнаар ямар боломжийг олж авах вэ?
- Хамтын ажиллагаагаа өргөжүүлэх
- Сургалт, чадавхжуулах хөтөлбөр, арга хэмжээнд хамрагдах
- Туршлага солилцох
- Бизнес аялалд оролцох
- Хамтарсан борлуулалтыг дэмжих
- Үзэсгэлэн худалдаанд оролцох
“Women Owned” тохирлын тэмдэгт ашиглах хүсэлтийг тасралтгүй хүлээн авч, шалгуур хангасан бизнесүүдэд тэмдэгтийн гэрчилгээ олгох процесс үргэлжилсээр байна. Эмэгтэй бизнес эрхлэгч та ч бас “Women Owned” бизнесийн эгнээнд нэгдэхийг хүсвэл дараах QR-ийг уншуулж бүртгүүлэх хүсэлтээ илгээгээрэй.
