“Монгол HD” телевизийн бэлтгэн хүргэдэг “Шарк Танк” нэвтрүүлгийн хоёр дахь улирлын хамгийн бяцхан оролцогчид болох А.Энхмөрөн, А.Цэцэнбилэг нарыг аав Б.Алтангэрэлийнх нь хамтаар 24tsag.mn ярилцлагын буландаа урилаа. Б.Алтангэрэлийнх ам бүл зургуулаа, А.Энхмөрөн айлын том охин, доороо гурван дүүтэй, харин дүү А.Цэцэнбилэг нь өөртэйгөө усны дусал мэт адилхан ихэртэй гэнэ. Ингээд Б.Алтангэрэлийн гэр бүлийн сонирхолтой яриаг уншигч та бүхэндээ хүргэж байна. Б.Алтангэрэл хоёр хүүхдийн хамт “Гэртээ туршъя” хэмээх сонирхолтой төслөөрөө “Шарк танк” нэвтрүүлгийн Д.Бадрал шаркаас хөрөнгө оруулалт татаж чадсан билээ. Аав, охин, хүү гурвын хувьд энэ төсөл дээр өөр өөрийн үүрэг рольтой оролцсон. Туршилтуудын санааг Б.Алтангэрэл ах баяжуулсан бол “Гэртээ туршъя” гэдэг нэрийг өгөхөд хоёр хүүхдийнх нь оролцоо их байжээ. Бас аавынх нь онцолсноор хөрөнгө оруулалт татаж чадсан гол зүйл нь хоёр хүүхэд нь төслөө маш сайн танилцуулж чадсан нь гэнэ.

Б.Алтангэрэл ахыг “Шарк Танк”-ын тайзнаас үзсэн хүмүүс түүнийг хэр үлгэр жишээч сайн аав бэ гэдгийг харсан биз ээ. Бидний яриа ажлын сонин сайхнаар эхлэв. “Гэртээ туршъя” төслийн баг туршилтуудаа нэмсээр 113 туршилт, найман жижиг багцаар хүрээгээ тэлжээ. Хамгийн сонирхолтой нь Ерөнхий боловсролын сургуулийн “Цөм” сургалтын хөтөлбөрийн физик, хими, биологийн хичээлийн хүрээнд багтсан бүх туршилтуудыг багцалсан явдал байв. Ийн ярилцах зуур аав, охин, хүү гурвын дунд өрнөсөн гэр бүлийн сонирхолтой яриа бидний анхаарлыг өөр тийш нь татлаа. Б.Алтангэрэл аль болох гэр бүлдээ цаг зарцуулахыг хүсдэг. Тэрбээр “Одооны хүүхдүүд цахим орчинд илүү их цаг зарцуулах болсон. Эцэг эхчүүд ч ялгаагүй. Харин би амралтын өдрөөр хүүхдүүддээ цаг зарцуулах дуртай. Энэ төслийн санаа анх тэндээс л гарсан. Янз бүрийн туршилтыг хүүхэдтэйгээ хамт хийгээд л үз. Тэд бидний толь шүү дээ. Өөрсдөө үлгэрлэж байж хүүхдүүд зөв хүмүүжнэ” гэв.

Хүүхдүүд аавтайгаа маш нээлттэй ярилцаж байлаа. Өнгөрсөн зун тэд гэр бүлээрээ говийн аялалд гарчээ. Говьд үзсэн гэр бүлийн кино үдэш, бас ээжийх нь хийсэн амтат хоол аяллыг чимсэн тухай тэдний яриа үргэлжилсэн юм. Б.Алтангэрэл “Хүүхдүүдтэй аялах хөгжилтэй бас сонирхолтой шүү. Бие биенээ илүү нээж өгч, дурсамж бүтээх хамгийн сайхан. Дан ганц хамт байхад биш, тэдэнтэй илүү ойртож, хүүхдийн өнцөгөөс амьдралыг харах боломжыг аялал өгдөг. Тиймээс туршилт ч бай, аялал ч бай бүхий л зүйлээ хүүхэдтэйгээ хамт хийгээд л үзээрэй” гэв.

Охин А.Энхмөрөн анхны туршилтын санааг аавдаа өгсөн хүн. Одоо 13 настай, “Оргил” дунд сургуулийн долоодугаар ангийн сурагч. Физикийн хичээлийн туршилтандаа аавынхаа тусламжийг авснаар тэдний санаа эхэлжээ. Түүнээс хамгийн дуртай хичээлийх нь талаар асуухад “Химийн хичээлдээ дуртай, амархан болохоор” гэж хариулсан юм. Хэвлүүхэн яриатай энэ охин ирээдүйд аавынхаа мэргэжлийг өвлөсөн мундаг химич болох мөрөөдлөө бидэнтэй хуваалцлаа. Химийн туршилтад хамгаас дуртай тэрээр чөлөөт цагаараа аавынхаа бизнесийг дэмжиж, туршилтуудаа багцалж, сурталчилгааны зураг авахад нь тусалдаг юм байна.

Б.Алтангэрэлийн дунд хүү А.Цэцэнбилэг өөртэйгөө усны дусал мэт ижилхэн ихэртэй. Тэд хоорондоо дэндүү адилхан болохоор найзууд нь хүртэл ялгалгүй андуурах үе байдаг. Түүнтэй аавтайгаа хийсэн шинжлэх ухааны туршилтын талаар ярилцлаа. Тэрбээр “Туршилт хийх маш гайхалтай. Ялангуяа галт уулын туршилт хамгийн гоё нь учраас надад таалагддаг” гэсэн юм. А.Цэцэнбилэг “Том болоод их мөнгөтэй, бас амралтын өдрөөр амардаг ажил хийнээ, банкир болоод аав ээжийгээ баярлуулна. Хамгийн гол нь банкир хүн хагас, бүтэн сайнд амрах боломжтой. Тийм болохоор том болоод банкир болж хүүхдүүдтэйгээ их цагийг өнгөрүүлдэг яг өөрийнхөө аав шигээ хүн болно” гээд эргэлзэх юмгүй өөрийнхөөрөө ярих түүний цагаахан мөрөөдлийг нь аав ээж нь ихэд дэмждэг ажээ...

Б.Алтангэрэл ах төслийнхөө талаар “Манай төслийн гол зорилго бол ашиг олох биш. Хамгийн гол нь энэ туршилтуудыг хүүхдүүд аав, ээжтэйгээ хамт хийх боломжтой. Ингэснээр эцэг эхчүүд хүүхдүүддээ зарцуулах цаг ихэсч, тэднийхээ мөрөөдлийг хуваалцах боломжтой болно. Бас хүүхдийн бүтээлч сэтгэхүйг хөгжүүлэхэд “Гэртээ туршъя” төсөл тус болно” гэлээ. Гурвалжингийн гүүрний тэнд өөрийн лабораторитай “Гэртээ туршъя” төслийн ойрын зорилгын нэг нь хотын төвд хүүхдүүд ирээд туршилт хийж болдог тийм оффистой болох. Бас Боловсрол, шинжлэх ухааны яамтай ерөнхий боловсролын сургуулийн ахлах ангийнхны байгалийн шинжлэх ухааны хичээлүүдэд нийцсэн хөтөлбөрт нь хамтрах. Боловсролын салбарт хөрөнгө оруулах, хүүхдүүдийн сэтгэн бодох чадварт хөтлөх ийм гэгээн мөрөөдөлтэй “Гэртээ туршъя” төслийн багийн аав, хүү, охин гурвын энэ сайхан хүсэл биелж завгүй аав ээжүүд зав гарган хүүхдүүдтэйгээ хамт туршилт хийн, тэднийхээ хүсэл мөрөөдлийн түүчээлэгч нь байж явах болтугай.

Т.Мөнхжаргал