Өдгөөгөөс яг жилийн өмнө Монгол Улс коронавирусын эсрэг вакцинжуулалтаа эхлүүлж байлаа. Хүн амынхаа 60 хувийг вакцинжуулалтад хамруулна хэмээн төлөвлөж эхлэж байсан бөгөөд тухайн үед БНЭУ-аас 150 мянган хүн тун АстраЗенека, БНХАУ-аас 300 мянган хүн тун Вероселл вакциныг манай улс хандиваар хүлээн аваад байв.

Анхны вакциныг Ерөнхий сайд Л.Оюун-Эрдэнэ хийлгэж хүн ардаа вакцинжуулалтад хамрагдахыг уриалж байв. Тэгвэл өнөөдрийн байдлаар Монгол Улсын зорилтот бүлгийн буюу насанд хүрсэн хүн амын  92 хувь нь бүрэн тун буюу хоёр тунд, 52.7 хувь нь гуравдугаар тунд хамрагдсан гэсэн статистик үзүүлэлт гарчээ. Энэ үзүүлэлтийг нийт хүн амаар авч үзвэл  66.8 хувь нь бүрэн тунд, 31 хувь нь гуравдугаар тунд хамрагдаад байгаа юм. Харин вакцины дөрөвдүгээр тунд 98529 хүн хамрагдаад байгаа ажээ.

Манай улс энэ хугацаанд АстраЗенека, Файзер, Вероселл, Спутник гэсэн дөрвөн төрлийн вакцинаар ард иргэдээ вакцинжуулаад байгаа билээ.

Б.Жаргал