АНУ-ын сагсан бөмбөгийн хамгийн алдартай багуудын нэг болох Лос Анжелес Лэйкерс багийг бизнес эрхлэгч, хөрөнгө оруулагч Жош Кушнер болон “Disney”-н гүйцэтгэх захирал асан Боб Айгер тэргүүтэй хөрөнгө оруулагчдын бүлэг 12.5 тэрбум ам.доллараар худалдаж авахаар тохиролцжээ. Энэ нь Хойд Америкийн мэргэжлийн спортын түүхэн дэх хамгийн өндөр үнэтэй багийн наймаа болж байна.

Хэлэлцээрийг одоогоор NBA-ийн Захирлуудын зөвлөл эцэслэн батлах шаардлагатай байгаа бөгөөд мөн Кушнерийн "Thrive Eternal" хөрөнгө оруулалтын бүлгийн шалгалт, нарийвчилсан судалгаа хийгдэх юм. Энэхүү тохиролцоо нь Лэйкерсийн хувьд ердөө нэг жилийн дотор гарч буй хоёр дахь том өмчлөлийн өөрчлөлт юм. Өнгөрсөн онд бизнесмен Марк Уолтер багийн хяналтын хувьцааг Бассийн гэр бүлээс авч, Лэйкерсийг ойролцоогоор 10 тэрбум ам.доллараар үнэлж байсан. Харин одоо 12.5 тэрбум доллараар худалдах тохиролцоонд хүрснээр багийн үнэлгээ богино хугацаанд 2.5 тэрбум доллараар өсөж байна.

Жош Кушнер бол технологийн салбарт хөрөнгө оруулдаг "Thrive Capital" компанийн үүсгэн байгуулагч, удирдах түнш юм. Тэрбээр мөн эрүүл мэндийн даатгалын "Oscar Health" компанийг хамтран байгуулсан бөгөөд NBA-ийн Маими Хит багийн хувьцаа эзэмшигчдийн нэг юм. Кушнер нь АНУ-ын Ерөнхийлөгч асан Дональд Трампын хүргэн Жаред Кушнерийн дүү гэдгээрээ олонд танил.

Харин Боб Айгер нь дэлхийн энтертайнмент салбарын хамгийн нөлөө бүхий удирдлагуудын нэг бөгөөд “Disney” компанийн гүйцэтгэх захирлаар олон жил ажилласан. Тэрээр Лэйкерсийн олон жилийн шүтэн бишрэгч бөгөөд сагсан бөмбөгт дуртай гэдгээрээ алдартай. Айгер өмнө нь Кушнерийн Thrive Capital-д хөрөнгө оруулсан хүмүүсийн нэг байсан юм.

Кушнер, Айгер нар өмнө нь Лас-Вегаст байгуулагдах боломжтой NBA-ийн шинэ багийг авах сонирхолтой байсан. Гэвч NBA-ийн өргөтгөлийг хүлээхийн оронд аль хэдийн тогтсон, дэлхийн хамгийн нэр хүндтэй спортын брэндүүдийн нэг болох Лэйкерсийг шууд худалдаж авах шийдвэр гаргажээ.

Хоёр шинэ эзэмшигч мэдэгдэлдээ Лэйкерсийг “дэлхийн хамгийн алдартай спортын франчайзуудын нэг” хэмээн тодорхойлж, багийн түүх, уламжлалыг хүндэтгэн үргэлжлүүлэхээ илэрхийлсэн байна. Тэдний зорилго нь багийг урт хугацаанд тогтвортой хөгжүүлж, аваргын төлөө өрсөлдөх түвшинд байлгах явдал гэдгээ онцолжээ.

Лэйкерс нь NBA-ийн 17 удаагийн аварга бөгөөд Америкийн мэргэжлийн спортын хамгийн үнэ цэнтэй, дэлхийд хамгийн их танигдсан франчайзуудын нэг юм. Одоогийн багийн гол тоглогч нь Словенийн супер од Лука Дончич юм. Мөн Леброн Жеймс багаас явсан нь шинэ эзэмшигчдийн өмнө багийг дахин бүрдүүлэх томоохон сорилт болж байна. Ийнхүү Лэйкерсийн 12.5 тэрбум ам.долларын худалдаа нь спортын багийн үнэлгээ улам хурдацтай өсөж буйн тод жишээ болж байна. Үүнээс өмнө АНУ-ын мэргэжлийн спортын багийн хамгийн өндөр үнэлгээтэй худалдааны рекорд нь NFL-ийн Seattle Seahawks багтай холбоотой байсан бөгөөд шинэ хэлцэл энэ рекордыг давжээ.

Л.Баяр