“Хөх Монгол” бүлгэм, “Даяар Монгол” хөдөлгөөнөөс өчигдөр болсон жагсаалын тухай мэдээлэл хийж байна. Тэд мэдээлэлдээ “ОХУ, Украин хоёрын хооронд болж буй мөргөлдөөн цаашид өргөжин тэлэх  магадлалтай. Тэр дундаа манай улс ОХУ-тай шууд хиллэдэг. Гэтэл өчигдөр залуусыг өдөөн турхирсан үйлдлүүдийг хийж, Монгол улсын ерөнхийлөгч байсан хүн хүртэл мэдэгдэл гаргалаа.  Үүнийг өөгшүүлж “No war” гэсэн бичигтэй, Украины далбаа барьсан хэсэг нөхөд жагслаа. Энэ бол Монгол улсын үндэсний аюулгүй байдалд шууд заналхийлсэн үйлдэл хэмээн харж байна. Бид зөвхөн таны, миний аюулгүй байдалд нөлөөлж байна гэж үзсэн учир талбай дээр очиж, хүч хэрэглэн далбааг нь булаасан. Ингэж тэрхүү үйлдлийг нь таслан зогсоосон. Ерөнхийлөгч асан Ц.Элбэгдорж маш болчимгүй мэдэгдэл хийсэн. Үүнтэй давхцаж No naadam, Double standart зэрэг  хөдөлгөөний бүгдийг үгүйсгэдэг хэдэн нөхөд жагссан. Энэ үйлдлийн хариуг нь барьсан. Энэ үед аль нэг талд орохыг хүсээгүй. Дайныг хүсэж байгаа улс орон байхгүй.

Шар даавууны тухай тайлбарлая. Монгол улс сүүлийн хоёр гурван зуун жилд газрын зургаас арчигдсан үе бий шүү. Манжийн дарлалд эрхшээж байх үед тэдний газрын зурагт зурагдаж байсан. Манжийн билэгдэл нь луут шар туг байсан юм. Шар өнгийг эрхэмлэж байсан. Тэр үед биднийг хооронд нь хагралдуулж эрхшээлдээ оруулж байсан. Тийм учраас шар өнгө дээр ач холбогдол өгсөн. Өчигдөр тэр өнгөө гаргаж ирсэн. Тайлбарлахдаа Украины далбаа гэж байна лээ. Үнэхээр дайн хүсээгүй юм бол аль ч улсын далбааг барих ёсгүй. Тэгвэл Монголынхоо далбааг бариад зогсохгүй яасан юм бэ. Ер нь ч тэр улсын далбааг бариад зогсох эрх тэдгээр нөхдөд байхгүй” гэв. 

Д.Батчулуун