Улаанбаатар хотын гэр хорооллыг хөгжүүлэх, хөрөнгө оруулалтыг дэмжих хөтөлбөрийн зураг төсөл, тендер шалгаруулалт ба барилгын ажлын хяналтыг хийх олон улсын зөвлөх үйлчилгээг гүйцэтгэх гэрээний эрхийг авсан БНСУ-ын Dohwa Engineering ба Korea district Heating Corporation-тай байгуулсан гэрээг баталгаажуулах ёслол боллоо.
“Улаанбаатар хотын гэр хорооллыг хөгжүүлэх, хөрөнгө оруулалтыг дэмжих хөтөлбөр” нь Улаанбаатар хотын дунд хэсгийн гэр хороололд хотын үндсэн үйлчилгээ болон нийгэм эдийн засгийн үйлчилгээг сайжруулах Улаанбаатар хотын ерөнхий төлөвлөгөөний хэрэгжилтэнд дэмжлэг үзүүлэх юм.
Хөтөлбөрийн хүрээнд хотын дэд бүтцийн үндсэн салбарууд болох ус хангамж, ариутгах татуурга, дүүргийн халаалт, авто замуудын ажлыг санхүүжүүлэх бөгөөд оршин суугчдын эрэлт хэрэгцээний дагуу нийгэм эдийн засгийн байгууламжид хөрөнгө оруулалт хийх болон дэд бүтцийн үйлчилгээ үзүүлэгч байгууллагуудын үйлчилгээний чанарыг сайжруулах зэрэг ажлууд хийгдэх аж.
Хөрөнгө оруулалтын хөтөлбөр нийт 9 жилийн турш III үе шаттайгаар хэрэгжих ба эхний шатанд Баянхошуу болон Сэлбэ дэд төвүүдэд бүтээн байгуулалтын ажлууд хийгдээр төлөвлөгджээ. Азийн Хөгжлийн Банк, Европын хөрөнгө оруулалтын банкны санхүүжилтийн дэмжлэгтэй хэрэгжиж буй “Улаанбаатар хотын гэр хорооллыг хөгжүүлэх, хөрөнгө оруулалтыг дэмжих хөтөлбөр” төслийн 1-р үе шатны нарийвчилсан зураг төсөл, тендерийн баримт бичгийг бэлтгэх, тендер шалгаруулалт болон барилгын ажлын хяналтыг гүйцэтгэх мөн 2-р үе шатны Техник эдийн засгийн үндэслэлийг боловсруулах үүрэг бүхий Зөвлөх үйлчилгээний олон улсын тендерийг АХБ болон Улаанбаатар хотын захиргаа 2014 онд хамтран зарласан байна.
Тухайн тендерт санал ирүүлсэн нийт 20 гаруй олон улсын болон дотоодын компануудын техникийн болон санхүүгийн саналуудад АХБ болон Улаанбаатар хотын зүгээс олон шатлалт зэрэгцээ хяналт бүхий үнэлгээ хийгдэж дууссан ба БНСУ-ын Дох-ва Инженеринг (Dohwa Engineering Co,ltd) компанийн ахалсан түншлэлд Зөвлөх үйлчилгээний ажлыг гүйцэтгэх гэрээний эрхийг санхүүжүүлэгч талаас эцэслэн олгоод байгаа аж. Тус түншлэлд БНСУ-ын Дулааны шугам сүлжээ корпораци (Korea District Heating Corporation), Монгол улсын Зөвлөх үйлчилгээний Монконсалт, Зураг төслийн Ньюкон зэрэг компанууд багтсан байна.
Улаанбаатар хотыг 1 төвт хотоос олон төвт хот болгох зорилтыг 2013 онд батлагдсан Улаанбаатар хотын Ерөнхий төлөвлөгөөнд тусгасан бөгөөд энэхүү зорилтыг ханган биелүүлэхэд зураг төслийн зөвлөх үйлчилгээ нэн чухал үүрэг гүйцэтгэх аж. Улаанбаатар хотын зүгээс өөрийн хүлээсэн үүргийн хүрээнд газар чөлөөлөх болон нүүлгэн шилжүүлэх ажилд хамрагдах иргэдийг түр суурьшуулах үйлчилгээтэй 50 айлын орон сууцыг Баянхошуу болон Сэлбэ дэд төвүүдэд барьж байгаа ба энэ оны 10 сар гэхэд ашиглалтанд бүрэн оруулахаар ажиллаж байгааг албаны хүн онцоллоо.
Дэд төвүүдийн нарийвчилсан зураг төслийг бэлтгэх ажлын явцад иргэд оршин суугчдын идэвхитэй оролцоо болон дэмжлэг нэн чухал бөгөөд төсөлтэй холбоотой аливаа асуудлаар Төсөл хэрэгжүүлэх нэгжийн 70003098, 70003099 утсаар холбогдож лавлагаа, тодруулга авах болон санал бодлоо хуваалцаж болох юм байна.
