Үндэсний их баяр наадмын бөхийн барилдаан ес давж, Монгол Улсын аварга цол хүртсэн Э.Оюунболдоос дөрвөн төрлийн бодис илэрсэн талаарх мэдээллийн дагуу Дархан аварга Б.Бат-Эрдэнээс тодрууллаа.

-Дэлхийн допингийн эсрэг агентлагаас Э.Оюунболдоос дөрвөн төрлийн бодис илэрсэн гэж мэдээлж байна. Та шавьтайгаа холбоо барьсан уу?

-Би өмнө нь уг асуудлаар мэдээлэл өгч байсан. Мөн дараа нь өөртэй нь утсаар ярьсан. Өөртэй их итгэлтэй байна лээ. “Багшаа би тийм төрлийн бодис огт хэрэглээгүй шүү. Надад итгээрэй. Хууль хяналтын байгууллагад гомдлоо өгсөн. Баяр наадмын өмнө чамайг ямар ч байсан допингтой хутгана гэж заналхийлж байсан. Түрүүлсний дараа 1.7 тэрбум төгрөгөөр төрийн баяр наадмыг худалдаж авсан гэж гүжирдсэн” гэсэн. Сүүлд хэвлэл мэдээллийн хэрэгслүүдийг харсан чинь тийм асуудал үнэхээр яригдсан юм билээ. Янз бүрийн асуудлаар хүнийг худал гүжирдэх, гүтгэх нь байж болохгүй асуудал, Тиймээс үүнийг шалгадаг газар нь шалгаж тогтоох байх. Хоёрдугаарт, допинг хэрэглэсэн тохиолдолд олон улсад ч хүлээлгэх хууль, журамтай.  Манай улс ч хуулиар тогтоосон байдаг. Энэ журмаар л тогтоох ёстой.

-Одоогоор өргөдөл, гомдол гаргаагүй байгаа юм биш үү?

-Миний ойлгосноор хууль хяналтын байгууллагад гомдол, саналаа гаргачихсан.  Ер нь сүүлийн үед допингийн шинжилгээ авахад төвөгтэй болсон юм шиг байгаад байдаг юм. Уг нь сүр болоод байх ч эд биш. Баяр наадмаар хууль гараад 2002 оноос хойш шинжилгээ авдаг болсон. Би 2006 он хүртэл Улсын баяр наадамд шөвгөрсөн. Тэр үед мэдэгдэхээр ямар нэгэн зүйл болж байгаагүй юм шиг санагдаж байна.

Олон улсын лабораторид шинжлүүлсэн шинжилгээ буруу гарах үндэсгүй. Учир нь олон улсад бүсчлээд байгуулагдсан итгэмжлэгдсэн байгуулалга шүү дээ.

-Бөхчүүд допинг хэрэглэсэн нь баригдахаас хойш яагаад хэрэглээд байдаг юм бол. Аргалж ирсэн, аргалсаар ирсэн ийм зүйл байгаад байна уу?

-Сүүлийн үеийн допинг авч байгаа шинжилгээг би мэдэхгүй байна.

-Допинг хэрэглэсэн шинжилгээг дарсан тохиолдлыг мэдэх үү?

-Мэдэхгүй. 

Б.Лхам