Шилэн дансны мэдээллийг нийтэд хүргэж шүгэл үлээдэг иргэн Б.Цогтгэрэл өчигдөр Нийслэлийн Иргэдийн Төлөөлөгчдийн хурлын шилэн дансны мэдээллээс хүргэсэн. Энд нэг гүйлгээ анхаарал татсан нь НИТХ-ын Ажлын албаны дарга бөгөөд Нарийн бичгийн дарга Б.Батбямба 7,8 сая төгрөгийг “Нью имплант” ХХК-д шилжүүлсэн баримт байв.

Энэ нь яагаад анхаарал татсан гэхээр уг эмнэлгийн үйл ажиллагаа явуулдаг чиглэл нь гоо сайхны мэс ажилбар, гоо сайхны эмнэлгийн зориулалттай байлаа. НИТХ шилэн дансаараа мэдээлсэн уг компанийн пэйж хуудас руу ороод харахад гоо сайхны үйлчилгээ, ботокс тарилга, утсан давхрааны талаархи танилцуулгууд харагдана. Шүгэл үлээгч Б.Цогтгэрэл энэ бүхнийг үндэслээд ИТХ-ийн эл шилжүүлгийг “Ботокс тарилга хийлгэж, давхраа хийлгэсэн” юм биш биз хэмээн шогчлон асуусан билээ.

Харин үүний хариуд НИТХ-аас өнөөдөр /2022.02.23/ тайлбар хийлээ. Нийслэлийн Засаг даргын захирамжаар 2021 оны аравдугаар сарын 1-ний өдрөөс соёл урлагийн байгууллагын үйл ажиллагааг нээсэнтэй холбогдуулан НИТХ Монгол Улсын Төв номын сан, Д.Нацагдоржийн нэрэмжит номын сангуудад ариутгалын хаалга олгосон. Энэ ариутгалын хаалгыг “Нью Имплант” ХХК-аас нийлүүлсэн гэж мэдэгдсэн. Энэ хаалгыг “Нью имплант” ХХК нь 7.8 сая төгрөгөөр нийлүүлсэн гэсэн баримтыг НИТХ-ын  албан ёсны хуудаснаас харж болно. 

Бид ариутгалын хаалганы үнийг тодруулахаар  ариутгалын хаалга оруулж ирдэг хувь хүн болон компаниудтай холбогдлоо. 887177... утас руу залган “240*120*80” хэмжээтэй мананцар үүсгэж ариутгадаг тус хаалгыг ямар үнээр нийлүүлэхийг тодруулахад 4.5 сая төгрөгөөр нийлүүлэх боломжтой гэлээ. Гэхдээ энэ үнэ нь НӨАТ ороогүй үнэ гэдгийг тодотгоё.

Д.Батчулуун