Өдрийг гэртээ ганцаараа өнгөрүүлдэг ахмадууд өдрийг идэвхтэй, үр бүтээлтэй, хөдөлгөөнтэй, ханьтай өнгөрөөхийг хүсэвч энэ чиглэлээр үйл ажиллагаа явуулдаг байгууллага дутмаг байдаг. Тэгвэл өнгөрсөн долдугаар сараас үйл ажиллагаа явуулж эхэлсэн Инами Медикал Монгол ХХК-иас ахмадад чиглэсэн өдөр өнжүүлэх төвийг нээжээ. Энэ талаар өнөөдрийн сурвалжилгаараа хүргэе.
Уг компани нь Монголд анх удаа буюу Япон маягийн ахмадын өдөр өнжүүлэх үйлчилгээг нэвтрүүлж байгаагаараа онцлогтой. Компани зүгээс ахмадуудад хоорондоо танилцан дотносож, харилцан бие биенээ дэмжин хөгжүүлэх, эрүүл мэндээ хянаж, хөдөлгөөний дутагдалд орохоос урьдчилан сэргийлэх орчныг бүрдүүлжээ.
UBH-д байрлах энэ төв одоогоор таваас зургаан ахмад тогтмол ирдэг гэнэ. Мөн Японд улсад энэ чиглэлээр олон жил ажилласан, ахмадуудтай харьцаад сурчихсан туршлагатай сувилагчийг урьж ажиллуулж байгаа юм байна. Энд янз бүрийн автомат тоглоомоос гадна ахмадуудын сайн мэдэх уламжлалт тоглоомууд ч харагдлаа. Төвийг яг л өөрийн гэр нь мэт тохижуулсан бөгөөд энэ нь ахмадуудад илүү тохитой байх шиг.
Ахмадууд өглөөний есөн цагаас оройны таван цаг хүртэл автомат болон хөзөр, даам зэрэг тоглоомуудаас сонгож тоглохоос гадна япон тоглоом, цаасан урлал, цай ундаа ууж, дасгал хөдөлгөөн хийдэг хэмээн төвийнхөн ярьж байлаа.
Уг өнжүүлэх төвийн үйлчлүүлэгч “Би өглөө есөн цагт ирсэн. Өглөө охин маань доод талын гражид хүргэж ирэхээр сувилагч нар маань тэндээс угтаж авдаг. Өглөө бүр даралтаа үзүүлдэг, дараа нь өглөөний цайгаа уугаад дасгал хөдөлгөөнөө хийдэг. Энд хамрагдсанаас хойш өдөр хоног мэдэгдэх юмгүй өнгөрч байна. Үеийн ахмадуудтайгаа хөзөр даам тоглоод ярьж хөөрөөд өдрийг ханьтай өнгөрүүлэх юм. Сувилагч нар хөл гар хучаад их сайхан зантай хүмүүс дээ” хэмээн хуучлав.
Ахмадын өдөр өнжүүлэх төвийнхний зорилго нь “Энд ирээд сэргэлэн цовоо болдог”, “Нэг өдөр хормын дотор өнгөрдөг” гэх зэрэг сэтгэл хангалуун байсан үгийг сонсох гэдгийг дурдлаа.
Инами Медикал Монгол ХХК-ын гүйцэтгэх захирал Н.Батжаргал “Би Монголдоо хууль эрхзүйн мэргэжлийг эзэмшсэн. Манай эгч Япон нөхөртэй Японд амьдардаг. Нөхөр нь Монголд бизнесийн үйл ажиллагаа, соёлыг суртчилах чиглэлээр олон үйл ажиллагаа хийж байсан. Тухайлбал Монгол Японы соёл, эдийн засгийн нийгэмлэглэгийг Монголд байгуулсан түүнийхээ хүрээнд олон ажил хийсэн. Тиймээс энэ талд хамтарч ажиллахаар болсон. Өөрөөр хэлбэл ахмадын өдөр өнжүүлэх асархуй чиглэлээр Японд мэргэжилтэн сургах тэр чиглэл рүү санал тавьсан” хэмээн хуучлав.
Тэрбээр мөн цаашдын зорилгын талаараа “Төлөвлөж байгаа олон ажил бий. Хамгийн түрүүнд ахмадуудыг гэрээс нь аваад буцааж гэрт нь хүргэж өгдөг үйлчилгээг нэвтрүүлснээр арай олон ахмадууд хамрагдах боломжтой байгаа. Мөн сэргээн засах чиглэлийн мэргэжилтэн авчраад тэр чиглэлийн үйлчилгээ, кабинеттэй болсноор илүү үр дүнтэй болох боломжтой” гэв.
Түүнээс энэ чиглэлээр үйл ажиллагаа явуулахад ямар хүндрэл тулгарч байгааг асуухад тэрбээр “Гадны хөрөнгө оруулалттай гэдэг утгаараа санхүүгийн тал дээр гайгүй боловч бид бизнесээ бодоод үнэ гаргах гэхлээр ахмадууд хамрагдаж чадахгүй гэдэг үндэслэлээр бага үнэ гаргасан. Ашгийн төлөө биш, урсгал зардлаа нөхөх зорилгоор л ахмадууддаа үйлчилж байна. Энэ тал төрөөс дэмжээд өгөх юм бол үйл ажиллагаагаа өргөтгөж, чанаржуулах болно” гэв.
Тус төвөөс өөрөө биеэ даагаад ариун цэврийн өрөө, хоолоо идчихдэг, дасгал хөдөлгөөнөө хийчихдэг ахмадуудыг хүлээж авч байгаа бөгөөд үнийн хувьд өдрийн хоолтой нь нэг сарын /ажлын өдрүүдэд/ 200 мянган төгрөг, өдрийн хоолгүй, ахмадууд гэрээсээ хоолоо аваад ирвэл сарын 160 мянган төгрөг болох ажээ.
Манай улсад 270 гаруй мянган ахмад настан бий. Төрөөс энэ чиглэлээр тэдэнд хүрсэн, олон улсын стандартад нийцсэн үйлчилгээ байхгүй гэхэд хилсдэхгүй болов уу. Энэ чиглэлээр үйл ажиллагаа явуулж буй хувийн хэвшлээ дэмжээд өгөх юм бол илүү олон ахмадууд нийгмийн харилцаанд идэвхтэй оролцож, цагийг илүү хөгжөөнтэй өнгөрүүлэх зэрэг олон давуу талтай, ихээхэн олзуурхууштай санагдав.
Р.Хишигжаргал
Сэтгэгдэл (3)