Монголын балетын урлагт чадварлаг бүжигчдийг бэлтгэж байгаа балетчин Б.Ганзоригтой уулзлаа. Тэрээр ОХУ-ын “Большой Театр”-аас ажлын гараагаа эхэлж, АНУ-д олон жил багшилж байсан туршлагатай. Харин саяхан эх орондоо ирж, мэргэжлийн багшаар “Sunee’s ballet”-д ажиллах болжээ. Түүнтэй ярилцлаа.
-Манай уншигчдад өөрийгөө танилцуулна уу?
-Намайг Б.Ганзориг гэдэг. Одоогоор Сүнээгийн балетын сургуульд балетын багшаар ажилладаг. АНУ-д 25 жил ажиллаж амьдарч байгаад саяхан нутагтаа ирсэн. Миний амьдралын зам балеттай холбогдсон учраас эх орондоо ирээд хүүхдүүдэд сурсан мэддэгээ заахаар шийдээд байгаа минь энэ.
-Гадаад болон Монгол хүүхдүүдэд балет заахад ялгаа байна уу?
-Олон жил АНУ-д багшилж байгаад нутагтаа ирээд харахад хүүхдүүд бараг л ялгаа байгаагүй. Биеийн хөгжил, хүлээж авч байгаа байдал зэрэг нь адилхан. Жишээлбэл, заавал бүжигчин болохгүй ч гэсэн чөлөөт цагаа зөв боловсон өнгөрөөхийн тулд балетаар хичээллэдэг болсон байна. Харин АНУ, ОХУ хоёр хоорондоо маш их ялгаатай. Ажиглаад байхад Орост мэргэжлийн бүжигчин болох хүүхдүүд балетаар хичээллэдэг бол, Америк, Монголд хүүхдүүд биеэ хөгжүүлэх гэж хичээллэдэг болсон нь таалагдаж байгаа. Мөн гадаадад Монголын залуу бүжигчид маш амжилттай явж байгаа.
-Монголын эрэгтэй мэргэжлийн балетчид тийм ч олон биш. Таны хувьд яагаад энэ мэргэжлийг сонгох болсон бэ?
-Би багаасаа балетын урлагт хөл тавьсан. Тухайн үед ОХУ-ын балетын сургуулийн шалгаруулалтад тэнцсэн хүүхдүүдийг явуулдаг байлаа. Бас их өндөр шалгууртай. Шалгаруулалтад тэнцээд анх ОХУ-ыг зорьсон доо.
-Бүжигчид тайзан дээр гарахыг хүсдэг шүү дээ. Таны хамгийн том тайз хаана, ямар тайз байсан бэ?
-Маш олон тайзан дээр, олон дүрд тоглож байлаа. Түүнээс хамгийн том нь ОХУ-ын “Большой Театр”-ын тайз байсан. Их сургуулиа төгссөний дараа тэнд нэг жил ажиллаж байхдаа “Хунт нуур”-т тоглосон. “Большой театр”-ын тайз бол балетчин бүрийн мөрөөдөл. Би мөрөөдөлдөө хүрчихсэн.
-Дахин тайзан дээр гарах бодол байгаа юу?
-Балет бол залуу насны урлаг, мэргэжил. Миний хувьд дахиж тайзан дээр гарахаас илүүтэй бяцхан бүжигчид бэлтгэх зорилготой байгаа.
-Тайзан дээр гоцлож бүжиглэх, хамтрагчтай бүжиглэх хоёр ялгаа бий юү? Таны хувьд алийг нь илүүд үздэг вэ?
-Мэдээж бүх л бүжигчид гоцлохыг хүсдэг. Харин тайзан дээр гараад өөрсдийгөө мэдэрч эхэлдэг. Хамтрагчтайгаа бүжиглэж байхад өөрийгөө бодож болохгүй, зөвхөн хамтрагчаа боддог. Эмэгтэйчүүд өлмий дээрээ зогсдог учраас тэнцвэртэй байх хамгийн чухал. Тиймээс эхлээд өөртөө итгээд, хамтрагчаа унагаахгүй, бэртээхгүй хамтрах нь зөв.
Т.Мөнхжаргал
