Илүүдэл жинтэй гэдэг шалтгаанаар ажилд авахаас татгалзсан “Оюутолгой” ХХК-ийн шийдвэрт шүүхэд гомдол гаргасан иргэн Ц.Чинбат энэ сарын 21-нээс эхлэн өлсгөлөн зарлаад байсан. Тэгвэл түүнийг энэ сарын 26 буюу өчигдрөөс эхлэн Сүхбаатар дүүргийн нэгдсэн эмнэлэгт албадан эмчилгээнд оруулахаар өлсгөлөнг хүчээр таслан зогсоосон байна. Энэ талаар тэрбээр "Сүхбаатар дүүргийн Засаг даргын үүргийг түр орлон гүйцэтгэгч нь хагас сайн өдөр тушаал гаргасан байна. Түүний тушаалаар намайг хүчээр эмчилгээнд оруулахаар эмнэлэгт авчирлаа. Би эмчилгээ хийлгэхгүй. Тэд миний эрхэнд халдаж байна. Би шударга ёс нэхсэн болохоос биш мөнгө төгрөг нэхээгүй. Оюутолгойн зүгээс нөлөөлсөн байх. Түүнээс биш төрийн алба хаагчид амралтын өдрөөр ажиллаж, тушаал шийдвэр гаргаж байсан удаа хэр олон бэ. Тэд ингэж шуурхай ажилладаг юм бол төрийн үйлчилгээ авахын тулд иргэд ингэтлээ бухимдах байсан гэж үү. Би эмчилгээ хийлгэхгүй" гэсэн юм.