Актлагдсан вагон оруулж ирсэн талаарх дуулиан сүүлийн өдрүүдэд ил болоод байгаа. Зам тээврийн хөгжлийн сайд Ж.Бат-Эрдэнэ энэ талаар байр сууриа хэвлэлээр илэрхийлэхдээ, “Нийтдээ 1000 вагон оруулж ирэхээр гэрээ хийгдсэн байна лээ. Энэ харилцааг зохицуулсан сайдын журам бий. Сайдын журамд насжилтын тоог тодорхой хязгаарт бариулах асуудлыг тусгаж өгсөн байдаг. Тэр тооноос насжилт нь өндөр вагон орж ирсэн байна лээ. Энэ нь сайдынхаа журмыг зөрчсөн байна. Тухайн үед сайд журамд өөрчлөлт оруулах саналаа Хууль зүй, дотоод хэргийн яам руу явуулсан юм билээ. Өөрчлөх хүсэлтээ явуулсныхаа дараа вагонуудаа оруулаад ирчихсэн байгаа юм. Харин ХЗДХЯ-наас зөвшөөрөөгүй, буцаагдсан юм билээ. Тэгэхээр яалт ч үгүй сайдынхаа журмыг зөрчсөн шийдвэр болчихсон байгаа юм” гээд “Энэ нь дэд сайдын хийсэн ажил гэхээсээ илүү тухайн үеийнх нь сайдын шийдвэр. Удирдамжийг сайд шууд байдлаар төлөөлдөг. Төрийн өмч гэдэг утгаараа сайд нь нэг ёсондоо хувь эзэмшигч болчихдог. Тиймээс сайд л бүх удирдамжийг өгнө. Сайдын өгсөн үүрэг даалгавар, удирдамжийн дагуу дэд сайд ажиллах учиртай” гэсэн байсан.
Тэгвэл энэ асуудалд нэр холбогдоод байгаа сайд асан Д.Ганбат Ж.Бат-Эрдэнэ сайдыг хэвлэлээр байр сууриа илэрхийлмэгц яаран хэвлэлд хандсан байсан юм. Тэрбээр бүх бурууг хамтран ажиллаж байсан дэд сайд руугаа тохож, “арьсаа хамгаалсан” юм. Тухайлбал тэрээр, “Миний өгсөн үүргийн дагуу вагон оруулж ирэх асуудлыг хөөцөлдсөн нь үнэн. Актлаад, металл лоом болгох шахсан вагон оруулж ирснийг нь би саяхан л мэдлээ. Миний өгсөн үүрэг чиглэлийг буруугаар ашигласан байна гэж би ойлгож байгаа. Миний өгсөн үүргийг маш муухайгаар ашиглаж, далимдуулж, шууд хармаагаа зузаатгах бизнес болгоод хаячихаж” гэсэн байв.
С.Нацаг
Сэтгэгдэл (16)