Өнгөрсөн долоо хоногт НМХГ, “Тавантолгой түлш” ХХК хамтарсан хяналт шалгалтаар ХУД 14 дүгээр хорооны нутаг дэвсгэрт 30 шуудай түүхий нүүрс хадгалсан байсныг илрүүлж, Амгалан ДЦС-т хүлээлгэн өгчээ. Мөн цагдаагийн 102 дугаарын утсанд иргэд ААН-ээс түүхий нүүрс хэрэглэсэн болон зарим утаа үүсгэгч бүтээгдэхүүнээр галласан тухай дуудлага идэвхтэй ирж байгаа гэлээ. Харин өнгөрсөн долоо хоногт 27 иргэн хөнгөн болон хүнд хэлбэрээр угаартаж, эмнэлэгийн тусламж үйлчилгээ авсан байна. Энэ тухай албаны хүмүүсийн тайлбарыг хүргэж байна.   

Тавантолгой түлш ХХК Борлуулалтын хэлтсийн дарга Д.Миня: Нийслэлийн 617 борлуулалтын төвийн нийлүүлэлт, борлуулалт хэвийн байна

Өнгөрсөн пүрэв гаригт “Таван толгой түлш” компанийн баруун бүсийн үйлдвэрийн нэгдүгээр цехийн гуравдугаар шугамын төхөөрөмжид гал гарсан. Одоогоор холбогдох байгууллагын хүмүүс галын шалтгааныг тогтоохоор ажиллаж байна. Тус цехийн нэг болон хоёрдугаар шугамыг урьдчилсан байдлаар энэ сарын 20-ны өдөр ажиллагаанд оруулахаар төлөвлөөд байна. Нийслэлийн 617 борлуулалтын төвийн нийлүүлэлт, борлуулалт хэвийн байна. Гал гарснаас шалтгаалсан тасалдал байхгүй, зүүн бүсийнхээ нөөцөөс гаргаж байгаа. Түлшний үнэ дөрөвдүгээр сарын 1 хүртэл 50 хувийн хөнгөлттэй үнээр борлуулна.

Нийслэлийн агаарын бохирдолтой тэмцэх газрын дарга Б.Пүрэвсүрэн: Зорилтот бүлгийн 6098 өрхөд долоо хоногт зургаан шуудай түлш олгож байна

Өнөөдрийн байдлаар нийслэлийн хэмжээнд 21350 тонн түлшний нөөцтэй, хоногийн үйлдвэрлэл, борлуулалтаа хангаж байна. Түлш борлуулалтын цех ховор байдаг газруудад ирэх долоо хоногоос явуулын цех нээхээр ажиллаж байна. Мөн өнөөдрөөс эхлэн зорилтот бүлгийн 6098 өрхөд долоо хоногт зургаан шуудай түлш олгож байна.

Т.Мөнхжаргал