2018 оны аравдугаар сарын 15-н буюу өчигдөр 11.00 цагт Сүхбаатар дүүргийн 15 дугаар хорооны нутаг дэвсгэрт залилах гэмт хэрэгт холбогдон эрэн сурвалжлагдаж байсан Б.Энхбаяр, түүнтэй хамт явсан Т.Лундаа нар “Тоёота прадо” маркийн автомашинтай явж байгаад цагдаагийн алба хаагчид баригдах үедээ зугтаж, түүнийг чирч унаган биед нь хүнд гэмтэл учруулаад хэргийн газрын орхин зугтсан хэрэг гарсан. Гэмт этгээдүүдийг өчигдөр орой эрэн сурвалжилж баривчилсан. 

Цагдаагийн алба хаагчийг гэмт этгээдүүд 5 км орчим машинд чирэгдсэнээс болж тархиндаа болон биедээ хүнд гэмтэл авчээ. Гэмтсэн цагдаагийн алба хаагч өнөөдөр 10.00 цагт ГССҮТ-д хагалгаанд орж, 12.55 цагт хагалгаа амжилттай болсон. Гэвч цагдаагийн алба хаагч хагалгааны дараа биеийн байдал нь хүндрэн нас баржээ. 

"Эмнэлгийн байгууллагаас бүхий л арга хэмжээ авсан боловч харамсалтай нь алба хаагчийн маань биеийн байдал маш хүнд байсан учир аварч чадсангүй" хэмээн ЦЕГ-ын Хэвлэл мэдээллийн төвийн дарга Б.Баатархүү хэллээ.

Эх сурвалжийн хэлж буйгаар амиа алдсан цагдаагийн алба хаагч тэтгэвэртээ гарахаар материалаа өгсөн байсан гэнэ.