Нийслэлийн 380 жилийн ойн баярын хуралдаан нийслэлийн Хангарьд ордноо боллоо. Энэ үеэр НИТХ-ын дарга Р.Дагва мэндчилгээ дэвшүүлсэн юм.

Тэрбээр “Түшээт хан Гомбодоржийн хөвгүүн Занабазарыг шарын шашны тэргүүнээр өргөмжлөн “Шар бүс”-ийн хот байгуулж байжээ. Эдүгээ Өвөрхангай аймгийн Бүрд сумын нутагт орших Их Монгол уулын өвөр, бага Монгол уулын ар бэлийн ариун дагшин ширээт цагаан нуурын хөвөөнд байгууласан “Шар бүс”-ийн хот нь өнөөгийн Монгол Улсад байгуулсан Улаанбаатар хотын тулгын чулуу хэмээгдэх болжээ. Тэрхүү 1639 оноос хойш Өргөө, Номын хүрээ, Их хүрээ, Нийслэл хүрээ хэмээн нэрлэгдэж байгаад 1924 оноос Улаанбаатар хэмжээн нэрийдэж түүхт ойгоо тэмдэглэж байна. Монгол Улсын нийслэл Улаанбаатар хотын үүсэл, хөгжил, дэвшил бүхэн түүхэн замнал мөн билээ.

Монгол Улсын хөгжлийн нүүр царай болсон нийслэлийн хөгжүүлэх их үйл хэрэгт нийслэлчүүдийн идэвх оролцоо юу юунаас чухал. НИТХ  аливаа бодлого шийдвэрийг гаргахдаа олон нийтийн болон, эрдэмтэн судлаачдын санал бодлыг  сонсож иргэдэд  тулгамдсан асуудлыг богино хугацаанд шийдвэрлэх бодлого барин ажиллаж ирлээ.

Аравдугаар сарын байдлаар нийслэлийн Хөгжлийн төлөө НИТХ-ын ээлжит хуралдаан 10 удаа, ээлжит бус хуралдаан хоёр, ИТХ-ын Тэргүүлэгчид 28 удаа хуралдаж бодлого шийдвэр гаргасан байна. Бид нийслэлийн түүхт ойг тэмдэглэхдээ хийсэн бүтээсэн иргэддээ танилцуулж, үнэлүүлж дүгнүүлэн цаашид нийслэлийн хөгжлийн төлөө бодлогоо тодорхойлж ажиллах учиртай” гэсэн юм.

Нийслэлийн Засаг дарга бөгөөд Улаанбаатар хотын захирагч С.Амарсайхан “Нийслэлийн Засаг даргын Тамгын газар түүний харьяа байгууллагуудаас НИТХ-аас гаргасан бодлого шийдвэр, бодлогын баримт бичигт тулгуурлан Засаг даргын мөрийн хөтөлбөрийг хэрэгжүүлэх чиглэлд онцгой анхааран ажиллаж ирлээ. Нийслэлийн Засаг даргаас хотын бодлогыг тодорхойлохдоо хүн, орчин, төлөвлөлт буюу хүн төвтэй бодлого, орчин төвтэй шийдэл, төлөвлөлт төвтэй хөгжлийн бодлогын концевцийг боловсруулан ажилалж байна. Агаарын бохирдлыг бууруулахад Засгийн газрын 62 дугаар тогтоолыг хэрэгжүүлэн ажиллаж, элдэв эрсдэл, алдаа оноотой замыг туулж байгаа хэдий ч тодорхой хувиар агаарын бохирдол буурч байгааг та бид мэдэж байгаа. Иргэдийг орон сууцны хөнгөлөлттэй урт хугацааны зээлд хамруулах чиглэлээр Засгийн газар нийслэлээс тодорхой төсөл хөтөлбөрүүд хэрэгжүүлж тэднийг орлогод нийцсэн орон сууцны хөтөлбөрт хамруулж түрээслэх, түрээслээд өмчлөх хэлбэрээр оронсууцжуулаах ажил ид өрнөж байна.

Мөн Улаанбаатар хотыг 2040 он хүртэл хөгжүүлэх хөгжлийн төлөвлөгөө, 2030 он хүртэл хөгжүүлэх хэтийн зорилт, хөгжлийн стратеги төлөвлөгөөгөө бид хэмжүүр шалгуураар хэрэгжүүлэхийн зэрэгцээ Аэро сити, Майдар сити, Налайх, Багануур, Баганхангай зэрэг хотуудыг бие даан хөгжүүлэх замаар нийслэлийн өмнө тулгамдсан олон хүндрэлийг богино хугацаанд бодитойгоор шийдвэрлэх боломж байна гэж харж байна. Зам дэд бүтцийн ажилд онцгой анхааран нийслэлийн авто замын өргөтгөл шинэчлэлийн ажлыг цаг нартай уралдуулан хэрэгжүүлж хяналт тавьж ажиллаж байгаа нийслэлийн холбогдох харьяа байгууллага, агентлагуудын удирдлагууддаа талархлаа илэрхийлье. Энэ жил Замын цагдаагийн газрын гүүрэн гарц, Сонсголонгийн бетон гүүрийг ашиглалтад оруулж, төв цэвэрлэх байгууламжийн шинэчлэлийн ажлыг хийж гүйцэтгэхийн зэрэгцээ шинэ төв цэвэрлэх байгууламжийн ажлын эхлүүлж 2023 онд ашиглалтад оруулах төлөвлөгөөтэй ажиллаж байна.

Түүнчлэн олон жил яригдаж ажил хэрэг бололгүй удсан Налайхын 20.9 км замыг арваннэгдүгээр сарын 4-нд хүлээн авч хөдөлгөөнийг нээхэд бэлэн боллоо” гэлээ.

Б.Лхам