НИТХ-ын төлөөлөгчид Засаг даргыг огцруулах гарын үсэг цуглуулж эхэлсэн талаар мэдээлэл гараад буй. Үүнтэй холбоотой болон бусад асуудлаар НИТХ-ын төлөөлөгч Ц.Баатархүүгээс тодрууллаа.

-Засаг даргыг огцруулах ажил яригдаж байна. Зарим төлөөлөгчид гарын үсэг цуглуулаад эхэлжээ. Засаг даргыг огцруулах асуудлаар АН-ын бүлэг ямар байр суурьтай байгаа вэ?

-Нийслэлийн Засаг даргад хариуцлага тооцох албан бичиг одоогоор ирээгүй байна. Хэрэв ирвэл бүлэг хуралдаж, байр суурь гаргана. Одоогоор НИТХ 2019 онд нэг их наяд төгрөгийн төсвөөр хийсэн ажлын гүйцэтгэлийг дүгнэх ажил явагдаж байна. Хоёрдугаар хуралдаан дээр нам эвслийн бүлгүүд хуралдаж, Засаг дарга хангалттай ажиллаж чадаж байна уу гэдэг дүгнэлтийг ярьдаг. Уг хуралдааны шийдвэрээс Засаг даргад ямар хариуцлага тооцох асуудал яригдана.

-Өмнө нь Засаг даргын хийж, хэрэгжүүлж байгаа ажил хангалтгүй байгаа талаар АН-ын бүлгээс ярьж байсан?

-Нийслэлд хийж байгаа ажлуудыг зөвхөн би ярих нь илүүц гэж бодож байна. Тэртээ тэргүй нийслэлчүүд хотын амьдрал өнгөтэй, ахиц дэвшилтэй байна уу гэдгийг дүгнэж байгаа. Энгийн жишээ дурдахад 2016 онд өмнөх Засаг дарга Улаанбаатар хотод шөнийн гудамж төсвийн мөнгөөр барьсан. Уг ажлыг дараагийн Засаг дарга гарч ирээд мөн л төсвийн мөнгөөр буулгасан. Өмнөх Засаг дарга Сүхбаатарын талбай дээр авто зогсоол барьсан. Дараагийн Засаг дарга тухайн зогсоолыг болиулсан. Өнөөдөр бид хогоо ачиж чадаж байна уу, нийтийн тээвэр хүртээмжтэй байж иргэдийн амьдрал ахуй сайжирч байна уу гэдгийг харах ёстой. Өнөөдөр өрх бүрт эдийн засгийн өсөлт сайн, үр дүнтэй байна гэж ярьдаг. Гэтэл бодит байдал дээр айл өрхийн эдийн засгийн өсөлт сайжирч байна уу гэдгийг иргэд хариулна. Тиймээс нийслэлд шинээр яг юу хийсэн талаар хэлж чадахгүй байна.

-Нийслэлийн Засаг захиргааны зарим нэг газрын дарга нар авлига, албан тушаалын хэргээр шалгагдаж байна гэсэн мэдээлэл байна. Хэрэв гэм буруутай нь тогтоогдвол ямар хариуцлага хүлээлгэх ёстой вэ?

-Энэ асуудлыг зохицуулах тусгай хуультай шүү дээ. Ажил, албан тушаалыг нь түдгэлзүүлэх, хариуцлагын асуудлыг ярих ёстой. Дахин төрийн алба хаах эрхийг нь хасдаг. Тиймээс хууль хяналтын байгууллага шийдэх байх.

-Ирэх онд нийслэлийн төсөв өмнөх жилээс багасах тухай ярьж байна?

-Улсын төсөв батлагдсаны дараа нийслэлийн төсөв яригдах ёстой. Ер нь дүүргүүдтэйгээ нийлээд нэг их наяд төгрөгийн төсөвт энэ онд хүрсэн юм. Ирэх онд энэ хавьцаа байх болов уу гэж бодож байна.

-Ирэх онд дутуу хийгдсэн, хүлээгдэж байгаа ажил юу байна?

-Нийтийн тээврийн хүртээмж, чанарын асуудал байна. Иргэд ажлын оргил цагаар нийтийн тээврээр үйлчлүүлж чадахгүй байна. Нийтийн тээвэр тухгүй байна. Энэ асуудлыг яаралтай сайжруулах талаарх саналыг бид гурван жил өгсөн. Мөн гэр хорооллын дахин төлөвлөлтийн асуудлыг өнгөрсөн гурван жил ярилаа. Учир нь утааг бууруулахад хамгийн чухал нь гэр хорооллын яндангийн тоог бууруулах шүү дээ. Энэ талаар удаа дараа санал явуулсан ч харамсалтай нь энэ ажил хийгдэхгүй байна. Гуравдугаарт, эрүүл мэнд, боловсролын үйлчилгээний чанарыг сайжруулах шаардлагатай байна. Тухайлбал, нийслэлд бага ангийн багш нар олдохй байна. Тиймээс багш, эрүүл мэндийн салбарын ажилчдын урамшууллыг шийдэх саналыг гурван жил өгсөн.

-Сайжруулсан түлштэй холбоотойгоор утаа мэдрэгч суурилуулахад 6.6 тэрбум төгрөг төсөвлөж, гаднаас авах талаар яригдаж байна. Гэтэл дотоодынхон уг мэдрэгчийг хямд үнэтэйгээр үйлдвэрлээд эхэлсэн байна. Тэдний зүгээс дотоодын үйлдвэрлэлээ дэмжиж, дотоодоосоо худалдаж авахыг шаардаж байна. АН-ын бүлэг энэ талаар ямар байр суурьтай байгаа вэ?

-Энэ талаар яригдаагүй байна. Ер нь сайжруулах түлшийг хэрэглэх нь ерөнхий концевцын хувьд зөв. Улаанбаатар хот түүхий нүүрс хэрэглэхийг дэмжиж болохгүй. Агаар орчны бохирдлыг бууруулах тал дээр АН-ын зүгээс санал нэг байгаа.

Б.Лхам