Өнөөдөр 15.00 цагт Улс төр мэдээллийн төвд МАХН-ын дарга Н.Энхбаярын эхнэр О.Цолмон, өмгөөлөгч О.Баасанхүү нар хэвлэлийн хурал хийлээ. О.Цолмон “Хүний эрх гэдэг хуулиас ч дээр байдаг. Хуулийг хүний эрхийг хамгаалахын тулд зохиодог. Харин төрд үйлчилдэг хууль гэж байх ёсгүй. Манай хүнийг яаж баривчилсныг монголчууд харсан. Хүнийхээ эрхийг дээдэлдэг улс хэзээ ч ийм баривчилгааг хийдэггүй. Цагдан хорих 461-р анги руу шилжүүлэх гэж байхад нь би хуулийнхнаас гуйсан. Та бүхэн дахин битгий хүч хэрэглээрэй гэж. Харамсалтай нь тэд миний үгийг хүлээж аваагүй. Дахиад л дамжлаад авч явсан. Би хүнд муугаа үзүүлж, нулимсаа урсгаж, ард түмнээр өрөвдүүлэхийг хүсээгүй. Харин эр нөхрийг минь ингэж аймшигтайгаар тарчилгаж, хууль бусаар хорьж байгаад харамсаж байна. Би өчигдөр орой нөхөртэйгөө уулзсан. Тэгэхдээ чи одоо өөрийгөө бод өлсгөлөнгөө зогсоо гэж гуйсан. Нөхөр маань бүр ярьж чадахгүй болтлоо доройтоод шивнэх төдий л хариу хэлсэн. “Эд нар намайг ингэж дарамталж байгаа юм чинь ард түмнийг минь ямар аймаар дарамталж байгааг би мэдэхгүй. Тиймээс би эцсээ хүртэл тэмцэнэ. Шаардлагуудыг маань биелүүлтэл өлсгөлөнгөө зогсоохгүй” гэж хэлсэн. Би МУ-ын хууль тогтоомж бусад хуулийг шүүж үзэхэд бүгдэд нь л хүний эрхийг дээдэлнэ, хамгаална гэж заасан байна лээ. Харин тэр заалтууд нь миний нөхөрт үйлчлэхгүй байна. Манай хүн хуурай өлсгөлөн зарлаад яг 174 цаг болж байна. Түүний амь нас дээсэн дөрөөн дээр байхад эрх баригчид юу ч хийхгүй зүгээр хараад сууж байна. Хуулийнхан нөхрийг маань алж байна. Цаазалж алж байна. Тэгэхдээ маш удаан хугацаанд тарчилган алж байна” гэлээ.
Б.Чимэг
