Эрүүл мэндийн тухай хуульд нэмэлт, өөрчлөлт оруулах тухай хуулийн төслийг УИХ-ын чуулганаар хэлэлцлээ. Энэ үеэр Хавдар судлалын үндэсний төвийн захирал, доктор Ж.Чинбүрэн “Хорт хавдарын эсрэг тэнцвэргүй тулаанд хамт оролцож буй та бүхэнд баярлалаа. Яагаад тэнцвэргүй гэдгийг та бүхэн ойлгох байх. Нийт онош тогтоолгосон иргэдийн 80 хувь нь хавдрын хожуу үедээ оношлогдож байна. Илрүүлэх тогтолцоог эрчимжүүлэхийг дэмжиж байгаад баяртай байна. Өвчилсөн хойно нь бус өвчлөхөөс нь сэргийлдэг урьдчилан сэргийлэх арга хэмжээ авдаг тогтолцоо бий болгох нь зөв алхам. Түүнчлэн Хавдар судлалын үндэсний төвийн байрыг өргөтгөж өгөхийг хүсэе. Бидэнд бүрэн боломж бий. Учир нь эрт илрүүлгээр хавдартай иргэдийн илрүүлэг нэмэгдэнэ. Ингэхээр эмнэлгийн ачаалал нэмэгдэнэ. Тиймээс өргөтгөл хийхээс өөр аргагүй. Ямар нэг бизнесийн болон улс төрийн ашиг сонирхол харалгүйгээр үүнийг хийгээсэй гэж хүсмээр байна" гэлээ.

Харин Эрүүл мэндийн сайд Д.Сарангэрэл “Эрүүл мэндийн салбарт үргэлж анхаарч байхад УИХ-ын гишүүддээ баярлалаа. Б.Бат-Эрдэнэ гишүүн лобби бүлэг байгуулах замаар ХСҮТ-д туслах аяныг эхлүүлж байсан. Бусад гишүүд маань ч хорт хавдартай тэмцэхэд гар бие оролцож байна. Ерөнхий боловсролын сургуулиудад эрүүл мэндийн сургалт таван жилийн хугацаанд зогссон байсныг эргэж сэргээсэн. 2018 онд 2,8 тэрбум төгрөгийг улсын төсөвт тусгасан. Энэ мөнгөөр эрүүл мэндийн салбарт шинэчлэл хийхэд зарцуулсан” гэсэн юм.

Г.Нацаг