Дэлхийн халуун цэг болоод байгаа Украин улсад манай улсын 68 оюутан суралцаж байсан. Тэдний зургаа нь энэ хичээлийн жилд эх орноосоо цахимаар суралцсан бол нөхцөл байдал амаргүй болсны улмаас 40 нь эх орондоо эргэн ирэх шийдвэр гаргаад байв. Өдгөө арав гаруй монгол оюутан Украин улсад байна. Оюутнууд эх орондоо буцах хүсэлтэй байсан боловч Гадаад хэргийн яамнаас авах бичиг ирээгүйгээс өнөөг хүртэл дайны байдалтай байгаа Украин улсаас гарч амжаагүй байсан юм. Украин дахь Монгол оюутнуудтай Варшав дахь Элчин сайд болон Киев дэх Монгол Улсын өргөмжит консулаас байнга холбогдож мэдээлэл өгч байгаа тухай өмнө нь хэвлэлүүдээр ГХЯ-наас мэдээлж байсан. Харамсалтай нь үйл явдал өрнөөд байгаа энэ цаг үед Өргөмжит консул ч, Элчин сайд ч хангалттай мэдээлэл өгч байгаагүй, холбоо бариагүй гэдгийг Украин дахь оюутнууд болон тэдний ар гэрийнхэн мэдэгдээд байгаа.

Украинд Монгол Улсын Элчин сайдын яам байдаггүй бөгөөд тус улсыг Варшав дахь Элчин сайдын яам хариуцдаг билээ. Монгол Улсаас Польш улсад суух Онц бөгөөд Бүрэн эрхт Элчин сайдаар томилогдсон Бархасын Дорж 2020 оны есдүгээр сард Польш улсын Ерөнхийлөгчид Итгэмжлэх жуух бичгээ өргөн барьсан. Элчин сайд Б.Доржийн хувьд Москвагийн олон улсын харилцааны их сургууль, Умард Ирландын Нэгдсэн Вант улсын “Вестминстр” их сургуулийг төгссөн, олон улсын харилцааны магистр, “Тэргүүн шадар” цолтой. 1989 оноос Гадаад харилцааны яаманд ажиллаж эхэлсэн тэрбээр 1992-1996 онд Варшав дахь ЭСЯ-нд атташе, 2000-2004, 2013-2016 онд Варшав дахь ЭСЯ-нд II нарийн бичгийн дарга, Элчин зөвлөх зэрэг дипломат ажил гүйцэтгэж байжээ. Элчин сайд Б.Доржийн хувьд “Чингис хаан” хамтлагийн дуулсан “Харийн нутаг давчдаад байна” гэдэг дууны үгийг зохиосон нэгэн. Тэрбээр 1993 онд Варшав дахь ЭСЯ-нд атташегаар ажиллаж байхдаа “Хариас дуулсан дуу” хэмээх шүлэг бичсэнийг “Чингис хаан” хамтлагийн дуулж олны хүртээл болгосон билээ. Түүний “Хариас дуулсан дуу” шүлэгт

“Элстэй толгод минь зүүдлэгдээд байна

 Ээж минь торойтол харагдаад байна

Эвэртэй алга нь бодогдоод байна

Энгэрийнх нь үнэр санагдаад байна

Үүлс тэнүүчилсэн тал минь байна

Өвс нь бидэртэж салхилаад байна

Өндрийн оройд жавартай байна

Өөвийж харуулдах нь аав минь байна

Харийн нутаг давчдаад байна

Харсан зүгтээ давхимаар байна

Хатуу дарсыг тулгамаар байна

Хашгирмаар, дуулмаар, уйлмаар байна

Аавдаа нэг шавхруулмаар байна

Айлгаж дараа нь тунирхмаар байна

Ээждээ очиж үнсүүлмээр байна

Эрхэлмээр, нялхармаар, ариусмаар байна

Цээлхэн дуугаа дуулмаар байна

Сэмхэн нулимс дусаамаар байна

Сэтгэл минь үргэлж нутагтаа байна

Цэцэгс зүүрмэглэсэн талдаа байна

Саравчлан тосох нь аав минь байна

Сандарч гүйгээ нь ээж минь байна

Салхи ханхалсан гэр минь байна

Сайхны дээд энэ л байна” гэсэн байдаг билээ. Хувь заяаны учралаар түүний хамаардаг дөрвөн орны нэг Украин дэлхийн халуун цэг болоод байна. Хажууханд нь бөмбөг дэлбэрч, хаачихаа мэдэхгүй байгаа хэдэн Монгол оюутан аа яаж татаж авах вэ, Элчин сайд аа. Метроны буудалд хоног өнгөрүүлж байгаа хэдэн монгол оюутанд яг одоо “Харийн нутаг давчдаад байна”.

О.Балдан-Очир