2021-2022 оны хоёрдугаар улирлын хичээлийг хоёрдугаар сарын 14-с эхлүүлэх Засгийн газрын шийдвэр гарсан. Үүнтэй холбоотойгоор хичээлийн хоцрогдлын оношилгоо, хоцрогдол арилгах төлөвлөгөө, сургуульд бэлтгэгдсэн байдлын үнэлгээ, хичээл, сургалтын үйл ажиллагааг эхлүүлэх асуудлаар мэдээлэл хийлээ.  Энэ үеэр танилцуулсан судалгааны үр дүнг хүргэж байна.

Хоцрогдлыг арилгах үнэлгээ

Оношлох үнэлгээг 2021 оны есдүгээр сараас аравдугаар сард зохион байгуулж 755 сургуулийн 2-12 дугаар ангийн давхардсан тоогоор 297 мянган сурагчийг хамруулав. Сурагчдыг Математик, Монгол хэл, Хүн ба байгал, Байгалийн ухаан, Нийгмийн ухаан , Англи хэл, Сонгон судлах 6 хичээлээр оношлов. Анги тус бүрээр нь авч үзэвэл:

•  2 дугаар ангийн сурагчид 63,4 хувь буюу хамгийн өндөр үнэлгээтэй байна.
• Харин 9 дүгээр ангийн сурагчид хамгийн бага буюу 34,2 хувьтай үнэлэгджээ.
• Харин судлагдахуун тус бүрээр авч үзэвэл:
• Англи хэлний хичээлийг 34,2 хувь
• Монгол хэлний хичээлийг 47,2 хувьтай эзэмшсэн байна.

Сургуульд бэлтгэгдсэн байдлын үнэлгээ

Энэ хичээлийн жилээс эхлэн нэгдүгээр ангид элсэгчдийг үнэлж байх бөгөөд  5, 9, 12 дугаар ангиудад дахин үнэлж, тухайн сурагчийн ахиц амжилтыг тодорхойлох юм байна. Эхний жилийн гарааны үнэлгээнд 323 сургуулийн 23462 сурагчийг хамрууллаа. Үнэлгээнд хамрагдсан нэгдүгээр ангийн сурагчид 137 оноо авах ёстойгоос дунджаар 83 оноо авсан байна. Сурагчдын дундаж үнэлгээг хөгжлийн чиглэл тус бүрээр авч үзвэл:

• Нийгэмшихүйн хөгжил  65 хувь
• Бие бялдрын хөгжил  56 хувь
• Танин мэдэхүйн хөгжил 61 хувьтай байна.

Гарааны үнэлгээг бүсчилсэн байдлаар авч үзвэл:

• Төвийн бүсийн сурагчид  61.5 хувь
• Баруун бүсийн сурагчид  60.4 хувь
• Зүүн бүсийн сурагчид  64.1 хувь
• Хангайн бүсийн сурагчид  58.7 хувь
• Улаанбаатар хотод 60.6 хувьтай байна. 

Мөн сурагчдын хоцрогдолд програмын хэрэглээ, сургалтын хэрэглэгдэхүүний дамжлэг, эцэг эх асран хамгаалагчийн тусламж, багаар ажиллах чадвар,гэрийн даалгавар, багшийн заах арга зүй зэрэг нь нөлөөлж байна. Сурагчдын энэхүү хоцрогдлыг арилгах 3R /Эргэн холбогдох /Reconnection/, Нөхөх /Recovery/, Тогтворжуулах /Resilence/ төлөвлөгөөг Боловсрол, шинжлэх ухааны яам боловсруулжээ. Тухайлбал, сураад.мн  математикийн хичээлийн хоцрогдол арилгах, эгэл үйлийн арга зүйгээр хоцрогдол арилгах, бие даан ажиллах дасгал ажлын дэвтэр зэргээр хоцрогдлыг арилгахын тулд ажиллах юм.