Украин Оросын баллистик пуужингийн довтолгоог тогтоон барихын тулд АНУ-ын "Patriot" пуужин-амдан сөнөөгчдийн нөөцийн ердөө 5 хувийг авахад хангалттай гэж Украины Ерөнхийлөгч Володимир Зеленский мэдэгдэв. Тэрбээр CNN-д өгсөн ярилцлагадаа, хэрэв АНУ "Patriot"-ын нөөцийнхөө 10 хувийг Украинд өгвөл Оросын харвасан бүх баллистик пуужинг устгах боломжтой гэж хэлжээ.

     “Энэ жил бидэнд 2025 онтой харьцуулахад амдан сөнөөгч пуужин 2.5 дахин бага байна. Харин Орос сард өмнөхөөсөө хоёр дахин олон баллистик пуужин харваж байна” хэмээн Зеленский ярьсан байна. Түүний хэлснээр Украин одоо өвлийг давж, энгийн иргэдийн амь насыг хамгаалахын тулд АНУ-ын нөөцөөс ердөө 5 хувийг авах шаардлагатай байгаа аж.

“Хэрэв тэд бидэнд 5 хувийг нь зарвал бид өвлийг давж, хүмүүсийн амийг аварна. Харин 10 хувийг өгч чадвал Оросын бүх баллистик пуужинг устгана” гэв. Гэвч Зеленский одоогоор АНУ-ын нөөцөөс өөрт нь ирсэн бодит тусламж ердөө 1 хувьтай байгаа гэж хэлжээ.

“Нэг хувиас таван хувьд хүргэхийн тулд надад хэдэн сар, сая сая утасны дуудлага болон бусад олон зүйл хэрэгтэй байна” хэмээжээ. Мөн Украин холбоотнуудаасаа нэмэлт зэвсэг авахын тулд дипломат болон бусад сувгаар идэвхтэй ажиллаж байгаа ч зарим үйл ажиллагаагаа олон нийтэд дэлгэрэнгүй хэлж чадахгүй гэдгээ Зеленский онцолжээ.

Украины "Patriot" пуужингийн хомсдол нь АНУ болон Израилын хооронд Ирантай хийсэн дайны дараа улам хурцадсан. Учир нь Ойрх Дорнодод баллистик пуужин болон нисгэгчгүй төхөөрөмжүүдийн довтолгооноос хамгаалахын тулд АНУ, холбоотнууд "Patriot" системийн их хэмжээний амдан сөнөөгч пуужин ашигласан нь Украинд нийлүүлэх нөөцөд нөлөөлсөн нь гарцаагүй. Баллистик пуужингууд нь маш өндөр хурдтай, огцом траектороор нисдэг тул энгийн далавчит пуужин болон дроноос хамгаалахад илүү төвөгтэй байдаг.

Зеленский мөн Орос сүүлийн үед Киев рүү долоо хоногт ойролцоогоор нэг удаа нүсэр хэмжээний пуужингийн цохилт өгч байгаа бөгөөд Украин агаарын довтолгооноос хамгаалах пуужингийн хомсдолд орсны улмаас нөхцөл байдал улам хүндэрч байгааг онцолжээ. Зарим довтолгооны үеэр Украин Оросын харвасан баллистик пуужингийн аль нэгийг ч тосон сөнөөж чадаагүй тохиолдол гарсан байна.

Украины Агаарын цэргийн хүчин наймдугаар сарын 12-нд Оросын баллистик пуужингийн довтолгооны талаарх нарийвчилсан статистик мэдээллийг цаашид нийтлэхээ зогсоохоо мэдэгдсэн байна.

Л.Баяр