Кристофер Ноланы найруулсан "Одиссей" кино дэлхийн кино театруудад асар амжилттай үргэлжилж, нээлтээ хийснээс хойш хоёр дахь долоо хоногтоо дэлхийн хэмжээнд ойролцоогоор 639.6 сая ам.долларын орлого олжээ. Кино Хойд Америкийн зах зээлд хоёр дахь долоо хоногтоо 87 сая ам.доллар цуглуулсан нь эхний долоо хоногийн орлоготой харьцуулахад ердөө 30 орчим хувиар буурсан үзүүлэлт юм. Энэ нь Ноланы найруулсан кинонуудын дундаас хоёр дахь долоо хоногийн хамгийн өндөр орлого болж байна.

«Одиссей» кино нээлтийн амралтын өдрөөрөө Хойд Америкт 123.5 сая ам.доллар, дэлхийн хэмжээнд нийт 264 сая ам.доллар олсон юм. Ингэснээр тус бүтээл 2026 оны хамгийн амжилттай нээлт хийсэн кинонуудын нэг болж, үзэгчдийн хүлээлт, IMAX форматын эрэлт өндөр байгааг харуулсан.

Нийт орлогын 286.3 сая ам.доллар нь АНУ, Канадын зах зээлээс, харин 128.3 сая ам.доллар нь олон улсын зах зээлээс бүрдсэн байна. Үүний зэрэгцээ IMAX үзвэрүүд дангаараа киноны нийт орлогод асар их хувь нэмэр оруулж, IMAX-аас 48 сая ам.доллар олжээ.

Киноны үйлдвэрлэлийн төсөв ойролцоогоор 250 сая ам.доллар гэж мэдээлэгдэж байгаа бөгөөд одоогийн орлогын хурдаар «Одиссей» ашигтай бүтээл болох замдаа хэдийнэ орсон байна. Зарим шинжээч уг кино цаашдын үзвэр, олон улсын зах зээл болон IMAX-ийн өндөр тасалбарын орлогын ачаар 1 тэрбум ам.долларын босгыг давах боломжтой гэж үзэж байна.

Ийнхүү Гомерын эртний туульсын сэдвийг орчин үеийн кино урлагийн хамгийн том хэмжээний бүтээл болгон дэлгэцнээ амилуулсан Ноланы «Одиссей» кино зөвхөн уран сайхны бүтээл төдийгүй 2026 оны кино зах зээлийн хамгийн том үзэгдлүүдийн нэг болж байна.

Л.Баяр