Дэлхийн хамгийн олон үзэгчтэй, нэр хүндтэй тэмцээний нэг 69 дэх удаагийн “Дэлхийн мисс”-ийн тэмцээнд М.Цэвэлмаа эх орноо төлөөлөн оролцохоор шалгараад буй. Түүнд “Дэлхийн мисс”-ийг шимтэн үздэг үзэгч олон итгэл тээж байгаа юм. Сүүлийн жилүүдэд манай улсын миссүүд уг тэмцээнд сайн оролцох болсон нь үүний илрэл. Тодруулбал, "Miss World 2016" тэмцээний үндэсний ялагч А.Баярцэцэг “People’s choice” номинацын ялагчаар тодорч, шилдэг 11-т шалгарч байсан бол мисс Ц.Энхжин шилдэг 15-д шалгарч чамлашгүй амжилт гаргаж байсан билээ. Ингээд “Дэлхийн мисс 2019” тэмцээнд оролцохоор шалгарсан М.Цэвэлмаагаас зарим зүйлийг тодрууллаа.
-Юуны өмнө "Дэлхийн мисс" тэмцээнд оролцох эрхтэй болсонд баяр хүргэе. Манай уншигчдад өөрийгөө танилцуулна уу. М.Цэвэлмаа гэж чухам хэн бэ?
-Баярлалаа. Би 1996 оны арваннэгдүгээр сарын 28-нд Улаанбаатар хотод төрсөн. 2013 онд Анагаахын лицей сургуулийг онц дүнтэй төгсөж байсан юм. Эмчийн мэргэжил миний багын мөрөөдөл байсан учраас үргэлжлүүлэн АШУҮИС-д Хүний их эмч мэргэжлээр суралцаж, энэ хавар төгссөн. Одоо мэдрэлийн их эмчээр мэргэжлээ дээшлүүлж байгаа. Эрүүл мэндийн салбарын чиглэлийн хүн болохоор ч тэр үү иог, бясалгах хийх, ном унших их дуртай. Бусадтай их нээлттэй харилцдаг. Ийм л хүн дээ/инээв/.
-Тэмцээний хамгийн гол хэсэг нь хэр хүмүүнлэг мисс бэ гэдэг шалгуур гэдэг. Та хүмүүнлэгийн ажил хэр их хийдэг бэ?
-Би хоёрдугаар курсээсээ хүмүүнлэгийн ажилд идэвхтэй оролцож ирсэн. Ингэхдээ ерөнхий боловсролын сургуулийн сурагчдад эрүүл мэндийн боловсрол олгох, өрхийн эмнэлгүүдэд ханын цаас хийж өгөх зэргийг хийдэг байсан. Өнгөрсөн онд хүмүүнлэгийн “МАА” санг эмээгийнхээ дурсгалд зориулж байгуулж байлаа. Энэ хүрээнд сайн дурын үйл ажиллагаа хийдэг “Мy club”-тэй хамтран Богд хааны музей орчмыг цэвэрлэж, мод тарих зэрэг ажлыг тогтмол хийдэг. Би чөлөөт цагаараа байгалийн гаралтай саван хийдэг. Сонирхлынхоо дагуу саван хийж орлогоор нь хүчилтөрөгчийн аппарат, эмнэлэгт яаралтай тусламжийн үед хэрэгтэй хэрэглэгдэхүүнүүдтэй хамт Өвөрхангай аймгийн бүсийн оношилогооны эмнэлэгт бэлэглэсэн.
Харин “Дэлхийн мисс”-ийн тэмцээний хүмүүнлэгийн ажил нь олон хүнийг хамарсан, улсын хэмжээнд давалгаа үүсгэсэн, үр дүн хүрсэн ажил байх ёстой байхыг шаарддаг. Тиймээс мэргэжлийнхээ онцлогийг гаргаж, хавдрын эсрэг аянг зохион байгуулъя гэж бодож байна. Учир нь манай улсад өдөрт 16 хүн хорт хавдраар оношлогдож, 12 хүн нас бардаг. Манай улсын хувьд гамшгийн хэмжээний асуудал. Мөн өнгөрсөн жил эмээгээ хавдрын улмаас алдаж байсан юм. Хавдраар өвчилж, хорвоог орхиж байгаа мянга мянган хүн, түүний ар гэрийн төлөө энэ ажлыг хийхээр шийдсэн.
Эмчийн мэргэжил нь өөрөө байнгын хүмүүнлэгийн үйл ажиллагаа хийдэг мэргэжил. Миний мэргэжлийн онцлог миссийн тэмцээний гол зорилготой уялдаж байгаа. Миссийн тэмцээний гол зорилго нь нийгэмд хүмүүнлэгийн үйл ажиллагаа хийж, сайн сайхныг сурталчлах зорилготой байдаг. Түүнээс хувцас өмсөөд алхахдаа биш. Эмч мэргэжилтэй миссүүд их цөөн байдаг. Мэргэжлийнхээ онцлогийг гаргаж хүмүүнлэгийн ажилдаа түлхүү анхаарна гэж бодож байна.
-“Дэлхийн мисс”-д оролцоно гэдэг нэг талаар нэр хүндтэй боловч маш их хариуцлага шаардана. Бэлтгэлээ хэр хангаж байна вэ?
-Нарийн дэс дараалалтай байхын тулд төлөвлөгөө гаргах шаардлагатай. Энэ долоо хоногт хийх ажлынхаа хүрээнд бүх газруудтайгаа уулзаж төлөвлөгөөгөө гаргасан. Ирэх долоо хоногоос албан ёсоор бэлтгэлдээ гарна. Хажуугаар нь англи хэлнийхээ бэлтгэлийг сайн хийнэ. Өмнөх жилүүдийн миссүүд хувийн бэлтгэлээ сайн хангаж, төлөвлөгөөтэй ажиллаарай гэж зөвлөсөн.
-Даашинзаа хаана урлуулж байгаа вэ?
-Энэ жил би өөрөө даашинзаа зохион бүтээж, загвараа гаргана. Учир нь энэ удаагийн тэмцээнд даашинз урлуулах эрх ирээгүй. Тиймээс өөрийнхөө санааг шингээх боломж гарч ирж байна гэж ойлгож байна. өмнөх жилүүдтэй давхцахгүй, шинэлэг санааг гаргахыг хичээнэ гэж бодож байна. Үндэсний хувцас, даашинзаа загвар зохион бүтээгчидтэй зөвлөж загвараа гаргана.
-Танд амжилт хүсье.
-Баярлалаа.
Б.Лхам
