Э.Бат-Үүл хорих ангид өлсгөлөн зарласан талаар өмгөөлөгч А.Пүрэвдулам мэдээлэл өглөө. Тэрбээр “Хорих 409 Анги бол дамжин өнгөрөх хорих анги. Энэ ангид гэм буруугийн байдал эцэслэн тогтоогдоогүй хүмүүс тэнд хоригддог. Энэ хүний хэвлэн нийтлэх, захидал харилцааны эрхийг хасах хууль эрх зүйн үндэс байхгүй.  

Э.Бат-Үүлийг хорих ангид хоригдсон өдрөөс эхлэн түүний эрх зөрчигдөж эхэлсэн. Путинийг шүүмжилж, дайныг эсэргүүцсэнийх нь төлөө түүний хэвлэн нийтлэх эрх чөлөөг хаасан. Тэрбээр жам ёсны эрхээ шаардаж, аргагүйн эрхэнд өлсгөлөн зарлахад хүрсэн. Өмгөөлөгчөөрөө дамжуулаад Монголын ард түмэнд болон хэвлэлийнхэнд уриалсан зүйлсийг танилцуулъя. Тэрээр өлсгөлөн зарлахдаа “Монгол улсын иргэн би Украиныг өмөөрөх эрхтэй” гэсэн уриатай зарлаж байгаа юм. Мөн олон нийтэд хандан хэлсэн үгсийг дамжуулъя. “1990 оноос өмнөх Зөвлөлтийн удирдагчийн талаар таагүй зүйл хэлсэн хүмүүсийг шоронд хорьдог байсан үе эргэн иржээ.

Эх орныхоо шоронд  харийнханд эзлэгдсэн орны иргэн шиг Путинийг шүүмжлээд гэмтэн болчихсон бурангүй нийгэм бий болжээ. Колон орны сэтгэлгээтэй байгаа хүмүүс гутамшиг шүү. Путин Монголыг удирдаагүй. Би Путиний улсад амьдраагүй...” гэж дамжуулсан. Өлсгөлөн зарласныг гэр бүлийнхэн нь хүлээж авахгүй байгаа. Учир нь нурууны гэмтэлтэй байгаа учир ар гэрийнхэн нь санаа зовж байна" гэв. 

Д.Батчулуун