Дорнод аймагт газрын тосны олборлолт явагдаж эхэлсэн үеэс Хятад иргэдийн хууль бус үйлдлүүдийн тухай олон зүйл яригдаж, тэр хэмжээний үйлдэл гарах болов. Хэд хоногийн өмнө УИХ-ын гишүүн асан П.Алтангэрэл нарыг машинаараа хааж, бичлэг хийсэн Хятад иргэний тухай цахим ертөнцөд тархсан бичлэг олны дургүйцлийг хүргэсэн. Монгол хүний өмнөөс хазгай муруй аялгуугаар “Манай газар” гэж хэлсэн нь бүр ч ноцтой. Эндээс улбаалан хөөвөөс үйл явдал Дорнод аймагт ноосны үйлдвэр баригдаж буйтай холбоотой байжээ.
Хэрлэн сумын Засаг даргын А/74 дугаар захирамжаар иргэн Ж.Насанбуян хөдөө аж ахуйн үйлдвэрлэлийн чиглэлээр буюу ноосны үйлдвэр барихаар Хэрлэн сумын тавдугаар багийн нутагт 11200 м2 газар авсан байна. Гэхдээ барилгаа зөвшөөрөлгүй эхэлжээ. Улаанбаатарт эрх мэдэлтнүүд Зайсангийн аманд аялал, жуулчлал хөгжүүлэх зориулалтаар газрын зөвшөөрөл аваад тансаг зэрэглэлийн орон сууц, хаус барьдагтай агаар нэг үйл явдал болсон гэлтэй. Дорнод аймгийн Мэргэжлийн хяналтын газраас хийсэн шалгалтаар барилгын ажлын зураггүй, барилга эхлүүлэх, үргэлжлүүлэх зөвшөөрөлгүйгээр барилга угсралтын ажлыг хийсэн, Газрын тухай хууль, Барилгын тухай хуулийг удаа дараалан ноцтой зөрчсөн нь илэрчээ.
Засаг даргын захирамжийг Дээд шүүх хүчингүй болгожээ
Дорнод аймгийн Засаг дарга М.Бадамсүрэн газар эзэмшүүлсэн шийдвэрээ хүчингүй болгож, газрыг чөлөөлөх арга хэмжээг авч, хариу ирүүлэхийг Хэрлэн сумын Засаг дарга П.Мөнхтөрд даалгажээ. Иргэн Ж.Насанбуянгийн эл үйлдэл нэг бус удаагийнх биш юм байна. 2015 онд Чойбалсан хотын төвийн нэгдүгээр бүсэд худалдаа үйлчилгээний зориулалтаар газар эзэмшиж байхдаа хууль зөрчин барилга угсралтын ажил явуулж байсныг аймгийн Засаг даргын захирамжаар үйл ажиллагааг нь зогсоож байжээ. Харин Ж.Насанбуянгийн газар эзэмших эрхийг нь цуцалсан Дорнод аймгийн Засаг даргын шийдвэрийг Улсын дээд шүүх хүчингүй болгожээ. Улсын дээд шүүхийн тогтоолд Иргэн Ж.Насанбуян, Ө.Одхүү нарын хамтран эзэмшиж буй 1170 м2 газрын тусгай зөвшөөрлийг хүчингүй болгосон аймгийн Засаг даргын захирамж Ж.Насанбуянгийн эрх, хууль ёсны ашиг сонирхлыг зөрчсөн гэжээ.
Ноосны үйлдвэрийг хятадуудын хөрөнгө оруулалтаар барьсан бололтой. Ямартаа ч Дорнод аймгийн Засаг дарга М.Бадамсүрэн цаашид хуулиар хүлээсэн эрх, үүргийнхээ дагуу холбогдох арга хэмжээг авч ажиллахыг тухайн асуудлыг хариуцсан албан тушаалтнуудад даалгасан байна.
Сэтгэгдэл (2)