Засгийн газрын тохируулагч агентлаг Үндэсний хөгжлийн газар хариуцагчаар оролцох шүүх хуралдаан өнөөдөр Захиргааны хэргийн шүүхэд болно. Үндэсний хөгжлийн газрыг 2017 оны арваннэгдүгээр сард зарласан тендертэй холбогдуулан “Нүхт тур” компани шүүхэд өгөөд байгаа билээ. “Нүхт тур” компани бол 2009 оноос МИАТ-д катерингийн үйлчилгээ ирүүлж ирсэн бөгөөд анх гэрээ байгуулахдаа хоёр жилээр л гэрээ байгуулж байсан гэдэг. Дараа нь катерингийн үйлчилгээ авах нээлттэй олон улсын тендер зарлахад тус компани оролцоогүй ч шүүхийн шийдвэрээр үйлчилгээгээ МИАТ-д үргэлжлүүлэн хүргэж ирсэн компани билээ. 2014 онд ингэж МИАТ болон Төрийн өмчийн хороотой заргалдаж өөрийн талд шийдвэр гаргуулж байсан “Нүхт тур”-ынхны энэ удаагийн нэхэмжлэх мөн л тендер зарласан Үндэсний хөгжлийн газрын эсрэг байсан юм. Тус газар Хөшигийн хөндийд “Зорчигчийн хоол бэлтгэх зориулалт бүхий Катерингийн барилга барьж, үйлчилгээ үзүүлэх төсөл” нэртэй концессийн тендер зарласан боловч “Нүхт тур”-ынхан ямар нэгэн тендергүйгээр энэ концессийн ажлыг өөрсдөө хийх эрхтйэ хэмээн нэхэмжлэх гаргаад байгаа юм. Энэ бол хэвлэл мэдээллийн хэрэгслүүдээр нэгэнт гарсан, ил болсон мэдээлэл. Харин хамгийн сонирхолтой нь энэ хэргийг хянан шийдвэрлэх Захиргааны хэргийн шүүхийн шүүгч нь Н.Дуламсүрэн. Тэр бол 2014 онд “Нүхт тур”-ынхан МИАТ-ын эсрэг зарга үүсгэж байхад тус компанид өмгөөллийн үйлчилгээ үзүүлж байсан нэгэн. Нэгэн цагт өмгөөлж явсан компанийхаа нэхэмжлэлтэй хэргийг шүүх гэж байгаа нь Н.Дуламсүрэн шүүгчийг ашиг сонирхлын зөрчилтэй гэдгийн бэлхэн жишээ биш гэж үү? Захиргааны хэргийг хянан шийдвэрлэх тухай хуульд зааснаар “хэргийн оролцогчтой хувийн харилцаатай, эсхүл уг хэргийг шударгаар шийдвэрлэж чадах эсэх талаар үндэслэл бүхий эргэлзээ байвал”, бас “ашиг сонирхлын зөрчил үүсэж болзошгүй нөхцөл байдал бий болсон” бол шүүгч өөрөө татгалзан гарах үүрэгтэй. Хууль үнэхээр үйлчилдэг нь үнэн бол өнөөдрийн шүүх хуралдаанаас Н.Дуламсүрэн шүүгч өөрөө татгалзан гарах биз ээ. Учир нь тэрбээр дээр хэлсэнчлэн 2013-2015 онд “Нүхт тур”-ын өмгөөлөгчөөр ажилласан шүү дээ.
Дашрамд дурдахад Захиргааны хэргийн анхан шатны шүүхийн шүүгч Н.Дуламсүрэн нь 1990-1999 онд Сүхбаатар аймгийн Давж заалдах шатны шүүхэд шүүгч, 1999-2004 онд Улсын Дээд шүүхийн Иргэний хэргийн танхимд шүүгчийн туслах-шинжээч, 2004-2007 онд Нийслэлийн Захиргааны хэргийн шүүхэд шүүгч, 2010-2013 онд Монгол газар ХХК-д ахлах хуульч, 2013-2015 оны зургадугаар сар хүртэл Монголын өмгөөлөгчдийн холбооны гишүүн, өмгөөлөгч, 2015 оны зургадугаар сарын 24-ний өдрөөс эхлэн Монгол Улсын Ерөнхийлөгчийн 108 дугаар зарлигаар Нийслэл дэх захиргааны хэргийн анхан шатны шүүхийн шүүгчээр томилогдон ажиллаж байгаа ажээ.
Б.Номин
Сэтгэгдэл (18)