Хүчний байгууллагуудын гүйцэтгэх ажиллагаагаар өчигдөр орой дөрвөн байршлаас гадаадын 500-гаад иргэнийг цахим гэмт хэрэг үйлдсэн байж болзошгүй гэж үзэн саатуулсан. “Юнион бюлдинг”, “Ориентал”, “Кентавр”, “Амар” зочид буудалд байрласан эдгээр иргэд нь бүгд хятадууд байсан бөгөөд Монголын хилээр орж ирсэн өдрөө эдгээр буудалд байрласан байна.

Энэ хугацаанд байрласан газраасаа гаралгүйгээр цахим гэмт хэрэг үйлдсэн байж болзошгүй хэмээн үзэж байгаа юм байна. Хятадын эдгээр иргэн нь 20-30 насны залуучууд бөгөөд бүгд Хонгконгоор дамжин Монголд ирснээс шалтгаалан хонгконгчууд байх магадлалтай гэсэн таамаг үүсээд байжээ.

Цахим гэмт хэрэгт сэжиглэгдэн баривчлагдаад байгаа эдгээр хятад залуус 30 хоногийн жуулчны визтэйгээр манай улсад ирсэн байна. Тэдний олонхи нь БНХАУ-ын Хөх хотод байдаг Монголын Консулын газраас жуулчны виз авсан, цөөхөн хэд нь Эрээний консулын газраас виз авчээ.

Дашрамд дурдахад, жуулчны ангиллаар манай улсад ирсэн гадаадын иргэд нэг удаа 30 хоногоор визээ сунгуулж болдог бөгөөд ингэхдээ заавал Гадаадын иргэн харьяатын газарт очиж сунгуулдаг байна. Харин баривчлагдсан хятадууд Гадаадын иргэн харьяатын газарт виз сунгуулах хүсэлт гаргаагүй аж.

С.Сүлд