Ерөнхий сайд, МАН-ын дарга У.Хүрэлсүх улс төрийн хүрээнд байсхийгээд л нударга зөрүүлж дуулиан тарьдаг нэгэн. Нэгэнтээ тэрбээр, намынхаа ерөнхий нарийн бичгийн дарга байхдаа УИХ-ын гишүүн Э.Мөнх-Очиртой намын байрандаа нударга зөрүүлэн олны хэл амны бай болж байв. Намын бүлгийн дэд даргаар Ж.Энхбаяр гишүүнийг томилуулахаар улайрсныг Э.Мөнх-Очир эсэргүүцсэнээс уг зодоон үүссэн гэдэг. Тэр бол У.Хүрэлсүх МАН-ын генсек, Баянзүрх дүүргийн Засаг дарга асан Э.Мөнх-Очир гишүүн болоод удаагүй 2009 он байв. Дараахан нь У.Хүрэлсүх гишүүний тангаргаа өргөөд сар гаруйхны дараа УИХ-ын чуулганы хүлээлгийн танхимд УИХ-ын гишүүн Г.Баярсайханыг заамдан унагаж бүүр их шуугиан дэгдээж байв. Тэрбээр, УИХ-ын чуулганы хуралдаан дээр С.Эрдэнэ гишүүнтэй маргалдах үед нь Г.Баярсайхан гишүүн хажуугаас нь олон үг хэлсэн хэмээн адилхан бүрэн эрхтэй УИХ-ын гишүүнийг цохин унагааснаа тайлбарлаж байсан. Үүний дараа УИХ-ын гишүүн Г.Баярсайхан хуулийн байгууллагад хандана хэмээн шаралхсан ч У.Хүрэлсүх УИХ-ын гишүүнээсээ чөлөөлөгдөх хүсэлт гаргаж чөлөөлөгдсөнөөр уг асуудал нам жим болсон.
Харин Ерөнхий сайд У.Хүрэлсүхийн улс төрийн бас нэгэн дуулианд нударга хоёр гуравхан хоногийн өмнө болжээ. Энэ удаа түүнтэй сөргөөцөлдөж, нударга зөрүүлсэн хүн нь УИХ-ын гишүүн Н.Номтойбаяр ажээ. Тэд ширүүн маргалдаан эцэст нь нударга зөрүүлснээр өндөрлөжээ. Тэр үед намын нөхөд нь тэдэнтэй хамт байсан ажээ.
С.Нацаг
Сэтгэгдэл (21)