-
2017 оны 7 сарын 28
Хүндийн өргөлтийн залуучуудын АШТ Непал улсад болж байна.
Энэхүү тэмцээнд Азийн залуучуудын аварга М.Анхцэцэг 75 кг-ийн жинд гурван алтан медаль авч Ази тивийн хошой аварга болжээ. Мөн ОУХМ Э.Билэгсайхан -90 кг-ын жинд нэг алт, 2 мөнгөн медаль хүртэж анх удаагаа Азийн аварга боллоо.
Харин 63 кг-д өрсөлдсөн ОУХМ Г.Ануужин 1 мөнгө, 1 хүрэл медаль хүртсэн бөгөөд ОУХМ Б.Энхтамир шагналт тавдугаар байрт орсон байна. Монголын баг тамирчдыг шигшээ багийн ерөнхий дасгалжуулагч Ц.Хосбаяр дасгалжуулан оролцож байгаа юм.
-
2017 оны 7 сарын 27
Чөлөөт бөхийн залуучууд, насанд хүрэгчдийн дэлхийн аварга, Европын болон Азийн аварга Буриадын нэрт бөх Борис Дугданович Будаевын нэрэмжит залуучуудын (18-20 нас) олон улсын уламжлалт тэмцээн өнөөдөр Улаан-Үд хотод боллоо. Будаевын 60 насны түүхт ойд зориулсан 25 дахь удаагийн тэмцээнд Монгол, БНХАУ, БНСУ, Казахстан, ОХУ-ын Буриад, Забайкаль, Якут, Тува, Дагестан, Кабардино-Балкар, Ставрополь, Кемерово, Красноярск, Хакас, Эрхүү, Нобисибирскийн 112 тамирчин эрэгтэйчүүдийн найман жинд өрсөлдөв. Манай улсаас ОУХМ Ц.Гантөгс, Г.Амархүү нарын удирдлага дор 20 гаруй тамирчин зодоглосноос гурван мөнгө, хоёр хүрэл медаль хүртэв. Тодруулбал, 60 кг-ын жинд “Женко” клубийн тамирчин Батчулууны Баасанням, 66 кг-ын жинд “Арслан” клубийн тамирчин Төмөр-Очирын Тулга, 120 кг-д “Аварга” сургуулийн тамирчин Мөнхтөрийн Лхагвагэрэл мөнгө, 74 кг-д “Хангарьд” спорт хорооны тамирчин Занданбудын Сумъяабазар, 96 кг-д “Аварга” сургуулийн тамирчин Чинбатын Алтангэрэл нар хүрэл медаль хүртлээ. Өсвөр үеийн Азийн аварга ОУХМ Т.Тулга, өсвөр үеийн ДАШТ болон Азийн АШТ-ий мөнгөн медальт З.Сумъяабазар, залуучуудын Азийн АШТ-ий мөнгөн медальт М.Лхагвагэрэл, энэ жилийн залуучуудын улсын аварга Ч.Алтангэрэл нар Будаевын нэрэмжит тэмцээний хошой медальтан болсон бол Б.Баасанням анхны медалиа зүүв.
Борис Будаевын нэрэмжит тэмцээнд түүнтэй нэг жинд мөр зэрэгцэн барилдаж явсан олимпийн хошой, дэлхийн зургаан удаагийн аварга, ОХУ-ын бөхийн холбооны дэд ерөнхийлөгч Арсен Фазаев, “Барселон-1992” олимпийн наадам болон 1993 оны дэлхийн аварга БНСУ-ын Пак Жан Сун, ДАШТ-ий хошой мөнгөн медальт, гавьяат тамирчин Буяндэлгэрийн Болд болон алдарт бөх Иван Ярыгин агсны эхнэр, ОХУ-ын бөхийн холбооны дэд ерөнхийлөгч Наталья Ярыгина, дэлхийн аварга БНСУ-ын Ким Ик Жон тэргүүтэй зочид түүний нэрэмжит тэмцээнд хүрэлцэн ирж хүндэтгэл үзүүлжээ. Гавьяат тамирчин Б.Болд тэмцээний үеэр жингийн анд Будаевт МЧБХ-ны ”Ялалт” одонг гардуулан өгсөн юм.
1993 оноос хойш залуучууд, насанд хүрэгчдийн ангилалд тасралтгүй зохион байгуулагдсан Будаевын нэрэмжит тэмцээнд олимпийн гурав, дэлхийн зургаан удаагийн аварга Бувайсар Сайтиев, түүний дүү олимп, дэлхийн аварга Адам Сайтиев, дэлхийн аварга Махач Муртазалиев, Йоэль Ромеро (Куба), ДАШТ-ий хошой мөнгөн медальт, гавьяат тамирчин Оюунбилэгийн Пүрэвбаатар, ДАШТ-ий мөнгө, хүрэл медальт, гавьяат тамирчин Баяраагийн Наранбаатар, ДАШТ-ий мөнгөн медальт Такахиро Вада (Япон), ДАШТ-ий хүрэл медальт Заур Ботаев нарын шилдгүүд зодоглож байсан юм.
ТЭМЦЭЭНИЙ ДҮН
Хөвгүүдийн 50 кг (8): 1. Базар Батоболотов 2. Барас Шоймполов 3. Зориг Булдаев (бүгд ОХУ, Буриад), Аганак Ондар (Тува)
55 кг (15): 1. Андрей Гатаулин 2. Алдар Мункуев (хоёул ОХУ, Буриад) 3. Антон Якименко (ОХУ, Красноярск), Ербулан Саркытбаев (Казахстан)
60 кг (25): 1. Усман Шахгариев (ОХУ, Красноярск) 2. Батчулууны Баасанням (Монгол) 3. Казырык Сайын (Тува), Нуртилек Эрмекбаев (ОХУ, Красноярск)
66 кг (28): 1. Разамбек Жамалов (ОХУ, Дагестан) 2. Төмөр-Очирын Тулга (Монгол) 3. Рамазан Якубов (ОХУ, Красноярск), Очир Доржиев (ОХУ, Буриад)
74 кг (18): 1. Рустам Магомедов (Ставрополь) 2. Булат Цыренов (ОХУ, Буриад) 3. Занданбудын Занабазар (Монгол), Дмитрий Зайнидинов (ОХУ, Красноярск)
84 кг (5): 1. Азамат Закуев (Кабардино-Балкар) 2. Андрей Елбаскин (ОХУ, Буриад) 3. Юрий Иванов (ОХУ, Эрхүү)
96 кг (8): 1. Юрий Власко 2. Эрдэм Цыренжапов (хоёул ОХУ, Буриад) 3. Чинбатын Алтангэрэл (Монгол), Бат-Эрдэнэ (БНХАУ)
120 кг (5): 1. Магомедамин Дибиров (ОХУ, Дагестан) 2. Мөнхтөрийн Лхагвагэрэл (Монгол) 3. Егор Зубков (ОХУ, Кемерово)
-
2017 оны 7 сарын 27
Чөлөөт бөхийн 2017 оны залууучуудын Дэлхийн аварга шалгаруулах тэмцээн наймдугаар сарын 1-5-нд Финландын Тампере хотод болно. Тус тэмцээнд оролцох Монголын баг тамирчид өнөөдөр эх орноосоо мордлоо. Скандинавын хойгт манай улсаас эрэгтэйчүүдийн 50 кг-ын жинд Н.Насанбуян (Хасу-Мегастарс), 60 кг-д Ц.Цогбадрах (Алдар), 66 кг-д Энхтуяагийн Тэмүүлэн (Хасу-Мегастарс), 84 кг-д М.Цогтгэрэл (Ирээдүйн одод), 125 кг-д Д.Эрдэнэтулга (Аварга), эмэгтэйчүүдийн 44 кг-д Г.Пүрэвсүрэн (Налайх), 48 кг-д Б.Чимгээ (Хангарьд), 55 кг-д Б.Болортуяа (Женко), 59 кг-д Б.Болор-Эрдэнэ (Алдар), 63 кг-д Э.Дэлгэрмаа (Хасу-Мегастарс), 67 кг-д Э.Даваанасан (Алдар), 72 кг-д Б.Цэцэгбаяр (Арслан) гэсэн 12 тамирчин Монгол Улсын гавьяат дасгалжуулагч Т.Сүхбаатар (Женко), спортын мастер Ё.Батдархан (Хасу-Мегастарс), олон улсын нэгдүгээр зэргийн шүүгч Ц.Сэрээтэрийн хамт оролцоно. Монголын бөхчүүдээс залуучуудын дэлхийн аваргад гавьяат тамирчин Адуучийн Баатархүү “Улаанбаатар-1979”, ОУХМ Сүрэнгийн Эрдэнэбаяр “Улаанбаатар-1989”, Төмөрийн Даваахуяг “Бээжин-2007”, гавьяат тамирчин Эрдэнэбатын Бэхбаяр, ОУХМ Эрхэмбаярын Даваачимэг “Паттая-2012”, гавьяат тамирчин Сүхээгийн Цэрэнчимэд “Софи-2013”, ОУХМ Алтанцэцэгийн Батцэцэг “Загреб-2014”-д түрүүлж байв.
-
2017 оны 7 сарын 26
Сонсголын бэрхшээлтэй иргэдийн спортын зуны XXIII олимпийн наадам Туркийн Самсун хотод болж байна. Дөрвөн жил нэг удаа болдог энэ удаагийн наадамд дэлхийн 114 орны 3145 тамирчин спортын 21 төрөлд өрсөлдөж байгаа юм. Чөлөөт бөхийн төрөлд манай улсаас Өвөрхангай аймгийн “Их монголын хүчтэн” дэвжээний дасгалжуулагч Э.Баттүшиг, олимпийн зэрэглэлийн шүүгч Б.Төмөрбаатарын хамт гурван тамирчин оролцсоноос бүгд медаль хүртсэн бахдам амжилттайгаар эх орондоо ирэхээр болж байна. Самсуны дэвжээнд эрэгтэйчүүдийн 57 кг-ын жинд Намдагдоржийн Эрхэмбаяр, 65 кг-д Дорждагвын Чинзориг нар мөнгө, 74 кг-д Ширэндэвийн Батбаатар хүрэл медаль хүртэв. Манай тамирчид Туркэд хэрхэн барилдсаныг хүргэе.
57 кг: Өвөрхангай аймгийн тамирчин Н.Эрхэмбаяр Украины Сергей Сушевскиг 10:0-ээр, Болгарын Панаот Димитровыг 14:3-аар, Казахстаны Нурсултан Дуисембиевийг 16:6-гаар тус бүр оноогоор цэвэр ялж, алтан медалийн төлөөх барилдаанд Ираны Кейван Ростамабадид 15:16-гаар ялагдав. Өнгөрсөн жилийн өсвөр үеийн дэлхийн аварга, 18 настай түүнд дифлимпийн аварга болоход тун ойрхон байлаа.
65 кг: Д.Чинзориг шөвгийн наймд Энэтхэгийн Ажаи Кумарыг 12:8-аар, хагас шигшээд Армений Аргишти Бабаяныг 10:0-ээр ялж, алтан медалийн төлөөх барилдаанд Ираны Хосейн Нуридашлежехэд оноогоор цэвэр ялагдснаар мөнгөн медалийн эзэн болсон юм.
74 кг: Ш.Батбаатар шөвгийн наймд Казахстаны Чингисхан Алдибайевыг 7:3-аар ялж, хагас шигшээд Энэтхэгийн Вирендер Сингхт 4:6-гаар ялагдсан. Харин хүрэл медалийн төлөөх барилдаанд Беларусийн Максим Слапикийг 10:0-ээр ялж, 12 жилийн өмнө буюу 2005 онд Австралийн Мельбурнд болсон дифлимпийн наадмын медалиа ихэрлүүлж хос медальтан боллоо.
Сонирхуулахад, тэднээс өмнө гавьяат тамирчин Бадарчийн Отгонбаяр “Копенгаген-1997”, “Ром-2001”-д хүрэл, Милхаажавын Ганбат “Ром-2001”, Даваанямын Баасандорж “Софи-2013” дифлимпийн наадмаас мөнгөн медаль хүртэж байв.
-
2017 оны 7 сарын 25
Чөлөөт бөхийн залуучууд, насанд хүрэгчдийн дэлхийн аварга, Европ болон Азийн аварга, ЗХУ-ын гавьяат тамирчин Буриадын нэрт бөх Борис Будаевын нэрэмжит залуучуудын олон улсын уламжлалт тэмцээн энэ сарын 27-28-нд Улаан-Үд хотод болно. Түүний 60 насны ойд болж буй 25 дахь удаагийн тэмцээнд Монгол, БНСУ, Казахстан, БНХАУ, ОХУ-ын 150 гаруй тамирчин эрэгтэйчүүдийн найман жинд өрсөлдөх юм. Манай улсаас ҮБТДС-ийн дасгалжуулагч, ОУХМ Ц.Гантөгс, “Хасу-Мегастарс” клубийн дасгалжуулагч ОУХМ Г.Амархүү нарын удирдлага дор эрэгтэйчүүдийн 55 кг-ын жинд Л.Отгонхүү (БТСДуС), 60 кг-д Б.Баасанням (Женко), Б.Мөнхзориг (Сүхбаатар), Ц.Дамдинпүрэв (БТСДуС), 66 кг-д Т.Тулга (Арслан), З.Мөнхтулга (Женко), О.Ганбаяр (БТСДуС), 74 кг-д З.Сумъяабазар (Хангарьд), П,Тэлмэн, Ц.Гэндэн-Яримпил, Н.Жаргалсайхан (бүгд БТСДуС), 96 кг-д Ч.Алтангэрэл (Аварга), Н.Алтанбагана (БТСДуС), 120 кг-д М.Лхагвагэрэл (Аварга) нарын 14 тамирчин оролцохоор өнөөдөр эх орноосоо мордов.
-
2017 оны 7 сарын 24
Мэргэжлийн сумогийн дээд зиндааны 13 дахь өдрийн барилдаанууд өчигдөр болж өндөрлөлөө.
Их аварга Хакухо М.Даваажаргал 12 өдрийн дараа 1047 даваа авч Кайогийн амжилттай тэнцээд байсан бол өчигдөр өрсөлдөгчөө ошитаоши мэхээр ялснаар бүх цаг үеийн түүхэнд хамгийн олон даваа авсан сумоч болсон.
Тэгвэл түүхэн амжилтын эзэн Хакухо М.Даваажаргал өнөөдөр эх орондоо ирнэ. Тэрбээр “Чингис хаан” олон улсын нисэх буудалд 19:30 минутад буух аж.
-
2017 оны 7 сарын 23
Канадын залуу дуучин Жастин Биберийг дэлхий даяар аялан тоглолт хийж буй.
-
2017 оны 7 сарын 23
Турк улсын Самсун хотноо болж буй сонсголын бэрхшээлтэй иргэдийн зуны олимпын XXIII наадам Монголын жүдочид амжилттай оролцож байна.
-
2017 оны 7 сарын 23
Будапешт хотод усан спортын 2017 оны дэлхийн аварга шалгаруулах тэмцээн энэ сарын 30 хүртэл зохион байгуулагдана.
-
2017 оны 7 сарын 23
Мэргэжлийн сүмогийн долдугаар сарын тэмцээн өнөөдөр өндөрлөнө. Башёгийн хамгийн сүүлийн өдөр Их аварга Хакүхо, Харүмафүжи нар хоорондоо оноолт таарчээ.
-
2017 оны 7 сарын 21
Азийн 23 хүртэлх насны АШТ-ий урьдчилсан шатны “H” хэсэгт өрсөлдөж буй Монголын залуучуудын шигшээ баг өнөөдөр хоёр дахь тоглолтоо Индонезитэй хийх гэж байна.
-
2017 оны 7 сарын 21
Монгол-Солонгосын ЕБС-ийн сурагчдын хамтарсан “Өнөд орших-Өнгөлөг агшин” гэрэл зургийн үзэсгэлэн /2017.07.19/ Монголын Уран зургийн галарейд нээлтээ хийлээ. Нээлтийн арга хэмжээнд БСШУС-ын сайд Г.Чулуунбаатар, БСШУСЯ-ны Гадаад хамтын ажиллагааны хэлтсийн дарга Э.Энх-Амгалан нарын холбогдох албаны хүмүүс оролцож, сурагчдын бүтээлийг үзэж, сонирхов. Тус үзэсгэлэнд БНСУ-ын талаас найм, Монгол Улсын талаас 20 сурагч тус тус хамрагдсан юм.
“Гэрэл зургийн анги” хөтөлбөрийг БНСУ-ын Засгийн газар хоорондын хэлэлцээрийн хүрээнд Ази, Номхон далайн орнуудын Олон Улсын боловсролын ойлголцлын төв /АПСЕЮ/-ийн хэрэгжүүлж байна. Тус хөтөлбөр өмнөх жилүүдэд Бангладеш, Иран, Казахстан, Малайз, Турк зэрэг орнуудад амжилттай хэрэгжсэн аж. Харин уг хөтөлбөрийн 15 дахь удаагийнх Монгол оронд хэрэгжиж хоёр улсын ЕБС-ийн сурагчид хамтран оролцлоо.
Хөтөлбөрийн хүрээнд хоёр улсын сурагчид манай орны ёс заншил, аж байдал, соёлоос харилцан суралцахын зэрэгцээ үндэсний их баяр наадмыг үзэж, байгалийн үзэсгэлэнт газраар аялжээ. Улмаар хөтөлбөрийн турш өөрсдийн сурч мэдсэн зүйлдээ тулгуурлан “Өнөд орших-Өнгөлөг агшин” гэрэл зургийн хамтарсан үзэсгэлэнг толилуулсан юм.
-
2017 оны 7 сарын 19
“BRB” , “Монгол ТВ”, “Xyyp”, “Brainstorm”, “Skinny” компани хамтран Монголын шоу арга хэмжээ, парти, хөгжмийн наадмын стандартыг нэг шат ахиулан “XMF-Хуур Music Festival” хөгжмийн наадмыг анх удаа зохион байгуулна.
Монголд өмнө засч байгаагүй хамгийн том, шинэлэг тайз, гайхалтай тод гэрэлтүүлэг, цэвэр хөгжмийн дуугаралт, онцлог орчин болон эмх цэгцтэй зохион байгуулалт үзэгчдийг хүлээж байна.
Хоёр өдөр үргэлжлэх тус шоуны эхний өдөр Монголын шилдгүүд болон гадаадын уран бүтээлчид урилгаар дуулах юм. Хоёр дахь өдөр гадаадын шилдэг залуу DJ нарын тоглолт болно.
Тус фестиваль ирэх сарын 25, 26-нд Төв цэнгэлдэх хүрээлэнд болох бөгөөд тасалбар нь энэ сарын 24-нөөс худалдаанд гарах аж. Энэхүү хөгжмийн наадмыг цаашид жил бүр зохион байгуулахаар төлөвлөжээ.
-
2017 оны 7 сарын 19
Энэ жил 47 дахь жилдээ зохион байгуулагдаж буй Италийн “Giffoni Film Festival”-д монголын хоёр уран сайхны кино оролцож байгаа ажээ. Дэлхийн 100 мянган төлөөлөгчтэй хүүхдийн хамгийн том кино наадам өнгөрөгч ням гаригт /07.16/эхэлж, албан ёсны нээлтээ хийжээ. Уг наадмын нээлтийг Холливиудын алдарт жүжигчин Жулиан Мооре хөтөлсөн байна.
Наадмын 13-15 насны ангилалд өрсөлдөж байгаа “Цагаан хадаг” кино энэ сарын 20-ны өдөр гарах ажээ. Найруулагч Ж.Сэнгэдорж уригдаж, продюсер, зохиолч Т.Номуунзул, гол дүрийн залуу жүжигчин T.Жинжмаа нар мөн оролцох гэнэ. Харин “Чингисийн хүүхдүүд” киноны хувьд энэ сарын 21-нд нээлтээ хийж, бүх насны ангилалд өрсөлдөх гэнэ. Мөн тус киноны найруулагч Д.Золбаяр, зураач Т.Гоош тэргүүтэй уран бүтээлчид оролцох юм байна.
-
2017 оны 7 сарын 17
Чөлөөт бөхийн Испанийн Гранпри тэмцээний хоёр дахь өдөр эмэгтэйчүүдийн найман жингийн барилдаан болж өндөрлөлөө. Мадридын дэвжээнд Монгол Улсын гавьяат дасгалжуулагч Ц.Хосбаярын удирдлага дор манай улсаас хоёр бүсгүй зодоглосноос 63 кг-ын жинд “Алдар” спорт хороо, Үндэсний шигшээ багийн тамирчин ОУХМ Пүрэвдоржийн Орхон Шведийн Йоханссон, АНУ-ын Алексис Портер, Маллори Велт, Болгарын Тайбе Юсейн нарыг ялж ээлжит нэгэн алтан медалиа зүүв. Тэрбээр 2017 он гарснаас хойш тав дахь тэмцээндээ (Тэрбээр он гарснаас хойш насанд хүрэгчдийн УАШТ, Иван Ярыгиний “Алтан Гранпри”, “Монголиа Опен, “Poland Open”-д аваргалаад байсан юм) оролцож бүгдэд нь түрүүлээд байна. Түүнийг одоо сарын дараа Францын нийслэл Парист зохион байгуулдагдах ДАШТ хүлээж байна. Торгон ирэн дээрээ байгаа П.Орхонд Монголын чөлөөт бөх сонирхогчид энэ жилийн Дэлхийн аваргаас өндөр итгэл найдвар хүлээлгэж байгаа. Тэгэхээс ч аргагүй биз ээ.
Түүнчлэн Испанийн нийслэлд 53 кг-д хүч үзсэн “Монголиа Опен-2017” ОУТ-ий аварга, ”Алдар” спорт хороо, Үндэсний шигшээ багийн тамирчин ОУХМ Ганбаатарын Отгонжаргал хүрэл медаль хүртэв. Энэ нь түүний Гранпри ангиллын тэмцээнээс хүртсэн анхны медаль юм.
ЭМЭГТЭЙЧҮҮДИЙН ДҮН:
48 кг: 1. Анжелинка Ветошкина (ОХУ) 2. Миглена Селишка 3. Элица Янкова (хоёул Болгар), Виктория Энтони (АНУ)
53 кг: 1. Жессика Макдональд 2. Жасмин Миан (хоёул Канад) 3. Екатерина Полещук (ОХУ), Ганбаатарын Отгонжаргал (Монгол)
55 кг: 1. Бекка Лезерс (АНУ) 2. Мария Гурова (ОХУ) 3. Рамона Галамбос (Унгар), Билиана Дудова (Болгар)
58 кг: 1. Марва Амри (Тунис) 2. Мишель Фаззари (Канад) 3.Юльяна Тукуренова (ОХУ), Кайла Миракле (АНУ)
60 кг: 1. Любовь Овчарова (ОХУ) 2. Анастасия Григорьева (Латви) 3. Мими Христова (Болгар), Йоханна Маттссон (Швед)
63 кг: 1. Пүрэвдоржийн Орхон (Монгол) 2. Тайбе Юсейн (Болгар) 3. Илана Кратыш (Израиль), Маллори Велт (АНУ)
69 кг: 1. Тамыра Менсах (АНУ) 2. Галина Булатова (ОХУ) 3. Форрест Молинари (АНУ), Эльмира Сыздыкова (Казахстан)
75 кг: 1. Мае Эпп (Эстони) 2. Виктория Франсис (АНУ) 3. Жюстин Дистасио (Канад), Иселин Солхейм (Норвеги)
-
2017 оны 7 сарын 16
“PlayTime 2017” амьд хөгжмийн наадам өнөөдөр /2017.07.16/ өндөрлөнө. Гурав хоног үргэлжилдэг наадмын сүүлчийн өдрийн хөтөлбөрийг хүргэж байна.
Шинэ давалгаа тайз
13.00 MORT EN CRUEX
13.40 THE VIBES
14.20 BAZO
15.00 AFTER TASTE
15.40 BREAK THE CYCLE
PlayTime тайз
18.10 TIDANOMIYUKI
19.00 DAISY & GANG
19.50 THE YOU
20.40 THE FIN.
22.00 HARANGA
Нааглихац тайз
10.00 – 12.00 JIK
12.00 – 13.30 CHINBAA
13.30 – 15.00 TULGA
15.00 – 16.30 TEMUUJIN
16.30 – 18.00 RUSH
18.00 – 23.00 BILIGUUDEI зэрэг хамтлаг, уран бүтээлчид тоголно.
Наадмын үйл ажиллагаа оройн 23.00 цагт дуусах бөгөөд Монголын хүүхдийн ордноос Монголын шилтгээн хооронд үнэгүй автобус цагийн хуваарийн дагуу явж байгаа юм байна.
-
2017 оны 7 сарын 16
Хөвсгөл аймгийн төв Мөрөн хотод энэ сарын 21-нд болох “One world-One Khuvsgul” фестивалийн хүрээнд “Авьяаслаг жуулчин” уралдааныг анх удаа зохион байгуулахаар болжээ. Энэ талаар фествалийн үйл ажиллагааны ерөнхий зохион байгуулагч “Do Re sound” продакшны захирал, Монгол Улсын Урлагийн гавьяат зүтгэлтэн, хөгжмийн зохиолч Т.Сэр-Одоос тодрууллаа.
-
2017 оны 7 сарын 16
Миний орчуулсан “Солиот эх” өгүүллэгээр Х ТҮЦ хамтлаг ижил нэртэй кино бүтээж удахгүй олон түмэнд хүргэх ийм зар гаргасан байх юм. Оюуны бүтээл, оюуны соёлыг эрхэмлэдэг улс оронд бол ийм зүйл цээртэй байтугай цаазтай баймаарсан. “Ингээд л миний нэр байдаггүй юм” гэдэг шиг муу Болдбаатарынхаа нэрийг хасчихсан байгааг харж байна уу?
“Сэрүүн хасын нууц” жүжиг дээр бас л ийм зүйл болсон. Орчуулж олон түмэнд хүргэсэн Болдбаатарын нэр байхгүй Одончимэгийн зохиол мэт олон түмэнд сэтгэгдэл төрүүлээд өнгөрч билээ. Тэрэн дээр би харин эрийн шийр заагаад инээгээд өнгөрч чадсан. Энэ удаа буюу хоёрдахь удаа бол харин ёстой үгүй шүү гэдгийг Х ТҮЦ-ийнхэнд хэлчихье.
“Нохойг зодохдоо эзнийх нь царайг хардаг.” гэсэн нангиадын зүйр цэцэн үг байдаг. Бүтээлийг нь хулгайлахдаа ядаж орчуулагчид нь дуулгачих хүний мөстэй байж сайн уран бүтээл төрөх учиртайсан. Би уг нь адилхан уран бүтээлчид байна уулзаж учир байдлаа ойлголцоё гэж Онон дүүд хэлсэнсэн. Харин өөрсдийг нь бодоод найртай зөөлөн загнасны хариуд ийм маягаар хурдлах гэж шийдсэн бол арай өөр газарт илүү шударга нөхцөлд уулзах учрыг олны өмнө сонордуулсу.
Энэ сайхан өгүүллэгээр хийсэн киног үзэж чадахгүй нь гэж уншигч та битгий халаглаарай. Бид хууль журмынх нь дагуу зохиолчтой нь холбоо бариад монголдоо ижил сэдэвтэй кино бүтээхээр төлөвлөгөө гарган ажиллаж байгааг энэ дашрамд дуулгачихъя. Бид гэдэг маань уран бүтээлд элэгтэй, сэтгэлтэй өөр нэгэн продакшны санаа зорилго нэгтэй залуусыг хэлж байгаа юм.
Орчуулагч Болдбаатар Доржсүрэн
-
2017 оны 7 сарын 16
Чөлөөт бөхийн 2017 оны өсвөр үеийн Азийн аварга шалгаруулах тэмцээн долдугаар сарын 20-23-нд Тайландын нийслэл Бангкокт болно. Хөвгүүдийн 19, охидын 16 дахь удаагийн тэмцээнд оролцох Монголын баг тамирчдын нэрс тодроод байна. Бангкокт хөвгүүдийн 42 кг-ын жинд М.Мөнхтөгөлдөр (Налайх, Голомт) , 46 кг-д П.Мөнх-Эрдэнэ (Баянхонгор), 50 кг-д Н.Наранхүү (Дархан-Уул), 54 кг-д Б.Буянтогтох (БТСДуС), 58 кг-д О.Сүлдхүү (Дархан-Уул), 63 кг-д Э.Бямбадорж (Баянхонгор), 69 кг-д Б.Сундуйжадамба (Өвөрхангай), 76 кг-д Т.Бөхчулуун (Багануур, Хөх Эрчис) хөх, 85 кг-д Э.Батмагнай (Баянхонгор), 100 кг-д Б.Энх-Оргил (Дархан-Уул), охидын 38 кг-д Г.Оюундарь, 40 кг-д Б.Хонгорзул (хоёул Архангай), 43 кг-д Б.Энхзул (Чингэлтэй дүүрэг), 46 кг-д Т.Цээням (Баянхонгор), 49 кг-д Д.Отгонжаргал (Сэлэнгэ), 52 кг-д Б.Хонгорзул, 56 кг-д Ө.Пүрэвсүрэн (хоёул Баянхонгор), 60 кг-д Н.Анударь (Чингэлтэй дүүрэг), 65 кг-д Т.Мянганбаяр (Говийн бөх), 70 кг-д Ц.Хулан (Сэлэнгэ) гэсэн хөвгүүд, охид бүтэн багаараа оролцоно. Дасгалжуулагчаар Ё.Батдархан, Ж.Баярхүү (Хасу-Мегастарс), С.Мөнхдуулдах (Баянхонгор), шүүгчээр олон улсын гуравдугаар зэргийн шүүгч Х.Чойжилжав нар ажиллана.
-
2017 оны 7 сарын 15
Монголын эмэгтэй бөхчүүд өнгөрсөн долоо хоногт Польшийн нийслэл Варшавт олон улсын уламжлалт тэмцээнд оролцож, нэг алт, нэг мөнгөн медаль хүртсэн билээ. Тэгвэл Польшийн нээлттэй тэмцээнд хоёр дахиа түрүүлсэн ОУХМ Пүрэвдоржийн Орхон, 53 кг-д хүч үзсэн ОУХМ Ганбаатарын Отгонжаргал гэсэн “Алдар” спорт хорооны хоёр бүсгүй Монгол Улсын гавьяат дасгалжуулагч Цэрэнбаатарын Хосбаярын хамт Варшаваас Испанийн нийслэлд хөл тавиад байна. Тэд энэ амралтын өдрүүдэд Испанийн Гранприд оролцоод эх орондоо ирэх юм. Сарын дараа Францын нийслэл Парист эхлэх ДАШТ-ий өмнөх насанд хүрэгчдийн сүүлийн тэмцээнд манай эмэгтэй бөхчүүд дөрвөн жилийн өмнө нь оролцож байсан бөгөөд гавьяат тамирчин Очирбатын Бурмаа, ОУХМ Сүндэвийн Бямбацэрэн нар хүрэл медаль хүртэж байв.
