НИТХ-ын ээлжит хурал өчигдөр болж, энэ оны төсвийн гүйцэтгэлийн талаар хэлэлцсэн. Энэ үеэр НИТХ-ын төлөөлөгчид газрын маргааны асуудлыг онцлон тэмдэглэж байлаа.  Ингээд үүнтэй холбоотой зарим асуудлаар НИТХ-ын төлөөлөгч Н.Батсүмбэрэлтэй ярилцсанаа хүргэе.

-Үндэсний соёл амралтын хүрээлэнгийн газрын асуудлыг хөндөж ярьж байгаа төлөөлөгчдийн нэг нь та. Хүүхдийн паркийн ихэнх газарт барилга байгууламж барьсан талаар иргэд ихээхэн шүүмжлэлтэй ханддаг. Паркийн зарим газрыг буцаан авах боломжтой гэж та харж байна уу?

-Хүүхдийн паркийн асуудлаар мэдээлэл авахаар нийслэлийн Газрын албанд хандсан. Өнөөдөр нийслэл 1.5 сая хүн амтай. Нийслэлд ганцхан байдаг Үндэсний соёл амралтын хүрээлэн өмнө нь нэлээд том газартай байсан юм байна лээ. Одоо газрынх нь нэгээхэн хэсэгт л хэдэн тоглоом байна. Бусад талбайг нь ашигладаггүй эсвэл өөр зориулалтаар барилга байгууламж барьсан байна. Энэ асуудлыг судалж ИТХ дээр танилцуулна. Одоогийн байдлаар судалгааны түвшинд явж байна.

-Судалгаа ямар шатандаа явж байна вэ?   

-Газрын албанаас хараахан мэдээлэл ирээгүй байна. Хүүхдийн паркийн үйлчилгээ, ногоон байгууламж талаас нь нэмэгдүүлэх ёстой. Мөн эндэхийн газраас олгохдоо хууль зөрчсөн эсэх, хэн газар авсан, хэний эзэмшилийн барилга бий талаар ил тод зарлана. Үүний дараа хуулийн хүрээнд явагдаагүй бол газрыг буцааж авч, хүүхэд багачуудад зориулсан Хүүхдийн парк барих, нэмэгдүүлэх асуудлыг хөндөнө.

-Хууль бус  асуудал илэрвэл газрыг буцааж авна гэж та баттай хэлж чадах уу. Ер нь Хүүхдийн паркийн газрын асуудал маргаан дагуулаад удаж байна шүү дээ?

-Хотын даргын захирамжаар Сүхбаатарын талбайн урд хэсгээс нэлээд газрыг цуцалсан шийдвэр гаргалаа. Хүүхдийн паркийн газартай холбоотой асуудлыг эхлээд судлах ёстой.

-Нийслэлд сургууль, цэцэрлэг барих болохоор газар олддоггүй. Байгалийн түүхийн музейн барилгыг дахин барих гэхэд газрын асуудал нь шийдэгдэхгүй явсаар удааширсан. Ингэхээр газар олдохгүйдээ биш асуудлын гол нь Газрын албаны эрх бүхий албан тушаалтнуудад байна гэж та харж байна уу?

-Иргэдийн зүгээс газрын маргаантай холбоотой асуудлаар маш их гомдол санал хэлж байна. Ялангуяа, газрын асуудлаар мэдээлэл ил тод биш байна. Тухайлбал, иргэн хуулийн дагуу дүүргийн Засаг даргын захирамжаар автал хотын дарга нь хэн нэгэнд өгчихсөн байдаг ч юм уу. Эсвэл өөр тусгай хэрэгцээний бүсэд хамаарчихсан байдаг ч юм уу. Эдгээр тохиолдолд газар авсан иргэн хохирчихож байгаа юм. Тиймээс мэдээллээ ил тод байлгаач гэсэн мэдээллийг тавьж байна. Ер нь газрын байцаагч иргэдийн дунд хамгийн том эрх мэдэлтэй хүн шүү дээ. Хаана сул газар байгаа, хэн тухайн газрыг авсныг мэддэг. Тэр хүн бусадтай хуваалцахгүй байгаа учраас иргэд хардах эрхтэй. Иргэдээс сонгогдсон төлөөлөгчийн хувьд ч би хардах эрхтэй. Тиймээс энэ асуудлыг та нар цэгцэл. Болж бүтэхгүй асуудал байвал хуулийн байгууллагад шалгуул гэдэг асуудлыг нийслэлийн Газрын албаны даргад хэллээ. Сургууль баръя гэхээр газар олддоггүй. Гэтэл томоохон компаниуд хотын А зэрэглэлд газар авчихсан л байдаг шүү дээ. Бүр уулыг амаар нь авчихсан байх тохиолдол ч бий.  Үүнийг засах ёстой. Хамгийн эхний хийх ажил газрын мэдээллийн санг ил тод болгох хэрэгтэй. Иргэн интернэтээр хайлт хийгээд л тэр газрыг хэн эзэмшиж байгаа талаар мэддэг л байх хэрэгтэй. Иргэний бүртгэл ч гэсэн ийм биз дээ. Тэгвэл тэнд газар авч болохгүй гэдгийг мэддэг болно.

-Төлөөлөгчид хотын даргыг огцруулах гарын үсэг зурж байгаа талаар яригдаж байна. Та гарын үсэг зурах уу?

-Ийм бичиг хараагүй. Хоёрдугаарт, гарын үсэг зурахгүй. Ийм бичгийг олж хараагүй болохоор мэдэхгүй байна.

-Хотын даргын талаар иргэд ихээхэн шүүмжлэлтэй хандаж байна. Та энэ асуудлыг хэрхэн харж байна вэ?

-Ажил хийж байгаа хүнийг шүүмжилж байх ёстой. Шүүмжилж байж ажлыг нь илүү сайн хийлгэнэ. Гарсан алдааг нь засуулна. Энэ байдаг л зүйл. Ажил хийгээгүй хүнийг шүүмжлэх ямар ч үндэслэл байхгүй шүү дээ.

-Хотын захиргааны шинэ байр хэзээ ашиглалтад орох вэ?

-Энэ талаар мэдээлэл алга. Хотын захиргаа өөрөө байхгүй болчихоод байна. Гурван давхар байр нь Голомт банкных шүү дээ.

Б.Лхам