Ханжау Азийн наадам болон Ази тивийн аварга шалгаруулах тэмцээний урьдчилсан шатанд оролцох эрхийн төлөөх тэмцээнд Монгол улсаа төлөөлөн оролцох үндэсний шигшээ багийн өргөтгөсөн бүрэлдэхүүн өчигдөр зарлагдсан. Энэхүү бүрэлдэхүүнд энэ улирлын Дээд лигт амжилттай тоглосон 41 тамирчдын нэрс багтсан бөгөөд сонгон шалгаруулалтын дараа шилдэг 12 нь Монгол улсын сагсанбөмбөгийн үндэсний шигшээ багийн тамирчдаар сонгогдоно. Тэгвэл IHC Apes багийн өмнөөс улирлын хоёр тоглолтод оролцсон Ш.Энхийн-Одын нэр уг жагсаалтад багтсангүй. Хэдийгээр нас залуу тамирчин боловч Америкийн NCAA-гийн нэгдүгээр дивизоны багт хүчин зүтгэхээр болсон түүнд шигшээ багт тоглох бүрэн ур чадвар байгаа. Одоогийн байдлаар яагаад түүнийг шигшээ багт дуудаагүй тухай шалтгаан нь тодорхойгүй байгаа бөгөөд уг шийдвэрт сэтгэл дундуур байгаагаа Ш.Энхийн-Од өөрийн цахим хаягаараа дамжуулан илэрхийлсэн.

Харин түүний аав болох Монгол улсын шигшээ багийн тоглогч асан Ц.Шаравжамц өөрийн цахим хаяг дээрээ: “Миний хүү уул нь шигшээ багийнхаа төлөө тоглох хүсэлтэй байсан юм. Аавтайгаа адил эх оронч үзэлтэй болохоороо шигшээ багтаа тоглох гээд байгаа байх л даа. Тоглож чадна гэдгээ харуулахын тулд АНУ-аас хүрэлцэн ирж лигийн хоёр тоглолтод тоглоод буцсан шүү дээ. Өөрийнхөө нэрийг хүртэл Монголиан Майк гээд л байгаа. Гэтэл шигшээгийн 40-50 хүн багтаасан өргөтгөсөн бүрэлдэхүүнд нэрийг нь оруулсангүй гээд гомдчих шиг боллоо. Харамсалтай байна. Өөрийгөө бодвол тоглох алба байхгүй. Шигшээ багийн тамирчдын нэрсийг лиг дууссаны дараа холбооны хурал дээр шинэ бүрэлдэхүүнээ сонгочхоод зарлана гэж байсан боловч худлаа байсан юм шиг байна. Гомдмоор юм аа.” гэж сэтгэгдлээ хуваалцжээ.

П.Тамир