2021 оны авлигын төсөөллийн индексийг өчигдөр дэлхий нийтээр нэгэн зэрэг зарлалаа. Манай улсын тухайд нэг байр урагшлав. Дэлхийн 180 орны авлигын төсөөллийн  тус индексийг “Транспресси интернэшнл” байгууллагаас гаргадаг юм.

“Трансперенси интернэшнл” ТББ-ын хараат бус зөвлөх Д.Тэгшбаяр энэ талаар “Авлигын төсөөллийн индексийг 3-13 эх сурвалжаар баталгаажуулж гаргаж ирдэг. Өөрөөр хэлбэл, олон улсын хөгжлийн болон судалгааны байгууллагуудын судалгааны дүнг дунджилж гаргаж ирдэг оноогоор жагсаадаг гэсэн үг. Ерөнхий сайдын захирамжаар 2021 оны долдугаар сарын 16-нд авлигын индексийг бууруулах төрийн байгууллагын оролцоог хангасан өргөн хүрээтэй Ажлын хэсэг байгуулагдсан. Үндсэн зөвлөхөөр “Трансперенси интернэшнл” байгууллага ажиллаж байгаа. Нэг зүйлийг тодруулж хэлэхэд Ажлын хэсгийн үйл ажиллагаа 2021 оны төсөөллийн индекст үнэлэгдэхгүй. Өнгөрсөн зургаан сарын хугацаанд хийсэн ажлын үнэлгээ дараа жил буюу 2022 оны үнэлгээнд орно. Учир нь Ажлын хэсэг байгуулагдах үед 2021 оны авлигын индексийн судалгаа, үнэлгээ бүгд гарчихсан байсан гэсэн үг” гэв.