АТГ-ын Мөрдөн шалгах хэлтсийн дарга, эрхэлсэн комиссар Э.Идэрцог өнөөдөр сэтгүүлчдэд мэдээлэл хийхдээ урьдчилан хориг 461 дүгээр ангид хоригдож байгаа С.Баярыг мөрдөн шалгах явцдаа айлган дарамталсан зүйл огт гараагүй гэлээ. Тэрээр сэтгүүлчдийн асуултад ингэж хариулсан байна.

- АТГ-ын дарга Х.Энхжаргал С.Баярыг өрөөндөө дуудан шалгах эрх зүйн үндэслэл бий юу?

-Оюутолгойн гэрээний асуудлаар шалгагдаж байгаа нэр бүхий хүмүүсийг шүүгчийн захирамжаар цагдан хорьж шалгаж байгаа. Хорих үндэслэлийн тухайд  прокурор санал гаргаж, шүүх саналыг хүлээн авч үндэслэлтэй гэж үзэн, шүүгчийн захирамж гарснаар цагдан хорьсон. Хорих үндэслэлийн асуудал дээр шүүхийн шийдвэрээр явагдаж байгаа учир хэн нэгэн хөндлөнгийн тайлбар хэлэх боломжгүй. Хоригдож буй сэжигтэн яллагдагч нарыг Эрүүгийн хэргийг хянан шийдвэрлэх тухай хуульд зааснаар мөрдөн шалгах ажиллагаа, байцаалт гэх мэт тодорхой үйл ажиллагааг прокурорын хяналт дор явуулдаг. Энэ ажиллагааны хүрээнд цагдан хорих таслан сэргийлэх арга хэмжээ авсан. Энэ ажиллагааны хүрээнд тавдугаар сарын 03-ны  өдөр Ерөнхий сайд асан С.Баярыг цагдан хорих 461-р ангиас авчирч өмгөөлөгчийг байлцуулан  байцаалт авсан.

- АТГ-ын дарга Х.Энхжаргал С.Баярыг өрөөндөө байцаасан гэсэн мэдээлэл яваад байгаа шүү дээ. Энэ асуудлаар тайлбар өгөхгүй юу?

-АТГ-ын даргын тухайд Авлигын эсрэг тухай хуулийн 23.1.7-т заасны дагуу гүйцэтгэх хэргийг мөрдөн байцаах, танилцах эрхтэй. Энэ эрхийн хүрээнд шалгагдаж байгаа хэрэгтэй танилцах, үүрэг чиглэл өгөх эрх нь нээлттэй. Энэ эрхийн хүрээнд тухайн яллагдагч хүсэлт гаргасан тохиолдолд хүлээж авч уулзах энэ ажиллагаа ямар нэгэн хууль зөрчсөн ажиллагаа болоогүй. ОНЗ-өөс мэдээлсэн шиг С.Баярыг дарамталсан, айлган сүрдүүлсэн тийм арга хэмжээ болоогүй. Прокурорын зөвшөөрөлтэй хийсэн ажиллагаа гэлээ.