УИХ-ын өнөөдрийн чуулганаар ҮХЦ-ийн гишүүнд нэр дэвшигчдийн томилгоог хэлэлцлээ. Ерөнхийлөгчийн зүгээс Монгол Улсын Үндсэн хуулийн цэцийн гишүүн Д.Наранчимэгийн оронд Б.Буяндэлгэрийг, Н.Жанцангийн оронд Г.Туулхүүг, Т.Лхагваагийн оронд Ц.Нанзаддоржийг томилох саналаа УИХ-д хүргүүлсэн байдаг. Уг асуудлыг хэлэлцэж, 98.4 хувийн саналаар Б.Буяндэлгэр, Г.Туулхүү, Ц.Нанзаддорж нарыг дэмжин томиллоо. 

ҮХЦ-ийн гишүүнээр томилогдсон гишүүдийн намтарыг хүргэж байна. 

Б.Буяндэлгэр нь хуульч мэргэжилтэй, 

•  1978 онд Дорнод аймгийн төвийн 10 жилийн 1 дүгээр сургууль
• 1984 онд  ЗХУ-ын  Эрхүү  хотын  Улсын Их сургуулийг хуульч мэргэжлээр төгссөн. Хууль зүйн ухааны магистр

АЖИЛЛАСАН БАЙДАЛ:

• 1984-1989 онд Дорнод аймгийн Ардын Депутатуудын Хурлын Гүйцэтгэх захиргааны
• -Зохион зааварлах хэлтэст референт
• -Хуулийн хэлтэст ахлах зөвлөх-кодификаторч
• -Хууль зүй, арбитрийн хэлтэст ахлах арбитрч
• -Хуулийн хэлтсийн дарга
• 1989-1991 онд Дорнод аймгийн Хувьсгалт Залуучуудын Эвлэлийн Хорооны дарга
• 1991-1993 онд Дорнод аймгийн Залуучуудын Холбооны тэргүүн
• 1993-2008 онд “Нугын гол” ХХК-ийн захирал
• 2008-2012 онд УИХ-ын Тамгын Газрын Судалгаа, шинжилгээ, олон нийттэй харилцах хэлтэст ахлах референт
• 2012-2015 онд “CGM” ХХК-ийн менежер
• 2015 оноос “Дорнын тал экологи” ХХК-ийн захирал

Ц.Нанзаддорж нь 2012 онд Төрийн өмчийн хорооны даргаар ажиллаж байсан. 

Г.Туулхүү нь Шүүхийн шийдвэр гүйцэтгэх ерөнхий газрын дэд даргаар ажиллаж буй.  Хурандаа Г.Туулхүүгийн хувьд 2014 оноос хойш Шүүхийн шийдвэр гүйцэтгэх ерөнхий газрын дэд даргаар томилогдон ажиллаж байгаа юм.  МУИС-ийг эрхзүйч мэргэжлээр дүүргэсэн. Тэрээр Гаалийн ерөнхий газар, Дархан-Уул аймгийн шүүхэд ажиллаж байжээ. Мөн ШШГЕГ-ын Хяналт шалгалт, дотоод аудитын газрын даргаар ажиллаж байжээ.

Ингээд чуулганы үеэр хэлсэн гишүүдийн үгийг хүргэж байна. 

УИХ-ын гишүүн Н.Оюундарь "Шинээр томилогдож байгаа гишүүд маань энэ чөлөөлөгдөж байгаа хуульч нараасаа үлгэр жишээ авч сайн ажиллаарай. Үндсэн хуулийн өөрчлөлт ярьж байгаа энэ цаг үед чөлөөлөгдөж байгаа хүмүүсийнхээ мэдлэг чадвар, туршлагаас сайн суралцаарай. Төрийн албанд 30-40 жил ажиллачихсан туршлагатай хүмүүс томилогдож байгаа гэж харж байна. Улстөржилгүй сайн ажиллаарай гэж захимаар байна"

УИХ-ын гишүүн, ХЗДХ-ийн сайд Ц.Нямдорж "Томилогдож байгаа хүмүүст амжилт хүсье. Үндсэн хуулийн гишүүнд томилогдож байгаа хүмүүс мэргэшсэн байх ёстой гэж заасан байдаг юм. Энэ бол их утга учиртай үг. Лам хуваргаар ярьвал гэгээрсэн хүмүүс байна аа гэж заасан юм шиг байна. Анхны дарга нь Сувд багш байлаа. Тэгээд Жанцан, Амарсанаа гээд монголын том хуульчид байлаа. Үндсэн хуулийн цэц бол том хуульчдын ном хурах газар байдаг. Тэгэж байж шударга шийдвэр гарна. Үүнд хүрэх хэцүү. Тиймээс энэ том хуульчдын зиндаанд хүрч ажиллах хэрэгтэй. Өнгө мөнгөний хорвоо боллоо. Зөв шийдвэрээ гаргах хэрэгтэй.  Үндсэн хуулиа л битгий зарж идээрэй. Үүнийг л захимаар байна. Тал талаас чинь янз бүрийн шахалт ирнэ. Айлган сүрдүүлэх, дарамтлах, худалдах гээд элдэв арга хэрэглэнэ. Санаанд нь хүрсэн шийдвэр гараагүй цэцийн гишүүдийг угтаж доромжлох дарамт ирнэ. Сүүлийн үед төрийн албан хаагчдын зүрхийг үхүүлэх ажиллагааг бүлэглэлүүд их хийдэг болсон. Тиймээс энэ айдас, дарамтад орохгүй ажиллаарай гэж захимаар байна. Үндсэн хуулийн шийдвэрийг шүүх хэрэгсэхгүй болдог болж байгаа шүү. Ингэж л өнгө мөнгөнд худалдагдаж байгаа шүү. Тиймээс үүний эсрэг баттай зогсоорой гэж хэлмээр байна. 

УИХ-ын гишүүн Д.Оюунхорол "Цэцэд нэр дэвшиж байгаа гишүүдийг дэмжиж байна. Үндсэн хуулийн манаач болсон цэцийн гишүүд үүргээ сайн гүйцэтгэж байсан. Чөлөөлөгдөж байгаа хүмүүстэй талархал илэрхийлэе. Үнэхээр том лидерүүд, хуулийн салбарын том багш нар байсан. Үнэхээр мэдлэг, чадвартай хүмүүс байсан. Энэ жишгийг дагаж ажиллах байх гэж бодож байна. Цэцийн гишүүдийг дэмжиж байна" гэв. 

УИХ-ын гишүүн Ц.Гарамжав "Шинээр томилогдож байгаа гишүүд шударга сайн ажиллах хэрэгтэй. Томилогдох гэж байгаа Г.Туулхүү та ШШГЕГ-т ажиллаж байсан, гүйцэтгэх ажиллагаа явуулж байсан туршлагатай хүн. Гэхдээ та хууль бус үйлдэл хийж, хууль бусын талд орж байсан удаатай. Тиймээс одоо томилогдвол шударга ажиллараарай. Шударга үнэний гэрч болж ажиллаарай гэж хүсье"