Эрүүгийн цагдаагийн албаны Эдийн засгийн гэмт хэрэгтэй тэмцэх газрын ажилтнууд бусдаас их хэмжээний ам.доллар, евро залилж, мөнгө угаасан гэмт хэргийг илрүүлж,  гэмт үйлдлийг нь таслан зогсоож, шалгаж эхэлсэн юм. Тэгвэл уг хэргийн мөрдөн шалгах ажиллагаа дуусаж, яллах дүгнэлт үйлдэн прокурот шилжүүлсний дагуу прокуророос хэргийг шүүхэд шилжүүлжээ. Тодруулбал, Нигерь улсын нэр бүхий хоёр иргэн 2018 оны зургадугаар сараас арванхоёрдугаар сарын хооронд аж ахуйн нэгж байгуулах нэрийдлээр 3.6 тэрбум төгрөгтэй тэнцэх хэмжээний ам.доллар, евро залилж, мөнгө угаасан байна. Ингэхдээ нэр бүхий Монгол Улсын иргэдтэй хамтрах байдлаар гадаадын компаниудын и-мэйл хаягийг хакердаж, аж ахуйн нэгжийн харилцагч компани руу нь “барааны төлбөр хүлээн авах данс өөрчлөгдсөн тул энэ данс руу төлбөрөө төлнө үү” гэсэн захидал илгээдэг байжээ. Залилсан мөнгөө хүлээж авахын тулд өөрсдийнхөө нэр дээр гадаадын төлбөр хүлээн авах компанитай ижил нэртэй аж ахуйн нэгж байгуулсан болох нь баримтаар нотлогдсон байна.

Мөнгө угааж, бусдыг залилсан Негирь улсын иргэдэд холбогдох хэргийг ийнхүү шүүхэд шилжүүллээ. Эрүүгийн хэрэг хянан шийдвэрлэх тухай хуульд зааснаар прокуророос шүүхэд шилжсэн хэргийн 14 хоногийн дотор багтаан шүүх хурлыг товыг зарлах эс бөгөөс прокурорт буцаах шийдвэрийг шүүхээс гаргах ёстой. Гэхдээ энэ хугацааг дахин 30 хүртэлх хоногоор сунгах эрх шүүх байгууллагад бий. Хэрвээ ийн сунгасан бол энэ хугацаанд багтан шүүхийн урьдчилсан хэлэлцүүлгийг хийж, прокурорт буцаах эсвэл шүүх хурлын товыг зарлаж, 14 хоногийн дотор шүүх хурлыг хийх ёстой гэсэн хуулийн заалттай юм.  

Г.Эрдэнэ