Өнгөрсөн долоо хоногт болж өнгөрсөн онцлох үйл явдлуудаас хүргэж байна.
Зүүнбаян-Ханги чиглэлийн төмөр замын бүтээн байгуулалт эхэллээ
Зүүнбаян-Ханги чиглэлийн төмөр замын бүтээн байгуулалтын нээлт өнөөдөр боллоо. Тус төмөр замын суурь бүтэц Дорноговь аймгийн Сайншанд сумын Зүүнбаян өртөөнөөс Ханги боомт хүртэл 226км үргэлжилж БНХАУ-ын Мандал боомттой холбогдоно. Ханги боомт нээгдсэнээр төмөр замын өсөн нэмэгдэж буй ачаа эргэлтийн 50 хувь нэвтрэх боломж бүрдэх юм байна.
Х.Нямбаатар: Хөгжлийн банканд хийсэн 130 хуудас шалгалтын материалыг ил болгоно
2016 онд Хөгжлийн Банканд хийсэн Засгийн газрын шалгалтын дүнг нийтэд ил болгох асуудлыг хэлэлцсэн. 130 хуудас шалгалтын материал байгаа. Тодорхой эх үүсвэрээс татан төвлөрүүлсэн хөрөнгийг зээл болгон гаргасан, ямар зээлдэгчдийг хууль хяналтын байгууллагад шилжүүлсэн, зургаан жилийн хугацаанд өр төлбөр хэрхэн барагдсан зэрэг нэлээн дэлгэрэнгүй мэдээллийг ил болгож байна.
МкДоналдс, Старбакс, болон Кока-Кола ОХУ-ыг орхив
ОХУ-ын Украин улс руу түрэмгийлэн зэвсэгт халдлага үйлдсэнтэй холбогдуулан дэлхийн томоохон брэндүүд ОХУ дахь үйл ажиллагаагаа ээлж дараалан зогсоосоор байна. Тэгвэл дэлхийн хамгийн том түргэн хоолны сүлжээ ресторануудын нэг болох МкДоналдсын зүгээс ОХУ дахь бүх ресторан болон кафегаа хааж байгаагаа мэдэгдлээ. ОХУ даяар 847 ширхэг МкДоналдсын салбар ресторан байдаг бөгөөд 62,000 гаруй Орос хүмүүсийг ажлын байраар хангадаг байв.
Х.Баттулга АН-ын даргад өрсөлдөхөөр бүртгүүллээ
Ардчилсан намын Дотоод сонгуулийн хорооноос зохион байгуулж буй Ардчилсан намын даргын сунгаанд Монгол Улсын Ерөнхийлөгч асан Халтмаагийн Баттулга бүртгүүлэх хүсэлтээ хүргүүллээ.Түүний хүсэлтийг Ардчилсан намын Хэрэг эрхлэх газрын дарга асан Пүрэвийн Нүрзэд, Дотоод сонгуулийн хорооны дарга Ишжамцын Мөнхжаргалд хүлээлгэн өглөө.
Б.Нарантуяа снукер бильярдын Азийн АШТ-ээс хүрэл медалийн болзол хангав
Катарын нийслэл Доха хотод снукер бильярдын Ази тивийн аварга шалгаруулах тэмцээн энэ сарын 1-19-нд болж байна. Тэмцээний эмэгтэйчүүдийн ангилалд Монгол Улсын тамирчин Б.Нарантуяа Энэтхэгийн тамирчныг буулган авснаар хүрэл медалийн болзол хангалаа.
Монгол Улсын Ерөнхийлөгч Төрийн дээд цол, одон медаль гардууллаа
Монгол Улсын Ерөнхийлөгч У.Хүрэлсүх өнөөдөр төрийн дээд цол, одон медаль гардууллаа. Энэ өдөр зохиолч Б.Тогтохбаяр /Шүүдэрцэцэг/, жүжигчин, найруулагч Г.Ундармаа нар Соёлын гавьяат зүтгэлтэн цол тэмдэгээр, “Moon dance” хамтлагын бүжгийн багш О.Саранхүү Хөдөлмөрийн гавьяаны улаан тугийн одонгоор тус тус шагнагдлаа.
Улсын хэмжээнд төрөх болон төрсний дараах бүх орыг шинэчилжээ
Амаржих газруудад хийгдсэн хөрөнгө оруулалтаар улсын хэмжээнд төрөх болон төрсний дараах бүх орыг шинэчилжээ. Тухайлбал, ЭХЭМҮТ-ийн 496 ор хуучирч муудаад байсныг 100 хувь шинэчилжээ.
"Янзтай Дээд Лиг"-ийн улирлын шилдгүүд тодорлоо
"Янзтай Дээд Лиг"-ийн хамгийн үнэ цэнэтэй шагнал болох улирлын үнэ цэнэтэй тоглогчоор "Хасын Хүлэгүүд" багийн ахлагч ОУХМ Б.Билгүүн тодорчээ.
Улирлын шилдэг хамгаалан тоглогчоор "Архангай АлтанДорнодын дайчид" багийн төвийн тоглогч О.Энхбаатар, шилдэг шинэ залуу тоглогчоор "Тэнүүн-Өлзий Металл" багийн холбон тоглогч Т.Ууганбаяр, шилдэг зургаа дахь тоглогчоор ОУХМ, "Алдар Танан Гарьд" багийн тоглогч Б.Мөнхболд нар шалгарсанг мэдэгдлээ.
Д.Батчулуун
