"Мэргэжлийн сэтгүүл зүй ба дижитал эрин үе” сэдэвт хэвлэлийн ёс зүйн хоёрдугаар форум Шангри-Ла зочид буудалд зохион байгуулагдаж байна.
Олон улсын ёс зүйн өдрүүдийн хүрээнд Хэвлэл Мэдээллийн Зөвлөлөөс Сэтгүүлзүйн ёс зүйн форумыг хоёрдахь жилдээ зохион байгуулж байгаа юм. Тус форум нь дижитал эрин үеийн нөлөөгөөр мэргэжлийн сэтгүүл зүйд тулгарч байгаа асуудал, бэрхшээл, түүнийг даван туулах арга замуудын талаар нийтээрээ хэлэлцэж, олон улсын сайн туршлагуудыг сонсох ихээхэн ач холбогдолтой.
Хүмүүнлэгийн ухааны их сургуулийн Мэдээлэл харилцааны менежмэнтийн сургуулийн захирал Д.Дагиймаа “Технологийн дэвшлийн ачаар гурван саяулаа сэтгүүлч болсон гэж бид яриад байгаа. Үр дүнд нь ардчилалд заналхийлэх сөрөг үр дагавар бас гарч байгаа. Мөн уламжлалт сэтгүүл зүйн ирээдүйд өөрчлөлт орсон. Технологийн дэвшлээс үүдэж олон мэргэжил устаж үгүй болно гэдэг. Гэхдээ олон судлаач нэг дуугаар контент бүтээдэг оюуны үйлдвэрлэл устахгүй гэж хариулдаг. Өөрөөр хэлбэл мультимедиа сэтгүүлч мэргэжил устахгүй” гэв.
МУБИС-ийн Нийгэм, хүмүүнлэгийн сургуулийн захирал, доктор, профессор Ж.Батбаатар “Дижитал эрин үе бол хэвлэл мэдээллийн байгууллагын хувьд цунами. Цунамид өртөхгүйн тулд мод тарьдаг болохоос агуйд нуугддаггүй. Сэтгүүлчид ээ, сэрцгээ. Ажлаа хийцгээ. Өнөөдөр сошиал медиагаас ялгарахын тулд сэтгүүлч, хэвлэл мэдээллийн байгууллагууд юу хийж байна вэ. Ялгаралаа бий болгох модоо тарьцгаа. Залуучуудыг сонин уншиж, радио сонсдоггүй гэж буруутгаж болохгүй. Тэднийг татах, уншуулахын тулд сошиалаас ялгарч юу хийсэн билээ редакциуд” хэмээн ярив.
Asia mining journal сэтгүүлийн эрхлэгч С.Болд-Эрдэнэ “Австралийн сэтгүүлчид “Бидэнд ажил байна. Бүр их мэдээллийг маш сайн багцалж, ойлгомжтой хүргэх ажил байна. Тэр мэдээллийг иргэд худалдаж авах хүсэлтэй, эрэлт нь байна. Нэмүү өртөг шингэсэн мэдээллийг зарах ажил байна” гэж байсан. Тэгэхээр сэтгүүлчид салбар бүрээр дагнан мэргэшиж, технологийн дэвшлүүдийг эзэмшиж, өөрсдөө тогтмол хөгжиж байх хэрэгтэй. Түрүүн хэлсэнчлэн сошиал медиагаас ялгарахын тулд сэтгүүлчид өөрсдөө хөгжих шаардлагатай тулж байна. Үүний цаана хэвлэл мэдээллийн байгууллагын хариуцлага, цалин зэрэг асуудал тавигдана” гэв.
Артаньян буюу Д.Түмэн-Өлзий “Сэтгүүлчид сошиалаас жийрхдэг байсан. Гэхдээ хэвлэл мэдээллийн байгууллагууд контентоо фэйсбүүкээр л давхар түгээж байна. Сошиалынхан сэтгүүлчдээс агуулгын хувьд ч, хурдны хувьд ч зарим тохиолдолд илүү байна. Мэдээж сайн контентууд гарч байгааг үгүйсгэхгүй. Мэргэжлийн сэтгүүл зүй, фэйсбүүкчин хоёрын хооронд том ялгаа бий. Сэтгүүлчид олон жил сурсан мэдлэг боловсролоо гаргаж байх хэрэгтэй байна. Мэдээллийг ингэж бэлтгэдэг юм гэдгээ харуулах хэрэгтэй. Гал гарлаа гэдэг мэдээг фэйсбүүкчин постоллоо гэхэд тэрийг агуулгын хувьд нэг их ялгаагүйгээр мэдээг сайтууд нийтэлдэг. Яагаад агуулгаа баяжуулаад мэдээлж болдоггүй юм” хэмээн ярьсан юм.
Р.Хишигжаргал