Энэ бүсгүйг Н.Лхамжав гэдэг. Тэрбээр нөхрийн хамт “Итгэл Ивээлт” гэр бүлийн алжаал тайлах төвийг ажлуулдаг. Залуу хосуудын хувьд сурсан мэргэжлийнхээ дагуу ажлын гараагаа тэгээс эхэлсэн ч шаргуу хөдөлмөрлөсний үр дүнд өөрсдийн мөрөөдлөө бодит болгосон нь энэ юм. Энэ бол гэр бүлийн алжаал тайлах төв, нэмээд хүүхдийн алжаал тайлах бариа заслын цогц үйлчилгээ явуулдаг гэдгээр нь хүмүүс сайн мэднэ. Нөхөр  нь бариста мэргэжилтэй учир алжаал тайлах төвийнхөө дэргэд кофе шоп ажлуулж, Н.Лхамжав өөрөө бариа засалаа хийнэ. Дотроо саун, душ, жакузи, бариа заслын хэсэг гээд яг л гэр бүл, найзуудаараа ирэхэд тохиромжтой цомхон хэрнээ тав тухтай орчныг энд бүрдүүлжээ. Бид Н.Лхамжавтай хэсэг ярилцлаа.

“Итгэл Ивээлт” алжаал тайлах төвийн бариа засалч Н.Лхамжав:

-Танд өдрийн мэнд хүргэе. “Итгэл Ивээлт” алжаал тайлах төвтэй танилцаад авлаа, анх хэзээ төвөө нээж байсан бэ? Манай уншигчдад өөрсдийн төвөө танилцуулаач.

-Нөхөр бид хоёр амьдралаа босгож эхлэхэд байрны мөнгө, түрээсээс эхлээд жижиг том олон бэрхшээл тулгарч байсан. Тухайн үед мэргэжлээрээ сувилагчаар ажилладаг байсан юм. Залуу хүмүүс өөрсдөө хувиараа бизнес эрхлээд үзсэн нь илүү дээр санагдсан. Тиймээс 2020 оны есдүгээр сард энэ газраа түрээсээр ажиллуулаад, гэр бүлийн хүмүүст зориулсан ВИП хэлбэрээр алжаал тайлах төвөө нээж байлаа. Өнгөрсөн хоёр жилийн хугацаанд цар тахлын хүндхэн нөхцөлтэй нүүр тулж хэсэг хугацаанд завсарлага авсан ч эргээд төвөө нээгээд байна. Энэ хугацаанд бид илүү өргөжиж хүүхдийн спа, бариа заслын үйлчилгээ, алжаал тайлах багцтай болсон байгаа.Бүсгүйчүүд маань манайд найзуудаараа ирэх дуртай,  өмнө нь маникюр байгаа юу гэж их асуудаг байсан. Тийм учраас бид маникюрийн хэсэгтэй болсон байгаа. Манайд ирээд саун массажиндаа суугаад гарахдаа хумсаа гоёх боломжтой болсон шүү.

-Хүүхдийн алжаал тайлах багцад ямар үйлчилгээ багтсан бэ? Хүүхдийнх гэхээрээ илүү сонирхол татлаа.

-Тэгэлгүй яах вэ. Эхлээд хүүхдүүдээ бид өөрсдөө дүшинд оруулаад жакузи усан массажид оруулдаг. Хүүхдүүд маань уснаас гарч ирээд хөнгөн цай уусны дараагаар шар тостой бүтэн биеийн бариандаа ордог. Харин том хүмүүст зориулсан сауны багц, жакузи, бүтэн болон хэсэгчилсэн бариа, алжаал тайлах чихний лаа зэрэг үйлчилгээ үзүүлж байна.

-Нэг удаадаа хэдэн хүн хүлээж авах боломжтой вэ? Нээсэн цагаасаа хойш байнгын үйлчлүүлэгчтэй болсон уу?

-Манай төв хоёр ВИП өрөөтэй, хоёр өрөөндөө нэг дор зургаагаас найман хүн хүлээж авах хүчин чадалтай. Манайх шар тостой бүтэн биеийн бариа, бумба, усан массаж зэрэг үйлчилгээ явуулдаг. Тийм ч учраас байнгын үйлчлүүлэгчид маань ирэх их дуртай, долоо хоногийн стресс ядаргаагаа тайлаад гардаг юм. Сүүлийн үед хүүхдүүд ирэх их дуртай болоод байгаа.

-Хүүхдийн барианы онцлог юу вэ? Шар тостой бариа хийдэг гэсэн шүү дээ. Энэ талаар..

-Хүн бүрт бариа хийлгэх шаардлага байгаа. Ядарсан булчингаа суллаж, алжаал ядаргаагаа тайлж, цаашлаад хүүхдийн өсөлт хөгжилд нэн чухал үйлчилгээ үзүүлдэг.Нэгдүгээрт хүүхдийн алжаал тайлах зориулалттай. Хүүхдүүд томчуудыг бодвол илүү хөдөлгөөнтэй байдаг учраас илүү ядардаг. Сүүлийн үед гар утаснаас шалтгаалсан ядаргаанд өртөх нь нэмэгдсэн. Тэгвэл бариа хийснээр цусны эргэлт сайжирч, хүчилтөрөгчийн дутагдалыг хангахад илүү үр дүнтэй байдаг. Хоёрдугаарт шар тос нь биед хуримтлагдсан хий хуйг тарааж гадагшлуулж өгдөг. Тиймээс тайвширч ядаргааг тайлж сайн амрааж өгдөг. Хүмүүс шар тостой бариа хийлгэсний дараа сайхан амарч илүү сайн нойр авч унтдаг.

-Ханиад томууны улирал хараахан дуусаагүй байна. Энэ үед хүүхэд, томчуудад зөгийн балтай татлага хийж байгаа гэсэн. Зөгийн балтай татлага ямар үйлчилгээ үзүүлдэг вэ?

-Зөгийн балтай татлага нь маш олон төрлийн үйлчилгээтэй. Хүүхэд гэлтгүй том хүмүүс ч хийлгэж болдог. Ханиад томууны үед цэр ховхолох, хуян шар ус тараах болон өөх хайлуулах зорилгоор хийлгэж болдог.

-Танайх хэдэн ажилчидтай вэ? Ямар мэргэжлийн хүмүүс ажиллаж байна?

-Миний хувьд сувилагч мэргэжлээр 2018 онд бакалаврын зэргээ хамгаалсан. Түүнээс хойш мэргэжлээрээ ажиллаж байгаад уламжлалтын бариа засал, Монгол анагаах ухааны чиглэлээр давхар суралцсан. Манайх одоогоор таван ажилчидтай. Нөхөр маань бариста мэргэжилтэй учраас алжаал тайлах төвийнхөө үүдэнд кофе шоп ажлуулдаг. Үйлчлүүлэгчид маань манай кофе шопт их дуртай, тухтай байдаг гэдэг юм. Бид хоёроос гадна хүүхдийн бариа хийдэг залуус бий. Тэд маань бас хүүхдийн бариа заслын чиглэлээр суралцаад төгссөн мэргэжлийн хүмүүс байдаг.

-Танай төвийн онцлог нь юундаа байна вэ?

-Манайх гэр бүлийн хүмүүст зориулсан вип үйлчилгээ үзүүлдэг гэдгээрээ илүү онцлогтой. Хүүхдүүдтэйгээ хамт ирээд үйлчлүүлэх боломжтой. Хүүхдийн өрөө тусдаа, ээж аавын өрөө бас тусдаа. Мөн сувгийн бариа, алжаал тайлах массаж, цэгэн бариа хийгээд явна. Сувгийн бариа гэдэг нь хүний сувагаар дамжуулж өвчтэй хэсэгийг барьдаг. Харин цэгэн бариа нь хүний мэдрэлийн цэгүүдэд дарж хийдэг бариаг хэлдэг. Хүний гараар хийж байгаа бариа илүү үр дүнтэй байдаг. Алжаал тайлах аппарат, тогонд залгадаг массажнаас илүү хүний дулаан энергиэр, гараараа барьдаг учраас тэр.

-Ярилцлагын төгсгөлд уншигчдад хандаж хэлэх зүйл бий юу?

-Баярлалаа. Бидний эхлүүлсэн ажлыг дэмжиж ирж үйлчлүүлдэг үйлчлүүлэгчдэдээ баярлалаа. Манай төвөөр ирж үйлчлүүлэхээр төлөвлөж буй хүмүүс маань аль ч өдөр ирээд үйлчлүүлэх боломжтой шүү гэж хэлмээр байна. Манайх өдөр бүр өглөө 10:00 цагаас оройн 22:00 цаг хүртэл ажилладаг тул өмнөх өдөр нь 77751010 дугаар руу залган цаг авч үйлчлүүлээрэй. Манай хаяг Баянзүрх дүүргийн 13 хороолол, Ногоон төгөл хотхоны 77 дугаар байр.

-Ярилцсанд баярлалаа.

Т.Мөнхжаргал