Иргэний нийгмийн орон зайд хэвлэл мэдээллийн гүйцэтгэх үүргийн тухай мэдээлэл хийлээ. Төр болон иргэний нийгмийн байгууллагуудын зохист харилцааны талаар Эмэгтэйчүүдийн хөдөлмөрийг дэмжих холбооны тэргүүн Ш.Ариунаа мэдээлэл танилцууллаа. Тэрээр “Иргэний нийгэм гэж хэн бэ гэдгийг төр болон олон нийт танихгүй байна. Иргэний нийгмийн байгууллага сайн дураараа нэгдсэн, төрөөс ангид, ашгийн төлөө бус байдаг. Ашгийн төлөө бус гэдэг нь тухайн байгууллага орлого олж болохгүй гэсэн үг биш. Тухайн байгууллага орлого олж болно. Тэрийг хэн нэгний халаас руу ашиг хувиарлаж хийхгүй. Манай улсад ТББ-ийн нэртэй эмнэлэг, сургууль байна. Улс төрчдийн нэр дээрх ТББ-ууд байгаа тухай саяхан хэвлэл мэдээллээр шуугьсан. Та бүхэн шилэн данс руу ороод хэний нэр дээр ямар ТББ байна гэдгийг харах хэрэгтэй. Энэ хавар хэлэлцэх хуулиуд дээр татварын өртэй бол эвлэлдэн нэгдэж болохгүй гэсэн заалтууд бий. Татварт өртэй байхаас эс хамаараад эвлэлдэн нэгдэх эрхтэй байгаа юм. Ийм олон хязгаарлалтууд бий. Гэтэл дэмжлэг байхгүй. Хуулийг өргөн барьсан хүмүүсээс “Иргэний нийгмийн байгууллагыг яаж таньж байгаа вэ, олон нийтийн сайн сайхны төлөө ажилладаг байгууллагуудыг яаж дэмжих юм” гэж асуумаар байна. Төр өөрөө энэ талын дэмжлэгүүд хэлэлцэх хуулиуддаа оруулаагүй. Мөн “Мэргэжлийн нэгдсэн холбоодын эрх зүйн байдлын тухай” хууль энэ чуулганаар хэлэлцэгдэнэ. Энэ хуулийн хамгийн ноцтой зүйл нь аль нэг яамны дэргэд мэргэжлийн холбоод бүртгэх байгаа юм. Тухайлбал, хэний холбоог мэргэжлийн холбоо гэж бүртгэх вэ гэхээр сайдаас асуугаад, сайд шийдвэр гаргана. Үүний дараа тухайн мэргэжлийн холбоо сайдад зөвлөөд явчихна. Энэ нь төрөөс хараат бус ажиллахыг байхгүй болгож байгаа юм. Нэг халааснаас нөгөө халаас руу хийгээд байна. Энэ мэт зүйлээс дээрх хуулиудыг иргэний орон зайг хумьсан хуулиуд гэж үзэж байна” гэлээ.

Д.Батчулуун