Яармагийн иргэд нийслэлийн захиргааны хэргийн шүүхийн гадаа цуглаж, улсын заан Ч.Батзориг, Кёкүшюзан Д.Батбаяр нар хууль бусаар газар эзэмшиж, барилга барих гэж буйг эсэргүүцэж байна.

Тодруулбал ХУД-ийн тав болон зургаадугаар хорооны нутаг дэвсгэрт байрлах цэцэрлэгт хүрээлэнгийн зориулалтаар ашиглах байсан газар дээр барилга барьж эхэлсэн байна. Иргэдийн өгч буй мэдээллээр “2016 онд Эс Си Эм ХХК ХУД-ийн тав хороонд газрын маргаантай асуудлаар шүүхээр шийдвэрлүүлж байсан. Тухайн үед Нийслэлийн засаг даргаар ажиллаж байсан С.Батболд тухайн зөвшөөрлийг цуцалж, хүүхдийн цэцэрлэгт хүрээлэн байгуулах зориулалтаар ашиглах буюу 600 сая төгрөг төсөвт оруулсан байсан ч эргээд барилга баригдаад эхэлсэн. Яагаад барилга барьсан бэ гэхээр тухайн компани шүүхээр шийдвэрлээд газраа авчихсан байсан. Ялангуяа Яармагийн иргэдэд хүүхдийн тоглоомын талбай, цэцэрлэгт хүрээлэн шаардлагатай байгаа. Өмнө нь цэцэрлэгт хүрээлэнтэй болох боломжоо алдсан иргэд энэ удаад ахиад газраа алдахгүйн тулд өнгөрсөн 20 орчим хоног ээлжлээд сайн дураараа манаж хонож байж барилга бариулаагүй. Холбогдох албаны хүмүүст болон Нийслэлийн засаг дарга, Ерөнхий сайд, Ерөнхийлөгчид энэ хүсэлтээ уламжилж өнгөрсөн 10 дугаар сарын 10-нд Нийслэлийн засаг дарга Д.Сумъяабазар тус газрын барилга барих зөвшөөрлийг цуцалсан. Гэтэл ахин барилгын зөвшөөрөл авахаар шүүх хурал зарласан байна. тиймээс иргэдийн талд шийдвэрлээсэй гэсэн үүднээс шүүхийн гадаа жагсаж байна” гэв.