Монгол Улсын Ерөнхий прокурор, Төрийн хууль цаазын тэргүүн зөвлөх Б.Жаргалсайхан УИХ-ын гишүүн Н.Номтойбаярын бүрэн эрхийг түдгэлзүүлэх саналыг УИХ-д оруулж ирээд хэд хонолоо.
Төр төмбөгөр, ёс ёмбогор . УИХ-ын гишүүний бүрэн эрхийг түдгэлзүүлэх асуудлыг шийдвэрлэх хуулийн хугацаатай. Тэр ч даший шог болж, Ерөнхий прокурор Б.Жаргалсайхан түшээдийн хуралдахыг хүлээгээд Төрийн ордны хонгилын сандал дээр сууж байдаг болов.
Ерөнхий прокурор хүлээсэн, суусан асуудал энд гол биш.
Хамгийн гол нь хуулийн хугацааг гишгэлэн байж өнөөдөр /2020.1.28/ арайхийн хуралдсан Байнгын хорооны хуралдаанд учир буй ажээ.
Ноцтой гэмээр нэгэн мэдээллийг хэвлэл, олон нийтийн сүлжээ мэдээлж эхлээд байна.
Тэр нь УИХ-ын гишүүн Н.Номтойбаяр, түүний ар гэрийнхэн УИХ-ын нэр бүхий нэлээд хэдэн гишүүнийг ятгаж, бүрэн эрхээ хадгалж үлдэх замаа зассан гэж мэдээлж байна.
Мөн АН-ын дарга С.Эрдэнэ, УИХ-ын дарга асан М.Энхболд нар уулзалдаж, Н.Номтойбаярыг УИХ-ын гишүүн хэвээр нь авч үлдэх хэрэгтэй гэж тохирсон. Хоёр дарга тохироод АН-аас С.Эрдэнийнхэн, МАН-аас М.Энхболдынхон ажиллаж байгаа гээд бас бичиж байна.
Болж буй үйл явдлыг харахад үнэн ч байж болохоор холбоо сүлбээ бүхий үйл явдлууд өрнөж байгаа.
Үүнээс гадна Н.Номтойбаярыг УИХ-ын гишүүн хэвээр үлдээх ямар ашиг сонирхол энэ хоёр улстөрчид байна вэ гэдэг нь сонирхолтой.
Үзэл бодлын, байр суурийн хувьд баруун зүүн, эсрэг тэсрэгийн хоёр туйлын улстөрч нийлж нэгдсэн. Энэ нь өнөөх л МАНАН хэмээгчтэй холбоотой гэж эх сурвалж тайлбарлаж байна.
Нөгөө талаас, энэ бол эрх барьж буй МАН доторх зөрчилтэй шууд холбоотой. У.Хүрэлсүхийн эсрэг тэмцэл. Угаасаа М.Энхболд, Н.Номтойбаяр нар улс төрийн нэг фракцынх гэдэг ил болсон. Тиймээс энэ бүхэн нь журмын нөхөд бие биеэ хамгаалж буй явдал гэх задаргааг олон талаас хэлж эхэллээ.
Ингэж С.Эрдэнэ, М.Энхболд хоёр Н.Номтойбаярыг авч үлдсэн юм байгаа биз. Харин үүний цаана, энэ явдлын дараа юу болох вэ гэдэг бол сонирхол татахаас илүү анхаарал татаад байна.
Төрийн хуулийг ингэж гууль маягийн юм болгож байгааг шударга ёсны төлөө илтэд ажиллаж эхэлсэн гэх нийгмийн үнэлгээтэй Ерөнхийлөгч юу гэж үзэж байнгаа бол оо.
Ерөнхий прокурор бараг л хамаг байдгаа тоочиж эрхэм гишүүнийг түр түдгэлзүүлэх шаардлага байна гээд гуйх шахам зогсож байгаа нь талийгч Б-гийн ар гэрийнхэнд яаж харагдаж байгаа бол оо.
Хамгийн гол нь Монгол төрийн түшээгийн сахиж явах хамгийн эрхэм дээд чанар болох ёс суртахууны хэм хэмжээг Н.Номтойбаяр яаж сахисан бэ. Ёс суртахууны хил хязгаарыг даваад хуулийн дээгүүр гишгэж ч мэдэхээр байгаа явдлыг олон нийт юу гэж дүгнэж суугаа бол оо.
Ингэж л байг уу?
С.Эрдэнэ, М.Энхболд хоёр Н.Номтойбаярыг авч үлдэв хэмээхийн цаана ийм олон учиг хөвөрч харагдаад байна даа, та минь ээ!
С.Сүлд
Сэтгэгдэл (51)