Парламентад олонхийн суудалтай, төр, засгийн эрх мэдлийг гартаа төвлөрүүлсэн МАН-ын Бага хурал болох сургаар нийслэлийн МАН-ын хорооны даргыг сонгох тухай асуудал ам дамжин яригдаж байна. Олон ч хүний нэр сошиалаар гүйж яваа. Өчигдрөөс эхлэн бор шувуудын элдэв жиргээ, нүүр номын хуудсаар уралдах нэрс олны анхаарлыг аргагүй татаж эхлэв.

Жиргээг тэргүүлэх эгнээнд гишүүдийн нэр дурайна. Тодруулбал, сайд Д.Сумъяабазар, гишүүн Х.Нямбаатар нар МАН-ын нийслэлийн хорооны дарга болох тухай мэдээлэл байлаа. Бүр нэг тал болчихсон тууж яваа гэх нь чих дэлсэв. Намын дарга сонгох үеэр хоёул нэр дэвшиж, санал хураалтын өмнө сайд нэрээ татах тактик хэрэглэнэ гэх яриа ч дэлгэгдсэн нь бий. Тэгвэл энэ талаар Х.Нямбаатар гишүүнээс тодруулсан юм.

-Таныг нийслэлийн намын даргад нэрээ дэвшүүлэх тухай бор шувууд жиргээд эхэллээ?

-Тийм санаа огт алга. Өчигдрөөс эхлээд л сошиалд ийм зүйл бичээд байна. Учрыг ойлгохгүй юм.

-Гэхдээ дэвших тодорхой болсон гээд л бичсэн харагдсан?

-Яагаад ийм цуурхал тараагаад байгааг нь сайн мэдэхгүй юм. Тийм юм байхгүй.

-Яах аргагүй таныг нэр дэвшинэ гээд байна?

-Миний нэрийг сошиал дээр бичээд, нэр дэвшинэ гээд гүтгэж байна. Олон нийтэд хандаж хэлэхэд би нийслэлийн намын даргад өрсөлдөхгүй ээ. Миний хувьд УИХ-ын гишүүний хувьд хийх ажил их байна. Түүнийгээ хийж хэрэгжүүлэхийн төлөө л явна.

-Нийслэлийн намын хороог Улаанбаатар хотын дарга удирдах заалт намын дүрэмд бий юу?

-Ийм заалт намын дүрэмд байхгүй.

Дээрх хариултыг эрхэм түшээ өглөө. Магадгүй нийслэлийн намыг удирдан зохион байгуулах хүнийг тодруулах тэр үед асуудал ямар байдлаар эргэх нь одоогоор тодорхойгүй. Магадгүй намын нөхөд итгэл үзүүлэн дэвшүүлэхээр боллоо гээд л гараад ирж болох. Тиймээс бор шувуудын жиргээ хэр бодиттой байсан нь тухайн үед харагдах биз ээ.