Cэтгүүлч С.Будрагчаа  Монгол-Оросын хамтарсан III сургуулийн захирал Ж.Соронзонгийн хууль бус үйлдлийг шалгуулах өргөдлийг, нотлох баримтын хамт АТГ-т албан ёсоор хүлээлгэн өглөө. Тэрбээр “Монгол-Оросын хамтарсан гуравдугаар сургуулийн захирал Ж.Соронзон нь албан тушаалын эрх мэдлээ урвуулан ашиглаж,  өөрийн төрсөн дүү Ж.Содбилэгийн нэр дээрх компанитай түрээсийн гэрээ байгуулж төрийн өмчийн сургуулийн төсвийн бус хөрөнгөөс 2015-2021 оныг дуусах хүртэлх хугацаанд 845 гаруй сая төгрөгөөс нэг тэрбум 120 сая гаруй төгрөгийг жил бүр шилжүүлж байсан баримтыг хүргүүлж байна. Ингээд нийт Монгол-Оросын хамтарсан гуравдугаар сургуулийн данснаас нийт 46 удаагийн гүйлгээгээр таван тэрбум гаруй төгрөгийг шилжүүлсэн байна. Авилгын эсрэг хуулийг зөрчсөн тул гэм буруутай этгээдүүдийн хууль бусаар олсон орлогыг буцаан төлүүлж, хариуцлага хүлээлгэх хэрэгтэй. Тэрээр өөрийн төрсөн дүү Ж.Содбилэгийн нэрийг өөрчлөн Ш.Содбилэг болгон гэрээ байгуулсан байна. Ж.Содбилэг болон нягтлан бодогч н.Болормаа нарын гарын үсгийг өөрчлөн зуруулсан.  Гэрээ байгуулахдаа түрээсийн гэрээг зах зээлийн үнэлгээнээс гурваас тав дахин их тогтоосон зэрэг онц ноцтой үйлдлүүдийг гаргажээ. Мөн өөрийн нөхөр Н.Лүндэндоржийг өндөр насны тэтгэвэрт суусны дараа өөрийн сургуульд нийгмийн ухааны багшаар ажилд авсан. Түүнд сар бүр дөрвөн саяаас арван саяын цалин олгож төрийн өмчийн төсвийн бус хөрөнгийг онц их хэмжээгээр шамшигдуулсан байна. Дээрх үйлдлийг хуульд заасных нь дагуу шалган тогтоохыг хүсэж байна” хэмээн Авилгатай тэмцэх газарт өргөдөл, гэрээ материалын хамт хүлээлгэн өглөө.