Коронавирусийн халдвар аваад “Өргөө” амаржих газар эмчлүүлж байсан иргэн Б эмнэлэгт байхдаа амиа алдсан. Шалтгааныг нь ар гэрийнхэн нь сувилагч буруу тариа андуурч хийснээс болсон гэж гомдол гаргасан юм. Талийгаач зүрх нь өвддөг байсан бөгөөд ковидын эмчилгээтэй хавсран “Атрафин” хэмээх зүрхний тариа хийлгэж байжээ. Гэтэл тухайн өдөр ээлж таарсан сувилагч энэ тариаг андууран “Атрапин” гэдэг тариа хийсэн гэж ар гэрийнхэн нь гомдол гаргасан юм. Энэхүү “Атрапин” гэдэг тарианы худалдааны нэршил нь “Тракриум” бөгөөд хагалгаа хийхэд хэрэглэдэг, зүрхний үйл ажиллагааг зогсоодог тариа юм байна. Гэтэл зүрх муутай хүнд зүрхний үйл ажиллагааг дэмжих тариа хийх гэж байгаад “Атрапин” хийсэн нь үхлийн шалтгаан болсон гэж ар гэрийнхэн нь хэвлэлийнхэнд хандаж байв. Шүүх эмнэлгийн дүгнэлтэд үхлийн шалтгааныг “Эм тарианы хордлогоос болсон байж магадгүй” гэсэн утга агуулагдаж байсан гэж ар гэрийнхэн нь мөн мэдэгдэж байсан билээ.

Энэ хэргийг Сүхбаатар дүүргийн нэгдүгээр хэлтэст шалгаж байгаа юм. Энэ хэрэг гарсны дараа эмнэлгийн удирдлагуудтай ар гэрийнхэн нь уулзахдаа “Атрапин” гэдэг тариа хийсэн тухай хэлэхэд, “Энэ тариаг хийсэн бол ойлгомжтой шүү дээ” гэж хэлсэн гэдгийг талийгаачийн нагац эгч хэвлэлд өгсөн ярилцлагадаа дурдаж байв. Талийгаачийн нөхөр хэдхэн сарын өмнө ажлаа хийж яваад гэнэт өөд болсон, тэд дөрвөн хүүхэдтэй, том нь 19, бага нь 3 настай өнчирч үлдсэн билээ.

Тариа андуурч хийсэн гэгдэж байгаа сувилагч Нарантуяа нь төрөх, төрөхийн дараах тасгийн сувилагчаар найман жил ажиллаж байгаа бөгөөд Ковидын тасагт ажиллах хугацаандаа ийм хэрэгт холбогдоод байсан юм. Тус хэргийг Сүхбаатар дүүргийн нэгдүгээр хэлтэст шалгаж байгаа. Нэг ёсондоо хэргийн эцсийн шийдвэр гараагүй байгаа гэсэн үг. Гэтэл ийм хэрэгт нэр холбогдоод байгаа сувилагч Нарантуяа Нийслэлийн Эрүүл мэндийн газрын өргөмжлөлөөр шагнуулсан ажээ.

С.Сүлд