“Эрдэнэс Тавантолгой” ХК-ийн удирдлагууд болоод үйлдвэрчний эвлэлийн гишүүдийн хороонд үл ойлголцол үүсэж, ҮЭ-ийн дарга С.Эрдэнэ эсэргүүцлээ илэрхийлэн өөрийгөө шатаасан хэрэг өнгөрсөн баасан гарагт гарсан.

Тэгвэл Эрдэнэс ТТ-н удирдлагууд өчигдөр /11  дүгээр сарын 14/ өдөр тус компанийн “Эв санааны нэгдэл” Үйлдвэрчний эвлэлийн гишүүд болон ажилчдын төлөөллийг хүлээн авч уулзан, үүсээд буй асуудлын талаар санал солилцож, зарим асуудлыг шийдвэрлэхээр болсон байна.

Тодруулбал, Үйлдвэрчний эвлэлийн гишүүдийн төлөөлөл “Эв санааны нэгдэл” Үйлдвэрчний эвлэлийн дарга С.Эрдэнийн биеийн байдалд анхаарал тавьж, холбогдох бүхий л тусламж дэмжлэгийг компанийн зүгээс үзүүлэх, компани болон Үйлдвэрчний эвлэл хоорондын хамтын гэрээг яаралтай байгуулах, TTJVCO-той байгуулсан гэрээтэй холбоотой зарим заалтыг эргэн харах зэрэг саналыг “Эрдэнэс Таван толгой” ХК-д тавьжээ. 

Уг саналтай холбоотойгоор  “Эрдэнэс Таван толгой” ХК-ийн зүгээс С.Эрдэнийн биеийн байдалд анхаарал тавьж байгаа бөгөөд шаардлагатай эм тариаг эмчийн заавраар хангаж байна. Мөн хамтын гэрээ байгуулах асуудалд хоёр талаас ажлын хэсэг гарган ажиллаж байгаа бөгөөд ойрын хугацаанд асуудлыг эцэслэн шийдвэрлэх болно гэдгээ мэдэгдсэн байна.